ޔަންމާޓް ނިއުކާސަލްއަށް ސޮއިކޮށްފި

ފެޔެނޫޑްގެ ނެދަލެންޑްސް ފުލް ބެކް ޑެރީލް ޔަންމާޓް، ނިއުކާސަލް ޔުނައިޓެޑާއެކު ހަ އަހަރު ދުވަހުގެ އެއްބަސްވުމެއްގައި ސޮއިކޮށްފި އެވެ.

ނިއުކާސަލްއިން އުމުރުން 24 އަހަރުގެ ޔަންމާޓް ގަނެފައި ވަނީ 7.5 މިލިޔަން ޔޫރޯގެ އަގެއްގައި ކަމަށް ރިޕޯޓްތައް ބުނެ އެވެ. ނިއުކާސަލްއަށް ޔަންމާޓް ގެނެސްފައި ވަނީ އެ ކްލަބު ދޫކޮށް އާސެނަލްއާ ގުޅުނު މެތިއު ޑެބޫޗީގެ ބަދަލުގައެވެ.

ޔަންމާޓްއަކީ އަންނަ ސީޒަނަށް ނިއުކާސަލް ވަރުގަދަކުރުމަށް އެ ކްލަބުން ގެނައި ހަ ވަނަ ކުޅުންތެރިޔާ އެވެ. ދެ ސީޒަނެއްގެ މަތިން ޑަޗް ލީގުގައި ފެޔެނޫޑްއަށް ކުޅުނު 74 މެޗުން ޔަންމާޓް ވަނީ ފަސް ލަނޑު ކާމިޔާބުކޮށްފަ އެވެ. އޭގެ އިތުރުން ނިމިގެންދިޔަ ވޯލްޑް ކަޕުގައި ވެސް ޔަންމާޓް ވަނީ ނެދަލެންޑްސް ގައުމީ ޓީމަށް ރަނގަޅު ކުޅުމެއް ދައްކައިފަ އެވެ.

ނިއުކާސަލްގެ ކޯޗު އެލަން ޕާޑިއު ބުނީ، ނިއުކާސަލްއާ އެކު މަސައްކަތް ފެށުމަށް އޭނާ ހުރީ ކެތްމަދުވެފައި ކަމަށާއި އަންނަ ސީޒަނަކީ އެ ޓީމަށް ކާމިޔާބު ސީޒަނަކަށް ވާނެ ކަމަށް އުންމީދު ކުރާ ކަމަށެވެ.

"ނިއުކާސަލްއަކީ ބޮޑު ތާރީހަކާއި، ވަރަށް ރަނގަޅު ސްޓޭޑިއަމަކާއި، ބޮޑު ތާރީހެއް އޮތް ކްލަބެއް. ސަޕޯޓަރުންނާ ބެހޭ ވާހަކަތަކެއް ވެސް އަހަރެންނަށް އެނގިއްޖެ،" ނިއުކާސަލްގެ ރަސްމީ ވެބްސައިޓަށް ދިން އިންޓަވިއުއެއްގައި ޔަންމާޓް ބުންޏެވެ. "މިއީ އަހަރެންނަށް ރަނގަޅު ބަދަލެއް. ނިއުކާސަލްއާ އެކު މަސައްކަތް ފެށުމަށް މިހިރީ ކެތްމަދުވެފައި. އަންނަ ސީޒަނަކީ އަހަރެމެންނަށް ކާމިޔާބީ ސީޒަނަކަށް ވާނެ ކަމަށް އުންމީދުކުރަން."

ނިއުކާސަލްގެ ކޯޗު އެލަން ޕާޑިއު ބުނީ، އެ ކްލަބަށް ޔަންމާޓް ސޮއިކުރުމުން އުފާކުރާ ކަމަށާއި އޭނާއަކީ ޑިފެންސިވް އަދި އެޓޭކުގައި ވެސް ބައިވެރިވެވޭ ފަދަ މޮޅު ކުޅުންތެރިއެއް ކަމަށެވެ.

ޔަންމާޓްއާ އެކު އަންނަ ސީޒަނަށް ނިއުކާސަލްއާ ގުޅުނު ކުޅުންތެރިންގެ ތެރޭގައި އަޔޯޒޭ ޕެރޭޒްއާއި، ޖެކް ކޯލްބެކްއާއި، ސިއެމް ޑި ޔޮންގްއާއި، ރެމީ ކަބެއްލާ އަދި އެމަނުއެލް ރިވިއެރޭ ހިމެނެ އެވެ.