ކަމަދޫން ކަރަންޓް ކެނޑުނުތާ 19 ގަޑިއިރުވެއްޖެ

ނުވަސަތޭކަ އަށްވުރެ ގިނަ މީހުން ދިރިއުޅޭ ބ. ކަމަދޫގައި ކަރަންޓްގެ ހިދުމަތް ނުލިބޭތާ 19 ގަޑިއިރުވެފައިވާ ކަމަށް އެ ރަށު ކައުންސިލުން ބުނެފި އެވެ.

ކަމަދޫ ކައުންސިލްގެ ނާއިބް ރައީސް އަލީ އިސްމާއިލް މިއަދު "ސަން" އަށް ވިދާޅުވީ އިއްޔެ ހަވީރު 4:30 އިން ފެށިގެން އެ ރަށުން ކަރަންޓް ކެނޑިފައިވާ ކަމަށާއި އޭގެ ފަހުން އެއްވެސް ވަރަކަށް މިހާތަނަށް އެ ރަށަށް ކަރަންޓްގެ ހިދުމަތް ނުލިބޭ ކަމަށެވެ.

"މިޒަމާނަކީ ކަރަންޓާއި ނުލިބޭ ނަމަ ފާހާނާ ވެސް ނުކުރެވޭ ޖަމާނެއް ނޫން، މިރަށު ރައްޔިތުން ތިބީ ވަރަށް ހާލުގައި، ކައުންސިލަށް ވަރަށް ގިނައިން ޝަކުވާ ލިބެމުން ދަނީ،" އިސްމާއިލް ވިދާޅުވި އެވެ.

އޭނާ ވިދާޅުވީ ކަރަންޓް ކެނޑުމަށް މެދުވެރިވި ސަބަބަކީ އެ ރަށަށް ކަރަންޓް ދިނުމަށް ބޭނުންކުރާ 80 ކިލޯ އާއި 60 ކިލޯގެ ދެ އިންޖީނު ހަލާކުވުން ކަމަށެވެ. އެދެ އިންޖީނު މައްސަލަޖެހިފައި ހުންނަތާ ވަރަށް ގިނަ ދުވަސް ވެފައިވާ ކަމަށް އޭނާ ވިދާޅުވި އެވެ.

އިސްމާއިލް ވިދާޅުވީ އެ ރަށުގެ އޮފީސްތައް ބަންދުކޮށްފައިވާ އިރު ސިއްހީ މަރުކަޒުން ވެސް އެކަށީގެންވާ ފަރުވާ ނުދެވޭ ކަމަށެވެ.

އެރަށު އިންޖިނުގޭ ހިންގެވުމާ ހަވާލުވެ ހުންނެވި އަލީ ފިރާގު ފޯނު ނުނަންގަވާތީ އޭނާގެ ބަހެއް ވަނީ ލިބޭ ގޮތްނުވެފަ އެވެ. ނަމަވެސް އަލީ ފިރާގާ ހަވާލާދީ ކައުންސިލްގެ ރައީސް އަލީ އިސްމާއިލް ވިދާޅުވީ އިންޖީނުތައް ހެދެން އަންނަނީ ސުޕެއާ ގެނެސްގެން ކަމަށާއި އެކަން ވާނެ ދުވަހެއް ވިދާޅުވާން އެނގިވަޑައިނުގަންނަވާ ކަމަށެވެ.