ވޯލްޑްކަޕް ކޮލިފައިންގައި ރާއްޖެއާއި ހޮންކޮން ކުޅުމަށް ހަމަޖެހިފައިވާ މެޗް އަންނަ ބުރާސްފަތި ދުވަހުގެ ހަވީރު 15:50ގައި ކުޅޭ ގޮތަށް އެފްއޭއެމް އިން ހަމަޖައްސައިފި އެވެ.
ގައުމީ ޓީމްގެ ގިނަ މެޗްތައް ރޭނގަޑު ކުޅުނު ކަމުގައިވީ ނަމަވެސް ރާއްޖޭގައި ކުއްލި ނުރައްކަލުގެ ހާލަތު އެއް މަސް ދުވަހަށް އިއުލާންކޮށްފައިވާތީވެ ފީފާގެ އެދުމުގެ މަތިން އެ މެޗް ހަވީރު ކުޅޭ ގޮތަށް އެފްއޭއެމް އިން ވަނީ މިހާރު ނިންމައިފަ އެވެ.
ކުއްލި ހާލަތު އިއުލާންކޮށްފައި ވާތީ މެޗު އެހެން ގައުމަކަށް ބަދަލުކުރަން ހޮންކޮން އިން ވަނީ އެދިފަ އެވެ. އެކަމަކު ފީފާ އިން ވަނީ ބަދަލުނުކުރަން ނިންމައިފަ އެވެ.
ވޯލްޑްކަޕް ކޮލިފައިންގައި ރާއްޖެ އިން ފަސް މެޗު މިހާތަނަށް ކުޅެފައިވާ އިރު، ރާއްޖެ މޮޅުވެފައި ވަނީ ބޫޓާންއާ ދެކޮޅަށް ކުޅުނު މެޗުން އެކަންޏެވެ. ހޮންކޮންއާ ދެކޮޅަށް ކުޅޭ މެޗަކީ ގައުމީ ޓީމުގެ ކޯޗު ރިކީ ހާބަޓްގެ އިރުޝާދުގެ ދަށުން މާލޭގައި ގައުމީ ޓީމު ކުޅޭ ފުރަތަމަ މެޗެވެ.
ރާއްޖެ ހިމެނޭ ގްރޫޕް ސީގެ ހަތަރުވަނައިގައި ތިން ޕޮއިންޓާ އެކީ ރާއްޖެ އޮތްއިރު، މި ގްރޫޕްގެ އެއް ވަނައިގައި 15 ޕޮއިންޓާ އެކީ އޮތީ ގަތަރެވެ. ދެވަނައިގައި 10 ޕޮއިންޓާއެކީ ހޮންކޮންގް އޮތް އިރު، ތިންވަނައިގައި ހަތް ޕޮއިންޓާއެކީ އޮތީ ޗައިނާއެވެ. މި ގްރޫޕްގެ ފުލުގައި ޕޮއިންޓެއް ނުލިބި އޮތީ ބޫޓާން އެވެ.