ފޭދޫ ދާއިރާގެ ޕްރައިމަރީ ބާތިލު ކުރަން ހުށަހެޅި މައްސަލަ ބެލޭނެ: ހައިކޯޓު

އެމްޑީޕީގެ ޓިކެޓުގައި ރައްޔިތުންގެ މަޖިލީހުގެ އިންތިޚާބުގައި ވާދަކުރާނެ ބޭފުޅަކު ހޮވުމަށް ބޭއްވި ޕްރައިމަރީ ބާތިލު ކުރަން ފޭދޫ ދާއިރާގެ މެމްބަރު އަލްހާން ފަހުމީ ސިވިލް ކޯޓަށް ހުށަހެޅުއްވި މައްސަލަ ކުރިއަށް ގެންދެވޭނެ ކަމަށް ހައިކޯޓުން ވެސް ކަނޑައަޅައިފި އެވެ.

ހައިކޯޓުން އެގޮތަށް ކަނޑައަޅާފައި ވަނީ ސިވިލް ކޯޓުގައި އެމްޑީޕީން ނެގި އިޖުރާއީ ނުކުތާއާ ގުޅިގެން އެ ކޯޓުން ނިންމި ނިންމުމުގައި އަލްހާން ހުށަހެޅުއްވި މައްސަލަ ކުރިއަށް ގެންދެވޭނެ ކަމަށް ނިންމާފައިވާތީ، އެ ނިންމުން އެމްޑީޕީގެ ފަރާތުން އިސްތިއުނާފު ކުރި މައްސަލަ ބެލުމަށް ފަހު އެވެ.

ހައިކޯޓުން މިއަދު ކުރި ހުކުމްގައި ބުނެފައި ވަނީ ފޭދޫ ދާއިރާގެ ޕްރައިމަރީގެ ނަތީޖާ އިއުލާންކުރިތާ 24 ގަޑިއިރުގެ ތެރޭގައި ޝަކުވާ ހުށަހެޅުމުގެ ފުރުސަތު އެމްޑީޕީގެ އިންތިޚާބާ ބެހޭ ގަވާއިދުން ލިބިދީފައިވާ އިރު، އެ ނަތީޖާ އިއުލާންކުރިތާ ގާތްގަނޑަކަށް 18 ގަޑިއިރުގެ ތެރޭގައި ބަޔަކު މީހުން އަލްހާނަށް ތޫނުއެއްޗަކުން ހަމަލާދީފައިވާ ކަމަށެވެ.

އަލްހާނަށް ދިން ހަމަލާގެ ސަބަބުން އޭނާގެ ސިއްހީ ހާލަތު ސީރިއަސްވެ ހޮސްޕިޓަލްގައި އެޑްމިޓްކޮށްފައިވާތީ އިންތިޚާބާ ގުޅިގެން ޝަކުވާ ހުށަހެޅުމުގައި އަލްހާނަށް ބާރު ނުފޯރާ ފަދަ ގޮތަކަށް ކަންތައް ދިމާވެފައިވާ ކަމަށާއި އެހެންކަމުން އެމްޑީޕީގެ އިންތިޚާބާ ބެހޭ ގަވާއިދުގައި ބުނެފައިވާ މުއްދަތުގައި ޝަކުވާ ހުށަހެޅުމުގެ ފުރުސަތު އޭނާ އަށް ގެއްލިފައިވާ ކަމަށެވެ.

އެ މައްސަލައިގައި ކަންހިނގާފައިވާ ގޮތުގެ މައްޗަށް ބަލާ އިރު، ޕްރައިމަރީއާ ގުޅޭ ޝަކުވާ ހުށަނާޅައި އަލްހާން ދޫކޮށްލީ ކަމަށް ނުބެލެވޭނެ ކަމަށް ވެސް އެ ހުކުމްގައި ވަނީ ބުނެފަ އެވެ. އެހެންކަމުން ފޭދޫ ދާއިރާގެ ޕްރައިމަރީ ބާތިލް ކުރަން އަލްހާން ހުށަހެޅުއްވި މައްސަލަ ސިވިލް ކޯޓުގައި ކުރިއަށްގެންދެވޭނެ ކަމަށް ހައިކޯޓުގެ ފަނޑިޔާރުންގެ އިއްތިފާގުން ވަނީ ކަނޑައަޅާފަ އެވެ.