ވިޔަފާރިންގެ ނަމުގައި ރަޖިސްޓްރީކޮށްފައިވާ ތަންތަނަށް ދެމުންގެންދިޔަ ސަބްސިޑީތައް ކަނޑާލުމާ ގުޅިގެން ހދ. ކުޅުދުއްފުށީގެ ވިޔަފާރިވެރިން ފިހާރަތައް ބަންދުކޮށް މުޒާހަރާކޮށްފި އެވެ.
ކުޅުދުއްފުށިން ވާހަކަ ދެއްކި ވިޔަފާރިވެރިއަކު ބުނީ ސަރުކާރުން ވިޔަފާރިތަކަށް ދެމުންގެންދިޔަ ސަބްސިޑީ ކަނޑާލުމާ ގުޅިގެން ކުރިން 2،500ރ. އަރާ ކަރަންޓް ބިލުތަކަށް މި މަހުގެ ބިލު އައިރު އަރާފައި ވަނީ 7،500ރ. ކަމަށެވެ. އަދި އެކަމާ ހިތްހަމަނުޖެހުމާއި ގުޅިގެން މިއަދު ހުރިހާ ފިހާރަތައް ބަންދުކުރީ ކަމަށް ވެސް އޭނާ ބުންޏެވެ.
ކުޅުދުއްފުށީ ކައުންސިލްގެ ނައިބު ރައީސް މުހައްމަދު އައިމަން ވިދާޅުވީ އާންމު ފަރާތްތަކުން ކުރަމުން އަންނަ ވިޔަފާރިތައް ބަންދު ކުރުމަށްފަހު ކައުންސިލް ދޮށަށް އެއްވެ މީހުން މުޒާހަރާ ކުރަމުން އަންނަ ކަމަށެވެ. އޭނާ ވިދާޅުވީ ސަބްސިޑީ މައްސަލައާ ގުޅިގެން އެ ރަށުގައި އާންމު ފަރާތްތަކުން ކުރަމުން އަންނަ 200 އެއްހާ ފިހާރަތައް މިއަދު ބަންދުކޮށްފައިވާ ކަމަށެވެ.
ސަރުކާރުން ވިޔަފާރިތަކަށް ދޫކުރާ ކަރަންޓް ސަބްސިޑީ ހުއްޓާލާފައިވާއިރު، އެ ރަށުގެ ވިޔަފާރި ވެރިންގެ އަތުން ކަރަންޓު ޔުނިޓަކަށް 7.50ރ. ނަގައެވެ. ނަމަވެސް މާލޭގައި އެ ރޭޓް އުޅެނީ ހަތަރު ރުފިޔާ އަށެވެ.
މިދިޔަ މަހު އެންސްޕާ އިން އާންމުކޮށް ގެޒެޓުކޮށްފައިވާ އިއުލާނެއްގައި ބުނެފައި ވަނީ މާޗް އެއް ވަނަ ދުވަހުން ފެށިގެން ކަރަންޓް ސަބްސިޑީ ނުލިބޭނެ ކަމަށާއި ޑޮމެސްޓިކް މީޓަރުތައް ބޭނުންކޮށްގެން ވިޔަފާރިކުރާ ފަރާތްތައް ވިޔަފާރި މީޓަރަށް ބަދަލުކުރަން އަންގާ ކަމަށެވެ.