ސައޫދީން ޔަމަނަށް ދޭ ހަމަލާތަކަށް ތާއީދު ކުރަމުން އަރަބި ސަމިޓް ނިންމާލައިފި

ޝަރްމުއްޝައިޚް (މާޗް 29): މިސްރުގެ ޝަރްމުއްޝައިޚްގައި އިއްޔެ ފެށުނު އަރަބި ގައުމުތަކުގެ އިސްވެރިންގެ ސަމިޓް ރޭ އިރާކޮޅުގެ ވަގުތެއްގައި ނިމިއްޖެ އެވެ.

އަރަބި 22 ގައުމުގެ ތެރޭން 14 ގައުމެއްގެ އެންމެ އިސްވެރިން ބައިވެރިވެ ވަޑައިގެންނެވި މިސަމިޓުން ނެރުނު ގުޅިފައިވާ ބަޔާނުގައި ޔަމަންގެ ހޫޘީ ޖަމާއަތަށް ގޮވާލާފައިވަނީ ހަތިޔާރު ބެހެއްޓުމަށްފަހު އެގައުމުގެ ވެރިރަށް ސަންޢާއިން ފޭބުމަށާއި ޔަމަންގެ ސަރުކާރާއި ސިޔާސީ އެހެން ފަރާތްތަކާއެކު ސުލްޙައިގެ ވާހަކަތަކުގައި ބައިވެރިވުމަށެވެ. ޝަރްމުއްޝައިޚްގެ ސަމިޓަކީ އަރަބި ގައުމުތަކުގެ އިސްވެރިންގެ 26 ވަނަ ސަމިޓެވެ.

މިސަމިޓްގައި 7 ގައުމަކުން ބައިވެރިވެވަޑައިގެންފައިވަނީ އެންމެ އިސްވެރިންނަށްވުރެ ދަށުފެންވަރުގެ މަސްއޫލުވެރިންނެވެ. ސޫރިޔާގެ ގޮނޑި ސަމިޓްގައި ހުރީ ހުހަށެވެ. ސަމިޓްގެ ބަޔާނުގައި ސައޫދީ އަރަބިޔާ އިސްކޮށް އޮވެގެން ހޫޘީންނާ ދެކޮޅަށް ދެމުންގެންދާ ވައިގެ ޙަމަލާތަކަށް ތާއީދުކުރާކަންވެސް ހާމަކޮށްފައިވެއެވެ.

މީގެއިތުރުން އަރަބި ގައުމުތަކަށް ކުރިމަތިވާ އަމަނާބެހޭ މައްސަލަތަކާ ކުރިމަތިލުމަށްޓަކައި އަރަބި ގައުމުތަކުގެ ގުޅިފައިވާ ބާރެއް އެކުލަވާލުމަށް މިސްރުގެ ރައީސް އަބްދުލްފައްތާޙް އައްސީސީ ހުށަހެޅުއްވި ހުށަހެޅުންވެސް އަރަބި ސަމިޓުން އިގްރާރުކޮށް ތަންފީޒުކުރަންޖެހޭ ނިންމުމެއްގެ ގޮތުގައި އެކަށައަޅާފައިވެއެވެ.

ފަލަސްތީނުގެ މައްސަލާގައި އަރަބި ސަމިޓުން ނިންމާފައިވަނީ އަންނަ އެޕްރީލް މަހުން ފެށިގެން އެއްއަހަރު ވަންދެން ކޮންމެ މަހަކުވެސް ފަލަސްތީނުގެ ސަރުކާރަށް މާލީ އެހީ ދެމުން ގެންދިޔުމަށާއި ފަލަސްތީނުގެ މައްސަލައިގައި އދ. ން ފާސްކޮށްފައިވާ ހުރިހާ ގަރާރުތަކަށް ބޯލެނބުމަށާއި ފަލަސްތީނުގެ ބިންތަކުން ފޭބުމަށް އިސްރާއީލަށް ގޮވާލުމެވެ. މިއީ ވަރަށް ބަލިކަށި ނިންމުމެއް ކަމަށް ފަލަސްތީނުގެ މުޖާހިދުންގެ ބައެއް ޖަމާއަތްތަކުންވަނީ ސިފަކޮށްފައެވެ.

ޔަމަންގެ ހޫޘީންފަދަ ކުދިކުދި އަދި ބަލިކަށި ޖަމާއަތްތަކާ ދެކޮޅަށް ހަރުކަށި ނިންމުންތައް ނިންމި ނަމަވެސް ފަލަސްތީނުގެ ހުރިހާ ބިންތަކާއި މާތްވެގެންވާ މަސްޖިދުލްއަގްސާ ހިފައިގެން އުޅޭ އަނިޔާވެރި އިސްރާއީލާ ދެކޮޅަށް ބާރުގަދަ ނިންމުމެއް ނިންމުމަށް އަރަބި ވެރިންވަނީ ނުކުޅެދިފައެވެ. މީގެއިތުރުން އަރަބި ސަމިޓުން ނިންމާ ގިނަ ނިންމުންތަކަކީ ތަންފީޒު ނުކުރެވޭ އަދި ހަމައެކަނި ލިޔުމެއްގެ ގޮތުގައި އޮންނަ ނިންމުންތަކެއް ކަމަށް އަލްޖަޒީރާއިންވަނީ ސިފަކޮށްފައެވެ. (އަލްޖަޒީރާ)