ތުޅާދޫން ކަރަންޓު ކެނޑިއްޖެ

ބ. ތުޅާދޫ އިންޖީނުގޭ ޕެނަލް ބޯޑުގެ ނަރެއް އެނދުމުގެ ސަބަބުން އެރަށުން ކަރަންޓް ކެނޑިއްޖެ އެވެ.

ތުޅާދޫ ކައުންސިލްގެ ރައީސް އަހުމަދު އަބްދުއްރަހީމް މިރޭ ސަން އަށް ވިދާޅުވީ، މިއަދު އިރުއޮއްސި 6:50 ކަންހާއިރު އެރަށުން ކަރަންޓު ދިޔަ ގޮތަށް އަދި ކަރަންޓް ނުލިބޭ ކަމަށެވެ. ކަރަންޓު ދިޔައީ ޕެނަލް ބޯޑަށް ދިމާވި މައްސަލައަކާ ގުޅިގެން ކަމަށް އޭނާ ވިދާޅުވި އެވެ.

"ޕެނަލްބޯޑުގެ ނަރެއް ހޫނުވެގެން އޭގެ ދާފަރާ ވިރުނީ. އިންޖީނުގޭ ޑިއުޓީގައި ތިބި ކުދިން އެވަގުތު ވަނީ އިންޖީނުތައް ނިއްވާލާފައި. އޭގެ ފަހުން އަދި ކަރަންޓެއް ނުލިބޭ،" އަބްދުއްރަހީމް ވިިދާޅުވި އެވެ.

އިންޖީނުގޭގައި މަސައްކަތްކުރާ އިސްމާއިލް ރަޝީދު ބުނީ، އޭދަފުށިން މީހުންގެނެސްގެން އިންޖީނުގެއަށް ދިމާވި އެ މައްސަލަ ހައްލުކުރުމުގެ މަސައްކަތް ކުރަމުންދާކަމަށާއި ކުރިއަށް އޮތް ގަޑިއެއްހާއިރު ތެރޭގައި ކަރަންޓު ދެވޭނެ ކަމަށް ގަބޫލު ކުރެވޭ ކަމަށެވެ.

ތުޅާދޫ އިންޖީނުގޭގައި ކަރަންޓް ދިނުމަށް ބޭނުން ކުރަނީ 300 ވޯޓްއާއި 250 ވޯޓްގެ ދެ އިންޖީނެވެ.

ތުޅާދޫގެ އާބާދީގައި 2000 އަށްވުރެ ގިނަ ނަމަވެސް އެރަށުގައި މިހާރު ދިރިއުޅެނީ ގާތްގަނޑަކަށް 1800 އެއްހާ މީހުންނެވެ.