ސެއިންޓް ޑެނިސް (ނޮވެމްބަރ 18) : ހުކުރު ދުވަހު ޕެރިހަށް ދިން ހަމަލާތަކުގައި ބައިވެރިވި ކަމަށް ތުހުމަތު ކުރެވޭ ބަޔަކާއި ޕެރިހުގެ ފުލުހުންނާ ދެމެދު ޕެރިސްގެ ސެއިންޓް ޑެނިސްގައި މިއަދު ބަޑީގެ ހަމަލާތަކެއް ބަދަލުކޮށްފި އެވެ.
ޕެރިހުގެ ޕުރޮސެކިއުޓަރު ފުރަންސުވާ މޮލިންސް ވިދާޅުވި ގޮތުގައި ސެއިންޓް ޑެނިސްގެ އެޕާޓްމެންޓެއް ވަށާލުމަށް ފަހު، ފްރާންސުގެ ފުލުހުން ކުރިއަށް ގެންދާ އެ އޮޕަރޭޝަނުގައި މިހާތަނަށް ދެ މީހަކު ވަނީ މަރުވެފަ އެވެ. އަދި ފަސް މީހަކު ވަނީ ހައްޔަރުކޮށްފަ އެވެ.
އޭގެ ތެރެއިން އެކަކު މަރާލާފައި ވަނީ ޕޮލިސް ސްނައިޕަރަކު ދިން ހަމަލާއަކުންނެވެ. ދެ ވަނަ އަށް މަރުވި އަންހެން މީހާ މަރުވެފައި ވަނީ ގޮވާ ތަކެތިން ހަދާފައި ހުރި ވެސްޓެއް އަމިއްލަ އަށް ގޮއްވާލައިގެންނެވެ.
މަރުވި މީހުންނާއި ހައްޔަރު ކުރި މީހުންގެ މައުލޫމާތު ފުރާންސުގެ ކަމާ ބެހޭ ފަރާތްތަކުން އަދި އާއްމު ކޮށްފައި ނުވެ އެވެ.
ފުރާންސުގެ މީޑީއާ އިން ބުނާ ގޮތުގައި ޕެރިހުގެ ފުލުހުން މިއަދު ހެނދުނު ފެށި އެ އޮޕަރޭޝަނުގެ މަގްސަދަކީ ޕެރިހަށް ދިން ހަމަލާތައް ރޭވުމުގައި އެންމެ އިސްދައުރެއް އަދާކުރި ކަމަށް ލަފާ ކުރެވޭ އައިއެސްގެ ހަނގުރާމަވެރިއެއް ކަމަށްވާ އަބްދުލްހާމިދު އަބާއުދު ހައްޔަރު ކުރުމެވެ. މީގެ ކުރިން ފުރާންސުގެ ކަމާ ބެހޭ ފަރާތްތަކުން ބުނި ގޮތުގައި އަބްދުލްހާމިދު އަބާއުދު ޕެރިހަށް ދިން ހަމަލާތައް ރާވާފައި ވަނީ ސީރިޔާގައި ހުރެގެންނެވެ.
ޕެރިހުގެ ބަޓަކްލޭން ކޮންސާޓް ހޯލް އަށް ހަމަލާ ދިނުމަށް ފަހު ފިލާފައިވާ ސަލާހް އަބްދުއްސަލާމް ވެސް ސެއިންޓު ޑެނިސްގެ އެ އެޕާންޓުމެންޓުގައި ހައްޔަރު ވެފައި ހުރި ކަމަށް ލަފާ ކުރެވެ އެވެ.
އެ އޮޕަރޭޝަން ހިންގުމަށް ފުލުހުން ވަދެފައިވާ އެޕާޓުމެންޓުގެ ވަށައިގެންވާ ސަރަހައްދު ފުލުހުން ވަނީ ބަންދުކޮށްފަ އެވެ. ފުރާންސުގެ ރައްޔިތުންގެ މަޖިލީހުގެ މެތިއު ހެނޮޓިން ވިދާޅުވި ގޮތުގައި އެ އެޕާންޓުމެންޓުގައި އަދި ވެސް ހަތިޔާރު އެޅި މީހުން އެބަ ތިއްބެވެ. އެހެންކަމުން ފުލުހުންގެ އޮޕަރޭޝަން ނިމެންދެން ހުރިހާ ރައްޔިތުން ގޭގައި މަޑުކުރުމަށް އޭނާ ވަނީ ވިދާޅުވެފަ އެވެ.
ހަމަލާތައް ބަދަލު ކުރުމުގެ ތެރޭގައި ފުލުހަކާއި އާއްމު މީހަކު ވަނީ ޒަހަމް ވެފަ އެވެ.
މައުލޫމާތު: ރޮއިޓާސް