ބައިނަލްއަގުވާމީ ފޮތުގެ ދުވަހާ ގުޅުވައިގެން ގައުމީ ކުތުބު ޚާނާގެ މުވައްޒަފުންނަށް ހާއްސަކޮށްގެން އެ ކުތުބު ޚާނާއިން ކުރިއަށް ގެންދިޔަ "ބިގް ބުކްސް ކޮމްޕެޓިޝަން"ގެ އެއްވަނައަށް "ކައި ބިގްބުކް އޮފް ފައިވް ސެންސަސް" ހޮވިއްޖެއެވެ.
އެކަން އިއުލާނުކޮށްފައި ވަނީ މިރޭ ގައުމީ ކުތުބު ޚާނާގައި އެކަމަށްޓަކައި ބޭއްވި ހާއްސަ ރަސްމިއްޔާތެއްގައެވެ.
އެ މުބާރާތަކީ ގައުމީ ލައިބްރަރީގެ މުވައްޒަފުންގެ ހުނަރު ދައްކާލުމަށް އެ ކުތުބު ޚާނާއިން އިންތިޒާމުކޮށްގެން ކުރިއަށްގެންދިޔަ މުބާރާތެކެވެ.
އެއްވަނައަށް ހޮވުނު ފޮތް އުފެއްދި މަރިޔަމް މަހާ އަބްދުލް ސަމަދު "ސަން" އަށް ބުނީ އޭނާ އެފޮތް ތައްޔާރުކޮށްފައި ވަނީ އުމުރުން ހަތަރު އަހަރާ ހަ އަހަރާ ދެމެދުގެ ކުދިންނަށް ހާއްސަކޮށްގެން، އެއްފޮތަކުން އެކުދިންނަށް ބޭނުންވާ ގިނަ މައުލޫމާތުތަކެއް ލިބޭގޮތަށް ބެލުމަށްފަހު ކަމަށެވެ.
މުބާރާތުގެ އެއްވަނައަށް ހޮވުނު "ކައި ބިގްބުކް އޮފް ފައިވް ސެންސަސް"
"މި ފޮތުގައި ހިމެނޭނެ ބައިވަރު ކޮންސެޕްޓްސް. އޭގެ ތެރޭގައި ކަލަރ ޝޭޕްސް، ހަފްތާގެ ހަތް ދުވަހާ ބެހޭ މައުލޫމާތު، ޖަނަވާރު ތަކާ ބެހޭ ބައެއް މައުލޫމާތު، އަދި އިންސާނާގެ ފަސް ހިއްސާ ބެހޭގޮތުން މައުލޫމާތު ހުންނާނެ،" މައި ކޮލެޖްގައި އާރލީ ޗައިލްޑްހޫޑް އެޑިއުކޭޝަން ކިޔަވަމުން އަންނަ އުމުރުން 21 އަހަރުގެ މަހާ ބުންޏެވެ.
ޖުމްލަ 14 މުވައްޒަފުން ބައިވެރިވެ، 10 ހުށަހެޅުން ހުށަހަޅާފައިވާ އެ މުބާރާތުގެ ދެވަނައަށް ހޮވިފައި ވަނީ "އަލިގަދަ ފިޔަ" ނަމަކަށް ކިޔާ ފޮތެކެވެ. ތިންވަނައަށް ހޮވިފައި ވަނީ "އެހީތެރި ސްޓޯބެރީ" ނަމަކަށް ކިޔާ ފޮތެކެވެ.