އަދުއިންސާފު ގާއިމްކުރުމުގެ ބާރާ ގުޅޭގޮތުން ރިޔާސީ ބަޔާނުގައި އެއްޗެއް ވިދާޅުވެފައި ނުވަނީ ސަރުކާރުން އެ ބާރަށް އިހްތިރާމް ކުރާތީ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް މިރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގެ މަޑުއްވަރީ ދާއިރާއަށް ޕީޕީއެމްގެ ޓިކެޓުގައި ވާދަކުރައްވާ މުހައްމަދު އަމީތުގެ ކެންޕޭން އޮފީސް ހުޅުވުމަށް މިރޭ ބޭއްވި ހަފްލާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ޝަރުއީ ދާއިރާއަށް ސަރުކާރުން އިތުބާރު ކުރާ ކަމަށާއި އަދި އެ ދައިރާއަށް އިހްތިރާމް ވެސް ކުރާ ކަމަށެވެ. އެހެން ކަމުން ރިޔާސީ ބަޔާނުގައި އެ ދާއިރާއާ ގުޅޭގޮތުން އެއްޗެއް ވިދާޅު ނުވީ ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވީ ރިޔާސީ ބަޔާނުގައި އެކަމާ ގުޅޭގޮތުން އެއްޗެއް ވިދާޅުނުވި ނަމަވެސް ޝަރުއީ ދާއިރާ ހަރުދަނާ ކުރުމަށް އެ ދާއިރާއާ ގުޅިގެން މަސައްކަތްތަކެއް ފައްޓަވާފައިވާ ކަމަށެވެ. އަދި ވިދާޅުވީ އެ މަސައްކަތުގެ ސަބަބުން އަދުލު އިންސާފު ގާއިމްކުރުން އަވަސް ވެގެންދާނެ ކަމަށެވެ.
"އިރާދަކުރެއްވިޔާ ފަނޑިޔާރުންނަށާއި އަދުލުއިންސާފު ގާއިމްކޮށްދެއްވަން ތިއްބެވި ބޭފުޅުންނަށް ގަބޫލުކުރެވޭ ގޮތަކަށް އަދުލުއިންސާފު ހަލުވިވެގެންދާނެ އިންތިޒާމްތަކެއް ހަމަޖެއްސުމަށް އަޅުގަނޑުމެން އެބަ މަސައްކަތް ކުރަން. އެހެންވީމަ އަޅުގަނޑުމެން މި ވާހަކަ ރިޔާސީ ނުބުނެދިޔައީ ނުދެންނެވީ މިދެންނެވި ސަބަބަށްޓަކައި. އެއްގޮތަކަށް ވެސް އަދުލުއިންސާފު ގާއިމްކުރުމުގެ ހުރިހާކަމެއް ރަނގަޅުވެގެން، އެކަން ގަބޫލުކޮށްގެން ވެސް ނޫން،" ރައީސް ވިދާޅުވި އެވެ.
ޝަރީއަތުން ކުރާ ހުކުމްތަކާ ގުޅޭގޮތުން ސަރުކާރުން އެއްވެސް އެއްޗެއް ނުބުނާނެ ކަމަށާއި ނަމަވެސް ކޯޓުތަކުގައި ހުރި މައްސަލަތައް ނުނިމި ލަސްވާނަމަ އެ ވާހަކަދައްކާނެ ކަމަށް އެމަނިކުފާނު ވިދާޅުވި އެވެ.
އެމަނިކުފާނު ވިދާޅުވީ ރިޔާސީ އިންތިޚާބުގެ ދުވަސްވަރު ވެސް ކޯޓުތަކުން ކޮށްފައިވާ ހުކުމްތަކާ ދެކޮޅަށް ޕީޕީއެމުން ވާހަކަދައްކާފައި ނުވާނެ ކަމަށާއި އެއިރު ވެސް ވިދާޅުވަމުން ގެންދެވީ މައްސަލަތައް ނުނިމި ލަސްވާ ކަމަށެވެ. އަދި ކުރިއަށް އޮތް ތަނުގައި ވެސް ކޯޓުތަކުން ކުރާ ހުކުމްތަކަށް ފާޑުކިޔުންފަދަ އަމަލެއް މި ސަރުކާރުން ނުކުރާނެ ކަމަށް ވެސް ރައީސް ވިދާޅުވި އެވެ.
"....އެކަމަކު އަދުލުއިންސާފު ނިމިގެންދާއިރު އެ އަންނަ ހުކުމްތަކާ ދޭތެރޭގައި އަޅުގަނޑުމެން ފާޑެއް ނުކިޔާނަމޭ. އޭރަކު ވެސް ނުކިޔަން މިއަދަކު ވެސް ނުކިޔަން މާދަމާއަކު ވެސް ނުކިޔާނަން. އެކަމަކު އަދުލުއިންސާފު ލިބުމުގަ ލަސްވާކަން މިއަދު ވެސް އަޅުގަނޑު ދަންނަވާލަން. ހަމަ ލަސްވޭ،" ރައީސް ވިދާޅުވި އެވެ.
ރައީސް ވިދާޅުވީ ސުޕްރީމް ކޯޓަށް އިލެކްޝަންސް ކޮމިޝަންގެ މެމްބަރުން ހާޒިރުކުރުމަކީ ސަރުކާރުން އެކަމާ ގުޅިގެން އެއްޗެއް ބުނަންޖެހޭ ކަމެއް ނޫން ކަމަށާއި އެއްވަނަ ދުނިޔޭގެ ގައުމުތަކުން ބުނި ނަމަވެސް ދާޚިލީ ކަންތައްތަކުގެ ތެރެއިން "ސަރުކާރުން ނުބެހެންޖެހޭ ކަންތައްތަކާ ނުބެހޭނެ،" ކަމަށެވެ.
"ކީއްކުރަންތޯ ސަރުކާރުން މިއަށް ކޮންމެހެން އެއްޗެކޭ ބުނަންވީ. ބުނާކަށް ނުޖެހޭ ދެއްތޯ. އަދުލުއިންސާފު ގާއިމްވެގެންދާއިރު އަދުލުއިންސާފު ގާއިމްވެގެންދާނެ އަޅުގަނޑުގެ މައްޗަށް ވެސް އަދި އާދައިގެ ރައްޔިތެއްގެ މައްޗަށް ވެސް މުއައްސަސާތައް ހިންގަވާ ބޭފުޅުންގެ މައްޗަށް ވެސް އަދުއިންސާފު ގާއިމް ވެގެންދާނެ،" ރައީސް ވިދާޅުވި އެވެ.
ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި ގައުމުގެ ހާލަތު ބަޔާންކޮށް ރައީސް އިއްވެވި ރިޔާސީ ބަޔާނުގައި ޝަރުއީ ނިޒާމާ ގުޅޭގޮތުން އެއްޗެއް ވިދާޅުވެފައި ނުވާތީ އެމްޑީޕީން ވަނީ އެކަމަށް ފާޑުވިދާޅުވެފަ އެވެ. އެ ޕާޓީން ބުނެފައިވާ ގޮތުން އެކަމުން ދޭހަކޮށްދެނީ ޝަރުއީ ނިޒާމް ހަރުދަނާ ކުރުމަށް ސަރުކާރުން މަސައްކަތް ނުކުރާ ކަމެވެ.
date_range
އާދިއްތަ 22 ޑިސެމްބަރ 2024