ކަރަންޓް ނެތިގެން ކަމަދޫ ރައްޔިތުން ނިދަން ތިބެނީ "ތުނޑިމަތީގައި"!

ފުޅި ބައްތީގައި އަލިކަން ހޯދި ޒަމާން ފަސްދީ ހިނގައްޖެ އެވެ. ގޮނޑުދޮށަށް ފާހާނަ ކުރުމާއި ހަޑަސްބުރި ޖަހައިގެން ބޮޑުކަމުދިޔަ ޒަމާން ވެސް މާޒީގެ ތެރެއަށް ގޮސް ގެއްލިއްޖެ އެވެ. ހޫނު ވާ ވަރުން، ހަނދުވަރުގެ އައްޔަށް ނިދަން ދިޔުމަކީ މި ޖީލު ދުއް ތަންތަނެއް ނޫންނެވެ. ނަމަވެސް ހާހަކާ ގާތް ކުރާ އަދަދަކަށް މީހުން ދިރިއުޅޭ ބ. ކަމަދޫ ރައްޔިތުން އެކަން ތަޖުރިބާ ކުރަން ފަށައިފި އެވެ.

ކަމަދޫގައި ކަރަންޓް ދިނުމަށް ބޭނުންކުރާ 80، އާއި 60 ކިލޯ ވޯލްޓުގެ ދެ އިންޖީނަށް މައްސަލަ ދިމާވެފައި ހުންނަތާ މިހާރު "ލައްކަ ދުވަސް" ވެއްޖެ އެވެ. މިދިޔަ އަންގާރަ ދުވަހުގެ 4:30 ވެފައި ވަނީ ކަމަދޫގެ ރައްޔިތުން އެންމެ ބޮޑު އެއް އަސާސީ ހިދުމަތުން މަހުރޫމްވި ދުވަހަކަށެވެ. އެ ދުވަހު އެ ވަގުތުން ފެށިގެން އެރަށުގައި ދިރިއުޅޭ ކުދިބޮޑު އެންމެންނަށް ކަރަންޓްގެ ހިދުމަތެއް ނުލިބެ އެވެ.

"މިޒަމާނަކީ ކަރަންޓާއި ނުލިބޭ ނަމަ ފާހާނާ ވެސް ކުރެވޭ ޖަމާނެއް ނޫން، މިރަށު ރައްޔިތުން ތިބީ ވަރަށް ހާލުގައި، ރައްޔިތުން ނިދަނީ އަތިރިމަތީގައި،" ކަމަދޫ ކައުންސިލްގެ ނައިބު ރައީސް އިސްމާއިލް އަލީ ވިދާޅުވި އެވެ.

މީގެ ކުރިން ކޮޓަރިތަކުގައި އަރާމުގައި ނިދި އެ ރަށުގެ ހުރިހާ ރައްޔިތުން މިހާރު ނިދާ ކޮޓަރިއަކަށްވެފައި ވަނީ އެ ރަށު އަތިރިމައްޗެވެ. މިއޮއް ޒަމާނެއްގައި ފާހާނާ ކުރަންވެސް އަދި ފެންވަރަން ވެސް ދާންޖެހެނީ ގޮޑުދޮށަށެވެ. ކިޔަވާ ކުދިން ކިޔަވަނީ ފުޅި ބައްތީގެ އަލީގަ އެވެ. ކުޑަކުދިން ބަހަލައްޓާ މީހުންގެ ހާލު ސިފަކޮށްދޭންވެސް ދައްޗެވެ.

"އަޅުގަނޑުމެންގެ އެދުމަކީ ކައިރި ރަށަކުން އިޖީނެއް ގެނެސްގެން ނަމަވެސް ރައްޔިތުންނަށް ކަރަންޓްގެ ހިދުމަތް ފޯރުކޮށްދިނުން، ނަމަވެސް އެކަމުގެ އަލިމަގެއް ވެސް އަދިވެސް ނުފެނޭ" ރަށު ކައުންސިލަރު އަލީ ބުންޏެވެ.

އެ ރަށުގެ ރައްޔިތުން އެ ހާލުގައި އުޅޭއިރު ވެސް އެންމެ ބޮޑު ހިތާމާއަކީ ދެން ކަރަންޓް ލިބޭނެ ދުވަހެއް އަދި ވަގުތެއް ވެސް ބުންނަން އެ ރަށު އިންޖީނުގެ އާއި ހަވާލުވެގެންތިބި ފަރާތްތަކަށް ނޭންގުމެވެ.

އެ ރަށު އިންޖިނުގޭ ހިންގެވުމާ ހަވާލުވެ ހުންނެވި އަލީ ފިރާގު ވިދާޅުވީ އެ ރަށުން އެ އިންޖީނުތައް ހެދި ރައްޔިތުންނަށް ހިދުމަތްދެވޭނެ ވަކިއިރެއް ބުނަން ނޭންގޭ ކަމަށެވެ. އިންޖީނުތައް ރަނގަޅުކުރުމަށް ފެނަކައިގެ މައި އިދާރާއަށް އަންގާފައިވާނެ ކަމަށް ވެސް ވިދާޅުވި އެވެ.