މައްޗަންގޮޅި ގުލާލާ ގޯޅި އާއި އެނބޫ ގޯޅި އަށް ދުއްވާ އުޅަނދު ނުވަދެވޭ ގޮތަށް ބަންދު ކުރަން ނޯޓިސް ބަހައްޓައިފި އެވެ.
މިއަދު 3:00 ގެ ފަހުން އެ ދެ ގޯޅީގައި ޕާކު ކުރުން މަނާކޮށް، އެތަނުގައި ހުރި އުޅަނދުތައް ނެގުމަށް ފުލުހުން ވަނީ އެ ސަރަހައްދުގައި ނޯޓިސް ބަހައްޓާފަ އެވެ. އަދި އެ ދެ ގޯޅީގައި ޕާކުކޮށްފައި ހުރި އުޅަނދުތައް ނަގަންޖެހޭ މުއްދަތުގައި ނުނަގައިފިނަމަ، އެތަނުގައި ހުރި އުޅަނދުތައް ކައިރީގައި ހުރި ޕާކިން ޒޯންތަކަށް ބަދަލު ކުރާނެ ކަމަށް ފުލުހުން ވަނީ ބުނެފަ އެވެ.
މއ. ދަގަނޑުކެނޑިގެ ހުންނަ މައްޗަންގޮޅި ގުލާލާ ގޯޅި އާއި އެނބޫ ގޯޅިއަށް ދުއްވާ އެއްޗެއްސަށް ނުވަދެވޭ ގޮތަށް ބަންދު ކުރަން ނިންމާފައިވާއިރު، އެ ސަރަހައްދުގެ ގެތަކުގައި ދިރިއުޅޭ މީހުންގެ އުޅަނދުތައް ޕާކު ކުރުމަށް ހައުސިން މިނިސްޓްރީން ވަނީ ޕާކިން ޒޯނެއް ހަދާފަ އެވެ. އެ ޕާކިން ޒޯން ހަދާފައި ވަނީ މައްޗަންގޮޅީ ސަރަހަރާގެ ހުޅަނގުފަރާތުން ބައެއް ނެގުމަށްފަހު އެވެ.
ރައްޔިތުންނަށް ހިތް ފަސޭހަ ތަނަކަށް މާލެ ހެދުމަށް ހިންގާ މަޝްރޫއުތަކުގެ ދަށުން ހެންވޭރު ރަތްވިލާމަގާއި ހީނާގޯޅި މިދިޔަ ފެބްރުއަރީ މަހުގެ ތެރޭގައި ހައުސިން މިނިސްޓްރީން ބަންދު ކުރި އެވެ. ނަމަވެސް ފަހުން މިނިސްޓްރީން ވަނީ ނުވަދެވޭ ގޮތަށް ބަންދުކުރި ގޯޅިތަކުގައި ޖަހާފައި ހުރި ދަގަނޑުތައް ނަގާފަ އެވެ.
ހައުސިން މިނިސްޓުރީން ބަންދުކޮށްފައިވާ "ގުލާލާ" ގޯޅީގައި ނޯޓިސް ހަރުކޮށްފައި: ސަން ފޮޓޯ/ ފަޔާޒު މޫސާ