ބްރަސެލްސް (ނޮވެމްބަރ 23) : ބެލްޖިއަމްގެ ވެރިރަށް ބްރަސެލްސްގައި އިއްޔެ ފުލުހުންނާއި ސިފައިން ހިންގި ހާއްސަ އޮޕަރޭޝަންތަކުގައި 16 މީހަކު ހައްޔަރުކޮށްފި އެވެ.
އާދިއްތަ ދުވަހު ބެލްޖިއަމްގެ ދެ ސިޓީ އެއްގައި، ތުހުމަތު ކުރެވޭ މީހުން ހޯދުމަށް 22 އޮޕަރޭޝަނެއް ވަނީ ހިންގައިފަ އެވެ. އޭގެ ތެރެއިން މޮލެންބީކްގައި ކުރިއަށް ގެންދިޔަ ރޭޑެއްގައި ފުލުހުން ވަނީ ކާރެއްގައި ހުރި ތުހުމަތު ކުރެވޭ މީހަކާ ދިމާލަށް ބަޑި ޖަހައިފަ އެވެ. އެ ހަމަލާގައި އޭނާ ޒަހަމް ވުމުން ފުލުހުން ވަނީ މިހާރު އެމީހާ ހައްޔަރު ކޮށްފަ އެވެ.
ހައްޔަރު ކުރި މީހުންނަކީ ޕެރިހުގައި ދިން ހަމަލާތަކުގައި ބައިވެރިވި މީހުންކަން އަދި ޔަގީން ނުކުރެވޭ ކަމަށް ބެލްޖިއަމްގެ ފެޑެރަލް ޕްރޮސެކިއުޓަރަކު ވިދާޅުވި އެވެ. އަދި އެމީހުން ބަންދުގައި ތިބޭނެ މުއްދަތު ކަނޑައެޅުމަށް މިއަދު ކޯޓަށް ހާޒިރު ކުރާނެ ކަމަށް ވެސް އޭނާ ވިދާޅުވި އެވެ.
ޕެރިހަށް ދިން ހަމަލާގައި އެންމެ އިސް ދައުރެއް އަދާކުރި ކަމަށް ބެލެވޭ ސަލާހް އަބްދުއްސަލާމް އަދި ވެސް ވަނީ ނުފެނިފަ އެވެ. އަބްދުއްސަލާމް ހޯދަން ބެލްޖިއަމް އިން މަސައްކަތް ކުރަމުންދާ އިރު، ބްރަސެލްސްގެ ސަލާމަތީ މިންގަނޑު ވަނީ އެންމެ މައްޗަށް ޖައްސާފައި އެވެ. އަދި ސްކޫލްތަކާއި ޔުނިވާސިޓީތަކާއި ސިޓީގެ މެޓްރޯ ސިސްޓަމް ވަނީ ބަންދުކޮށްފަ އެވެ.
ބެލްޖިއަމްގެ ބޮޑު ވަޒީރު ޗާލްސް މިޝެލް ވަނީ ޕެރިހަށް ދިން ފަދަ ހަމަލާއެއް ބެލްގިއަމްއަށް ދީފާނެ ކަމުގެ ބިރު އޮތް ކަމަށް ވިދާޅުވެފަ އެވެ. އެ އިންޒާރާއި ގުޅިގެން ފުލުހުންނާއި ސިފައިން ދަނީ ބްރަސެލްގެ މަގުތަކުގައި ފޯރި މަރަމުންނެވެ.
ސަލާހް އަބްދުއްސަލާމްގެ ކޮއްކޮ މުހައްމަދު އަބްދުއްސަލާމް ވަނީ އޭނާގެ ބޭބެ ސަލާހް، އަމިއްލައަށް ފުލުހުންނާއި ހަވާލުވުމަށް ބެލްޖިއަމް ޓީވީ މެދުވެރިކޮށް އެދިފައި އެވެ. އެ ދެމީހުންގެ ބޭބެ އިބްރާހިމް އަބްދުއްސަލާމް އަކީ ޕެރިހަށް ދިން ޖާނުން ފިދާވުމުގެ ހަމަލާތަކުގެ ތެރެއިން އެއް ހަމަލާ ދިން އައިއެސްގެ މެމްބަރެކެވެ.
މައުލޫމާތު: ބީބީސީ