ދިވެހިން އުފައްދާފައިވާ ތަކެތި އެއްތަނަކުން ދައްކާލުމަށް ބާއްވަމުން އަންނަ އުފެއްދުންތެރިކަމުގެ ގައުމީ މައުރަޒުގައި މިފަހަރު 2000 އަށް ވުރެ ގިނަ އުފެއްދުންތައް ފެނިގެންދާނެ ކަމަށް އިކޮނޮމިކް މިނިސްޓްރީއިން ބުނެފި އެވެ.
އިކޮނޮމިކް މިނިސްޓްރީގެ އޮފިޝަލަކު 'ސަން' އަށް ވިދާޅުވީ ދިވެހި އުފެއްދިންތެރިކަމާއި ހުނަރު އަދި ތަފާތު ހަރަކާތްތައް ދައްކުވައިދޭ އެ މައުރަޒަށް މިހާތަނަށް 2000 ހަށްވުރެ ގިނަ ތަކެތި ހުށަހަޅާފައިވާ ކަމަށެވެ. އަދި މިހާރު ތަކެތި މާލެ ގެނައުމުގެ މަސައްކަތް ކުރިއަށްދާ ކަމަށް ވިދާޅުވި އެވެ.
"އަޅުގަނޑުމެން ހުޅުވާލި ހުރިހާ ދާއިރާއެއްގައިވެސް ވަނީ ތަކެތި ބައިވެރިކޮށްފައި. ކެޓަގަރީތައް ވަކިވަކިން ދަންނަވާލަން މިހާރު ވަރަށް ދަތި. ނަމަވެސް ގިނަ އަދަދެއްގެ ތަކެތި ބައިވެރިކޮށްފައިވަނީ މައުރަޒުގައި،" އޮފިޝަލު ވިދާޅުވި އެވެ.
މިފަހަރުގެ މައުރަޒުގައި ތަފާތު 47 ދާއިރާއަކުން ތަކެތި ބައިވެރިކުރުމުގެ ފުރުސަތު ހުޅުވާލާފައިވާ އިރު، ކޮންމެ އުމުރެއްގެ ދިވެއްސަކަށް ވެސް އެކްސްޕޯގައި ބައިވެރިވެވޭނެ ކަމަށް އިކޮނމިކް މިނިސްޓްރީއިން ވަނީ ބުނެފަ އެވެ.
މައުރަޒު ކުރިއަށް ގެންދިއުމަށް ހަމަޖެހިފައި ވަނީ މިމަހުގެ 22 އިން 28 އަށް ދަރުބާރުގޭގަ އެވެ.