ވޯލްޑް ކަޕް ކޮލިފައިންގެ ގްރޫޕް ސީގައި މިއަދު ހަވީރު ހޮންކޮންގް އަތުން ރާއްޖެ ބަލިވި ނަމަވެސް ރާއްޖޭގެ ކުޅުންތެރިންގެ ފަރާތުން ފެނުނު ކުޅުމާ ދޭތެރޭ ހިންހަމަ ޖެހޭ ކަމަށް ގައުމީ ޓީމްގެ ކޯޗް ރިކީ ހާބަޓް ބުނެފި އެވެ.
ރަސްމީ ބޯޅަ ދަނޑުގައި މިއަދު ހަވީރު ހޮންކޮންގް އަތުން 0-1 އިން ބަލިވި މެޗަށްފަހު ނޫސްވެރިންނާ ވާހަކަދައްކަމުން ގައުމީ ކޯޗް ހާބަޓް ބުނީ މިއަދު ފެނިގެން ދިޔައީ މޮޅުވުން ހައްގު މެޗެއް ކަމަށެވެ.
"ގިނަ ވަގުތު ބޯޅަ ގެންގުޅު ގިނަ ހަމަލާތައް ވެސް އުފެއްދީ އަހަރެމެންގެ ޓީމު. ކުޅުމާ ދޭތެރޭ ވަރަށް ހިންހަމަ ޖެހޭ. މިއަދު ފެނިގެން މި ދިޔައީ އަހަރެން ކުޅުވަން ބޭނުންވާ ކަހަލަ އެޓޭކިން ފުޓްބޯޅައެއް. އެކަމަކު އަދި ވަގުތު ނަގާނެ މި ކުޅުންތެރިން މި ކަހަލަ އެޓޭކިން ގޭމަކަށް ފިޓްވާން. ކުޅުންތެރިން ވެސް ވަރަށް ބޭނުންވެފައި ތިބީ އެ ކަހަލަ އެޓޭކިން ގޭމެއް ކުޅެން،" ހާބަޓް ބުންޏެވެ.
އިތުރަށް ވާހަކަ ދައްކަމުން ނިއުޒީލޭންޑަށް 2010 ވަނަ އަހަރުގެ ވޯލްޑް ކަޕުގައި ކޯޗުކޮށްދިން ހާބަޓް ބުނީ އަޝްފާގުމެންފަދަ ތަޖުރިބާކާރު ކުޅުންތެރިން ނުލައިވެސް ރާއްޖޭގެ ޓީމު ކުޅުން ދަސްކުރަން ޖެހޭނެ ކަމަށާއި ޒުވާން ކުޅުންތެރިން ލައްވާ ކުޅެން އޭނާ ޖެހިލުން ނުވާ ކަމަށެވެ.
ވޯލްޑް ކަޕް ކޮލިފައިންގައި މިއަދު ރާއްޖޭގަ މައްޗަށް ކުރި ހޯދި މެޗަށް ފަހު ނޫސްވެރިންނާ ވާހަކަ ދައްކަމުން ހޮންކޮންގް ޓީމްގެ ކޯޗް ކިމް ޕަންގޮން ބުނީ ރާއްޖެ އަތުން މި ލިބުނީ ވަރަށް މުހިންމު މޮޅެއް ކަމަށެވެ.
"މެޗަށް ނުކުތްއިރު ވެސް ފަސޭހަ ނުވާނެކަން އެނގޭ. މޫސުން ވެސް އެންމެ ރަނގަޅެއް ނޫން. ދަނޑުގެ ވިނަގަނޑު ވެސް ވަރަށް އުނދަގޫ. މި ހުރިހާ ކަމަކަށް ވިސްނައިގެން ނުކުތީ ރަނގަޅު ރޭވުންތަކަކާ އެކު. މެޗުން މޮޅުވެވުނީ އެ ރޭވުންތަކާ އެއްގޮތަށް ކުޅުންތެރިން މަސައްކަތް ކުރުމުން،" ކިމް ބުންޏެވެ.
އިތުރަށް ވާހަކަ ދައްކަމުން ކިމް ބުނީ، ރާއްޖޭގެ ދެ ފަޅިން ކުޅުނު ދެ ކުޅުންތެރިން ކަމަށްވާ އަހްމަދު ނާޝިދު (ނައްޓޭ) އަދި އަސަދުﷲ އަބްދުﷲ ހިފެހެއްޓުމަށް އުނދަގޫތަކަކާ ކުރިމަތިލާން ޖެހުނު ކަމަށާއި ކެޕްޓަން އަލީ އަޝްފާގު (ދަގަނޑޭ) ހިފެހެއްޓުމަށް ވެސް އުނދަގޫތަކަކާ ކުރިމަތިލާން ޖެހުނު ކަމަށެވެ.
ވޯލްޑްކަޕް ކޮލިފައިންގައި ރާއްޖެ ހިމެނޭ ގުރޫޕް ސީގައި އެއް ވަނާގައި އޮތީ ގަތަރެވެ. 15 ޕޮއިންޓާއެކު އެ ޓީމް އެއް ވަނާގައި އޮތްއިރު ދެ ވަނާގައި ހޮންކޮން އޮތީ 13 ޕެއިންޓާއެކުގަ އެވެ. ތިން ވަނައިގައި ހަތް ޕޮއިންޓާއެކު ޗައިނާ އޮތްއިރު ރާއްޖެ އޮތީ ތިން ޕޮއިންޓާއެކު ހަތަރު ވަނައިގަ އެވެ. ފަސް ވަނައިގައި ޕޮއިންޓެއް ނުލިބި އޮތީ ބޫޓާނެވެ.
ވޯލްޑް ކަޕް ކޮލިފައިންގައި ރާއްޖެ ދެން ކުޅެން ޖެހޭނީ އަންނަ އަހަރުގެ މާޗު މަހުގެ 16 ވަނަ ދުވަހު ރަށުން ބޭރުގައި ޗައިނާއާ ދެކޮޅަށެވެ.