ފެނަކައިން ކަރަންޓް ބިލުތަކަށް ނަގާ އަގަށް ބަދަލު ގެނައުމަކީ މި ސަރުކާރުން ކަރަންޓު ބިލުގެ އަގު ބޮޑުކުރުން ނޫން ކަމަށާއި އެއީ ކަރަންޓު ބިލުގެ އަގު ހަމަމަގަށް ގެނައުން ކަމަށް ފެނެކަ ކޯޕަރޭޝަނުން ބުނެފި އެވެ.
ކަރަންޓް ބިލު ބޮޑުވެގެން ކުޅުދުއްފުއްޓާއި އައްޑޫގެ އިތުރުން ބައެއް އެހެން ރަށްރަށުގައި ވެސް އިހްތިޖާޖު ކުރަމުންދާއިރު، ފެނަކައިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކޯޕަރޭޝަންގެ ޑިރެކްޓަރު ހުސައިން ހަމީޒު ވިދާޅުވީ މި ސަރުކާރުން ކަރަންޓް ބިލުގެ އަގަށް އެއްވެސް ބަދަލެއް ނުގެންނަ ކަމަށެވެ. މިހާރު ތަންފީޒު ކުރަމުންދާ އުސޫލަކީ ރައީސް ނަޝީދުގެ ސަރުކާރުން ކަނޑައެޅި އަގުތަކެއް ކަމަށާއި އޭރު ފާސްކޮށްފައިވާ އަގުތަކަށް ބިލުނުކޮށް އެކި ރަށްރަށުގައި ތަފާތު އަގުތަކުގައި ދެމުން ދިޔަ ސަބްސިޑީ މިހާރު ހަމަހަމަކޮށްފައިވާ ކަމަށް އޭނާ ވިދާޅުވި އެވެ.
"ހަމައެކަނި އަޅުގަނޑުމެން ގެނައި ބަދަލަކީ ފާސްކޮށްފައިހުރި ރޭޓަށް ހަމަމަގަށް އެޅުވުން،" ހަމީޒު ވިދާޅުވި އެވެ.
އަލަށް ގެނެވުނު ބަދަލާއެކު އެ ކުންފުންޏަށް ލިބޭނެ ނަފައެއް ނޯންނާނެ ކަމަށާއި އެ ބަދަލާއެކު އަންނާނެ ތަފާތަކީ މީގެ ކުރިން ސަރުކާރުން ދައްކަމުން އައި ސަބްސިޑީ ވިޔަފާރިވެރިން ދައްކަން ޖެހުން ކަމަށް އޭނާ ވިދާޅުވި އެވެ.
ފެނަކަ ކޯޕަރޭޝަންގެ މެނޭޖަރު އަހުމަދު ނަޖާހު ވިދާޅުވީ އަލަށް ގެނެވުނު ބަދަލަކީ ވިޔަފާރިތަކަށް ނަގާ ކަރަންޓު ބިލުގެ އަގު ހަމަހަމަ ކުރުން ކަމަށެވެ. އަލަށް ގެނެވުނު އެ ބަދަލާއެކު ކަރަންޓު ބިލުގެ ރޭޓު ވަރަށް ބޮޑަށް މަތިވެފައި ވަނީ 2009 ވަނަ އަހަރު ފާސްކޮށްދީފައިވާ ރޭޓުތަކާ ޚިލާފަށް ބިލް ކުރަމުން ދިޔަ ތަންތަނަށް އެކަނި ކަމަށް ވެސް އޭނާ ވިދާޅުވި އެވެ.
"އެންމެ ބޮޑެތި ބަދަލުތަކެއް މި އައީ 2009 ވަނަ އަހަރު ފާސްކޮށްދީފައިވާ ރޭޓްތަކާ ޚިލާފަށް ބިލް ކުރަމުން ދިޔަ ތަންތަނަށް،" ނަޖާހު ވިދާޅުވި އެވެ.
ކުޅުދުއްފުށީ ވިޔަފާރިތަކުގެ ކަރަންޓު ބިލް ބޮޑުވި ސަބަބު ވެސް ނަޖާހު ވަނީ އޮޅުންފިލުވައިދީފަ އެވެ.
