އުރީދޫއިން 4ޖީ އެލްޓީއީ ނެޓްވޯކާއެކު ސެމްސަންގްގެ ދެ ފޯނެއް ތައާރަފްކޮށްފި

ރާއްޖޭގައި ސެމްސަންގު ފޯނުތަކަށް 4ޖީ ދޫކުރާ ކުންފުންޏަކަށް އުރީދޫ ހަމަޖައްސައި 4ޖީ އެލްޓީއީ ނެޓްވޯކާއެކު ސެމްސަންގް ބްރޭންޑުގެ ދެ ފޯނެއް އުރީދޫ އިން މިއަދު ތައާރަފްކޮށްފި އެވެ.

4ޖީ އެލްޓީއީ ނެޓްވޯކާއެކު އުރީދޫ އިން މިއަދު ތައާރަފްކޮށްފައި ވަނީ ސެމްސަންގު ބްރޭންޑްގެ އެންމެ ފަހުގެ ދެ މޮޑެލް ކަމަށްވާ ސެމްސަންގް ގެލެކްސީ އެސް5 އާއި ސެމްސަންގް ގެލެކްސީ ކޯ އެލްޓީއީ އެވެ. އެކަމަށްޓަކައި ޓްރޭޑާސް ހޮޓެލްގައި މިއަދު ބޭއްވި ރަސްމިއްޔާތެއްގައި އެ ދެ ފޯނު ތައާރަފްކޮށް ދެއްވީ އުރީދޫގެ ސީއީސޯ ވިކްރަމް ސިންހަ އާއި ސެމްސަންގް އިންޑިއާ އިލެކްޓްރޯނިކްސް ސްރީލަންކާގެ މެނޭޖިންގ ޑިރެކްޓަރު އެޗްކޭ ޗެންގެވެ.

އުރީދޫ އިން ބުނީ އެ ދެ މޮޑެލް ވެސް އޮރިޖިނަލް ފޯނުތައް މިއަދުން ފެށިގެން އުރީދޫގެ ފިހާރަތަކުންނާއި ސެމްސަންގްގެ ރާއްޖޭގެ އޮތޮރައިޒް ޑިސްޓްރިބިއުޓާ ހައިކް އިން ލިބެން ހުންނާނެ ކަމަށާއި ސެމްސަންގާއެކު ވެފައިވާ އެ އެއްބަސްވުމުގެ ދަށުން އެ ދެ ޑިވައިސް ވެސް މިހާރު އުރީދޫގެ ސުޕަފާސްޓް 4ޖީ ނެޓްވޯކްގައި ބޭނުންކުރެވޭނެ ކަމަށެވެ. އަދި އެ ދެ ފޯނާއެކު އުރީދޫއިން ސެމްސަންގް ޑިވައިސްތަކަށް ހާއްސަ ޕެކޭޖެއް ލިބޭނެ ކަމަށް ވެސް އުރީދޫ އިން ބުނެ އެވެ.

އެގޮތުން ސެންސަންގް ގެލެކްސީ ކޯ އެލްޓީއީ ފޯނު މިހާރު އުރީދޫ ޕޯސްޓްޕެއިޑްގެ ތިން މަހުގެ ކޮންޓްރެކްޓެއްގެ ދަށުން ބައްލަވައިގަންނަވާއިރު އެންމެ 2823 ރުފިޔާ އަށް ލިބޭނެ ކަމަށާއި އެއާއެކު އުރީދޫ ޕޯސްޓްޕެއިޑް ޕެކޭޖާއިއެކު 2ޖީބީ ޑޭޓާ އެލަވަންސް ލިބޭނެކަމަށް އުރީދޫއިން ބުނެ އެވެ. އަދި ލޯކަލް ކޯލްއާއި އެސްއެމްއެސް ހިލޭ ކުރެވޭއިރު ބޮޑަތި އައިޑީޑީ ޑިސްކައުންޓްތަށް ލިބޭނެކަމަށް އުރީދޫ އިން ބުނެ އެވެ. އޭގެ އިތުރުން އެސް5 އާއެކު އުރީދޫ ޕޯސްޓްޕެއިޑް ޕްލެޓިނަމް ޕެކޭޖާއިއެކު 12826 ރުފިޔާ އަށް ލިބޭނެ ކަމަށާއި ފުރަތަމަ މަހުފީ ކަމަށްވާ 999 ރުފިޔާ އަލަށް ނަގާ ކަނެކްޝަން ތަކުން ނުނަގާނެ ކަމަށް ވެސް އުރީދޫ އިން ބުނެ އެވެ.

"ރާއްޖޭގައި ސެމްސަންގް މޯބައިލްގެ ހަމައެކަނި އޮޕަރޭޓަރަށް އުރީދޫ ވުމަކީ އަޅުގަނޑުމެން ވަރަށް ފަހުރުވެރިވާ ކަމެއް. އަދި މިހާރު ސެމްސަންގްއާއެކު ވެފައިވާ އެއްބަސްވުމުން ވެސް ދައްކުވައިދެނީ އަޅުގަނޑުމެންގެ އެޑްވާންސް ނެޓްވޯކްގެ ވަރުގަދަކަން، އަދި މިއީ އަޅުގަނޑުމެންގެ ކަސްޓަމަރުންނަށް ސުޕަފާސްޓް ފޯޖީ ނެޓްވޯކް އެންމެ ފުރިހަމަ ޑިވައިސްތަކުގައި ތަޖުރިބާކޮށްލުމަށް ލިބުނު ރަނގަޅު ފުރުސަތެއް،" އުރީދޫގެ ސީއީއޯ ވިދާޅުވި އެވެ.

ސެމްސަންގް އިންޑިއާ އިލެކްޓްރޯނިކްސް ސްރީލަންކާގެ މެނޭޖިން ޑިރެކްޓަރު އެޗްކޭ ޗެންގް ވިދާޅުވީ އެ ސެމްސަންގް ގެ އުފެއްދުންތަށް 4ޖީ އެލްޓީއީ ބޭނުންކޮށްގެން އޭގެ އެންމެ ފުރިހަމަކަންމަތީ ބޭނުން ކުރެވޭނެ ކަމުގެ ޔަގީންކަން ހުރިހާ ކަސްޓަމަރުންނަށް އަރުވާ ކަމަށާއި ސެމްސަންގް ކަސްޓަމަރުންނަށް ރާއްޖެއިން ބޭރުގައި ސެމްސަންގް ޚިދުމަތް ހޯދާ ފަރާތްތަކާ އެއް ފެންވަރަށް ޚިދުމަތްތައް ލިބިގެންދާނެ ކަމުގެ ޔަގީންކަން ވެސް އަރުވާ ކަމަށެވެ.

އުރީދޫއިން ސެމްސަންގާއެކު ވެފައިވާ އެ އެއްބަސްވުމުގެ ދަށުން އުރީދޫ އާއި ހައިކް މެދުވެރިކޮށް ރާއްޖޭގައި ސެމްސަންގް ކަސްޓަމަރުންނަށް އިތުރު ފުރިހަމަކަމާ އެކީ ޚިދުމަތް ދިނުމަށް ސެމްސަންގަށް ފުރުސަތު ލިބިގެންދާ އިރު އުރީދޫ އަކީ ރާއްޖޭގައި ސެމްސަންގް ފޯނުތަކަށް 4ޖީ އެލްޓީއީ ހިދުމަތްދޭ ހަމައެކަނި ނެޓްވޯކެވެ.