މީހުން ދިރިއުޅޭ ރަށްތަކުގައި ފަތުރުވެރިން ޗުއްޓީ ހޭދަކުރަން ފެށުމުން ދިވެހިންގެ އާދަކާދަ އާއި ދިވެހިންގެ އީމާންތެރި ކަމަށް އަރައިފާނެ ލޮޅުމަކަށް ވިސްނަން ޖެހޭ ކަމަށް ޝެއިހް އަލީ ޒާހިރު ވިދާޅުވެއްޖެ އެވެ.
ރަމަޟާން މަހުގެ ރޭތައް އިހުޔާ ކުރުމުގެ ގޮތުން އިސްލާމީ މަރުކަޒުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން އަލީ ޒާހިރު ވިދާޅުވީ ޖީބަށް ވަންނަ ކުޑަ ފައިސާ ކޮޅަކުން މުޅި އަހުލާގިއްޔާތު ވެއްޔާ މޮޑެވިގެން ހިނގައިދާނެ ކަމަށެވެ. މިސާލެއްގެ ގޮތުގައި އޭނާ ވިދާޅުވީ "ޖީބަށް ޑޮލަރު ވަންނަން" ފެށުމުން ބައެއް މީހުންނަށް ކަންކަން ހަނދާންނެތޭ ގޮތް މެދުވެރިވާ ކަމަށެވެ.
ދިވެހިންގެ މުޖުތަމައުގައި ހުރި އެފަދަ އަމަލުތައް ގައުމުގެ ޒިންމާދާރު ވެރިން ނުކެމެ އިސްލާހު ކުރުމަށް ޝެއިހް ގޮވާލެއްވި އެވެ.
"ބައެއް މީހުންނަށް ޖީބަށް ޑޮލަރު ވަންނަން ފެށީމާ ބައެއް ކަންކަން ހަނދާންނެތޭ ގޮތް އެބަ ދިމާވޭ. މިއީ ވިސްނަންވެއްޖެ ކަންކަން. އަޅުގަނޑުމެންގެ ގާތަށް އަންނަ ފަތުރުވެރިން ނުވަތަ ބިދޭސީން ޣައިރު މުސްލިމުން އެ މީހުން އައިސް އުޅޭއިރު މިހާރު ދިރިއުޅުމަށް އަޅުގަނޑުމެންގެ ކަންކަން ބަދަލުވެގެން ދިޔަ ގޮތަށް ގޮސް އަޅުގަނޑުމެން އާންމުން ދިރިއުޅޭ ރަށްރަށުގައި އެ މީހުން މިހާރު ދިރިއުޅެމުން އެބަދޭ. ނުވަތަ އެ މީހުން ޗުއްޓީ ހަދަމުން އެބަދޭ،" ގައުމީ ޔުނިވާސިޓީގެ ފެކަލްޓީ އޮފް އިސްލާމިކް ސްޓަޑީޒްގެ، ޑީން، އަލީ ޒާހިރު ވިދާޅުވި އެވެ.
ފިޤުހާއި އުސޫލުފިޤްހުން މާސްޓާސް ހައްދަވާފައިވާ ޝެއިހް ވިދާޅުވީ އެފަދަ އަމަލުތަކުގެ ސަބަބުން ދިވެހިންގެ އާދަކާދައާ ދިވެހިންގެ އީމާންތެރިކަމަށް އަރައިފާނެ ލޮޅުމަކަށް ވިސްނަން ޖެހޭ ކަމަށެވެ. އަދި ވިދާޅުވީ ހަރުދަނާ އުސޫލުތަކަކާ ގަވާއިދުތަކެއް ކަމާ ގުޅޭ މުއައްސަސާތަކުން ހަދަންޖެހޭ ކަމަށެވެ.
ޝެއިހު ވިދާޅުވީ ރަމަޟާން މަހަކީ އެފަދަ ކަންކަން ނުކުރުމަށް އަޒުމް ކަނޑައަޅަންޖެހޭ ދުވަސްވަރު ކަމަށެވެ. އޭނާ ވަނީ ހެޔޮ ކަން ކަމަށް ވަނުމަށް ލިބިފައިވާ ފުރުސަތުގެ ބޭނުން ހެޔޮ ގޮތުގައި ހިފުމަށް އެންމެހާ ރައްޔިތުންނަށް ގޮވާލާފަ އެވެ.
"ހަރާމު ތަކެތި އަޅުގަނޑުމެން ބޭނުން ކުރަން ފަށައިފި ނަމަ ބަރަކާތް ގެއްލިގެން ދާނެ. އަޅުގަނޑުމެންގެ ތެރެއިން މީހުންގެ ވިސްނުމާއި ފިކުރު ކޮށިވެގެން ދާނެ. މީހުންނަށް ލިބިފައިވާ މުދަލުގެ ބަރަކާތް ކެނޑި ބަލި މަޑު ކަމާއި ތަދު މަޑުކަން އެތަނުގައި އާންމު ވެގެން ހިނގައިދާނެ. އެހެންވީމަ އަޅުގަނޑުމެންގެ އުސޫލުތަކާ ދިރިއުޅުން މުޅިން އެއްކޮށް ﷲ ސުބުހާނަހޫ ވަތައާލާގެ ދީނުގައިވާ ގޮތަށް އަޅުގަނޑުމެން އެކަންކަން ލަންބާ ހިފަހައްޓަން ޖެހޭ،" މަދީނާގެ އިސްލާމިކް ޔުނިވާސިޓީ އާއި މެލޭޝިޔާގެ އިސްލާމިކް ޔުނިވާސިޓީން ކިޔަވާ ވިދާޅުވި ޝެއިހު ވިދާޅުވި އެވެ.
ޝެއިހު އަލީ ޒާހިރު ވަނީ މިރޭގެ ޖަލްސާގައި ވިޔަފާރި ކުރައްވާ ފަރާތްތަކަށް ތެދުވެރި ކަމާއި އަމާނާތްތެރި ކަމާއެކީ ކަންކަން ކުރުމަށް ވެސް އިލްތިމާސް ކުރައްވާފަ އެވެ.