އޭނާ ވިދާޅުވީ، އެރަށުގެ ވިޔަފާރިތަކުން ކަރަންޓު ޔުނިޓަކަށް ނެގުމަށް ފާސްކޮށްފައި ވަނީ 7.50 ކަމަށެވެ. ނަމަވެސް އެ ރޭޓުގެ ބަދަލުގައި މިހާތަނަށް އެ ރަށުގެ ވިޔަފާރިތަކުން ކަރަންޓު ޔުނިޓަކަށް ނަގަމުން ގޮސްފައި ވަނީ 2.75 ރުފިޔާ ކަމަށާއި ހަގީގަތުގައި ބިލް ތައްޔާރުކުރަން ޖެހެނީ 7.50 ރުފިޔާގެ ރޭޓުން ކަމަށްވާތީ އެގޮތަށް އަމަލުކުރަން އެ ކޯޕަރޭޝަނުން ފަށާފައިވާ ކަމަށެވެ.
ހަތަރު ސަތޭކަ ޔުނިޓަށް ވުރެ މައްޗަށް ސަބްސިޑީ ދިނުމަށް އުސޫލުގައި ނެތް ނަމަވެސް މީގެ ކުރިން ކުޅުދުއްފުށީގައި 400 ޔުނިޓަށްވުރެ މަތިވުމުން ވެސް ސަބްސިޑީ ދެމުން ދިޔަ ކަމަށް ނަޖާހު ވިދާޅުވި އެވެ.
އޭނާ ވިދާޅުވީ 1000 ޔުނިޓުގެ ކަރަންޓު ބިލަކުން ކުޅުދުއްފިށިން ކުރިއާ ޚިލާފަށް މިހާރު ބޮޑުވެފައި ވަނީ 5000 ރުފިޔާ ކަމަށްވާއިރު، ހއ. އަތޮޅާއި ހދ، އަތޮޅުގެ އިތުރުން ށ. އަތޮޅާއި ގއ. އަތޮޅާއި ގދ. އަތޮޅުން އެވަރުގެ ބިލްތަކަށް ބޮޑުވެފައި ވަނީ 4،800 ރުފިޔާ ކަމަށެވެ. އެވަރުގެ ކަރަންޓު ބިލަކުން އައްޑޫގައި ބޮޑުވެފައި ވަނީ 2080 ރުފިޔާގެ ކަމަށް ވެސް އޭނާ ވިދާޅުވި އެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނިމާލު ވިދާޅުވީ ސަރުކާރުން ސަބްސިޑީއަށް އެތައް ޚަރަދުތަކެއް ކުރާއިރު، ސަބްސިޑީއަށް ބޮޑު ޚަރަދެއް ކުރުމަކީ އެއްވެސް ސަރުކާރަކަށް ކުރެވޭނެ ކަމެއް ނޫން ކަމަށެވެ. އަދި މިދިޔަ އަހަރު ވެސް 600 މިލިއަން ރުފިޔާ ސަބްސިޑީ ދިނުމަށް ސަރުކާރުން އެ ކޯޕަރޭޝަނަށް ދޫކޮށްފައިވާ ކަމަށް ވެސް ނިމާލް ވިދާޅުވި އެވެ.
ސަރުކާރުގެ ފަރާތުން ވިޔަފާރިތަކަށް ސަބްސިޑީ ދޭ އިރު އަގު ހެޔޮކޮށް މުދާ ވެސް ލިބެންޖެހޭ ކަމަށާއި ނަމަވެސް ތަކެތީގެ އަގު ހެޔޮނުވާތީ އެކަން ދެކޮޅު ނުޖެހޭ ކަމަށް ނިމާލު ވިދާޅުވި އެވެ.
ފެނަކަ ކޯޕަރޭޝަނުން ޖުމުލަ 46،590 މީޓަރަށް ކަރަންޓު ދޭއިރު އޭގެ ތެރެއިން 5،765 މީޓަރަކީ ވިޔަފާރިތަކެވެ.