ހައްޖުގެ އަޅުކަމާއި ގުޅިގެން އައި އުފާވެރި އަޟްހާ އީދުގެ ތަހުނިޔާ މައްކާގައި ހުއްނަވައި ރައީސް ޔާމީން ދިވެހި ރައްޔިތުންނަށް ފޮނުއްވައިފި އެވެ.
ދިވެހި ރައްޔިތުންނަށް އީދުގެ ތަހުނިޔާ ފޮނުއްވައި ރައީސް ޔާމީން ފޮނުއްވި ހިތާބުގައި ވިދާޅުވެފައި ވަނީ ބަރަކާތްތެރި އަޟުޙާ ޢީދު، ބައްދަލުކުރުމުގެ އުފާވެރި މުނާސަބަތުގައި، މައްކާގެ މުޤައްދަސް ބިމުގައި ހުރެ، ދިވެހިރާއްޖޭގެ ލޮބުވެތި އުޚުތުންނަށާއި އަޚުންނަށް، އީދުގެ ތަހުނިޔާ ފޮނުވުމަކީ ލިބޭ އުފަލެއް ކަމަށެވެ.
"ބަރަކާތްތެރި އަޟުޙާ ޢީދު، އަޅުގަނޑުމެންނާ ބައްދަލުކުރުމުގެ އުފާވެރި މުނާސަބަތުގައި، މި މަތިވެރި މުޤައްދަސް ބިމުގައި ހުރެ، ދިވެހިރާއްޖޭގެ ލޮބުވެތި އުޚުތުންނަށާއި އަޚުންނަށް، މި ޢީދުގެ އިޚްލާޞްތެރި ތަހުނިޔާއާއި ހެޔޮއެދުންތައް ފޮނުވުމަކީ، އަޅުގަނޑަށް ލިބޭ ވަރަށް ޚާއްޞަ އުފަލެކެވެ. މި ތަހުނިޔާގައި މިއަހަރު ރާއްޖެއިން ޙައްޖުގެ މަތިވެރި އަޅުކަން އަދާކުރެއްވުމަށް ވަޑައިގެން ތިއްބެވި ހުރިހާ ބޭފުޅުން އަޅުގަނޑާއެކު ބައިވެރިވެވަޑައިގަންނަވައެވެ." ރައީސް ޔާމީންގެ ހިތާބުގައި ވިދާޅުވެފައިވެ އެވެ.
ދިވެހި ރައްޔިތުންގެ އިތުރުން އިސްލާމީ ޤައުމުތަކުގެ ވެރިންނަށާއި، ބައިނަލްއަޤްވާމީ އިސްލާމީ ޖަމްޢިއްޔާ ޖަމާޢަތްތަކުގެ ވެރިންނަށްވެސް ރައީސް ޔާމީން ވަނީ އީދުގެ ތަހުނިޔާ ފޮނުއްވާފަ އެވެ.
ރައީސް ޔާމީން ވިދާޅުވީ އަޟްހާ އީދަކީ މުސްލިމުންގެ މެދުގައި އޮންނަ އުޚުއްވަތްތެރިކަމާއި އެކުވެރިކަން ބަދަހިކުރުމާއި އެކަކު އަނެކަކަށް އެހީތެރިވެދީ، އެންމެންގެ މެދުގައި އެއްބަނޑުއެއްބަފާކަމާއި އަޚުވަންތަކަމުގެ ގުޅުން ޤާއިމުކޮށް ދެމެހެއްޓުމުގެ މުހިންމުކަން ހިތްތަކަށް ގެނެސްދޭ ޢީދެއް ކަމަށެވެ.
"އެހެންކަމުން، މި ޢީދުގެ އުފާވެރިކަން އެންމެންނާ ޙިއްޞާކޮށް، އަޅުގަނޑުމެންގެ މެދުގައި އަޚުވަންތަކަމުގެ ގާތް ގުޅުން އިތުރަށް ބަދަހިކުރުމުގެ ޢަޒުމް އާކުރެއްވުމަށް، އަޅުގަނޑު މި ފުރްޞަތުގައި ރާއްޖޭގެ ރައްޔިތުންނަށް ގޮވާލަން. އަދި މި ޢީދުން ޢިބްރަތް ޙާޞިލު ކުރުމަކީ، އަޅުގަނޑުމެންގެ މައްޗަށް އޮތް ވާޖިބެއްކަން ހަނދާންކުރުމަށްވެސް އަޅުގަނޑު އިލްތިމާސް ކުރަން." ރައީސް ޔާމީންގެ ހިތާބުގައި ވިދާޅޅުވެފައިވެ އެވެ.
އަޟުޙާ ޢީދުގެ މި ބަރަކާތްތެރި ދުވަސްތަކަކީ، ރާއްޖޭގެ ލޮބުވެތި ރައްޔިތުންނަށް ހިތްހަމަޖެހުމާއި އުފާވެރި ދުވަސްތަކެއް ކަމުގައި މާތްﷲ ލެއްވުން އެދި ރައީސް ޔާމީން ވަނީ ދުއާ ކުރައްވާފަ އެވެ.