ޕީޕީއެމްގެ ސަރުކާރެއްގައި، މަސްވެރިން "މަސް ބޭނިޔަސް ނުބޭނިޔަސް" މަސްވެރިންނަށް ފައިސާ ލިބޭނެ ނިޒާމެއް ގާއިމް ކޮށްދެއްވާނެ ކަމަށް އެ ޕާޓީގެ ރިޔާސީ ކެންޑިޑޭޓް އަބްދުﷲ ޔާމީން އަބްދުލްގައްޔޫމް މިރޭ ވިދާޅުވެއްޖެ އެވެ.
"ޢަބްދުﷲ ޔާމީނާ އެކު ދިވެހިރާއްޖޭގެ އަޑު" ޕޮރޮގްރާމެއްގައި އާންމު ފަރާތަކުން ކުރި ސުވާލެއްގެ ޖަވާބުގައި ޔާމީން ވިދާޅުވީ، މަސްވެރި ކަމަކީ މޫސުމީ ކަމެއް ކަމަށްވާ އިރު، އެ ސިނާއަތުގައި މަސައްކަތަކަށް އިންޝުއަރެންސް ހޯދައި ދިނުމަކީ ޕީޕީއެމްގެ ސަރުކާރެއްގައި އެންމެ ފުރަތަމަ ވެސް ކޮށްދޭ ކަންތަތަކުގެ ތެރޭގައި ހިމަނުއްވާނެ ކަމެއް ކަމަށެވެ.
"އަޅުގަނޑުމެން، މަސްވެރިންނަށް ދަންނަވާފައި އޮންނަ މުހިންމު ދެތިން ކަމެއްގެ ވާހަކަ އަޅުގަނޑު ދަންނަވާލާނަން. އެންމެ ފުރަތަމަ ކަމަކީ މަސްވެރި ކަމަކީ ވަރަށް މޫސުމީ ކަމެއް. ގަދަވެގެން ނޫނީ މިކަހަލަ ކަންކަން ދިމާވެގެން މަސްވެރިކަން ނުކުރެވޭ ދުވަސްތައް ދޭ. އެހެން ވީމާ އަޅުގަނޑުމެން އެންމެ ފުރަތަމަ ހުރިހާ މަސްވެރިންނަށް ތައާރަފް ކުރާ ކަމަކީ، މަސްވެރިންނަށް އިންޝުއަރެންސް ނިޒާމެއް. އެ ނިޒާމްގެ ފައިދާއަކަށް ވާނީ، މަސް ނުބޭނޭ ދުވަސްތަކުގައިވެސް މަސްވެރިންނަށް މި އިންޝުއަރެންސްގެ ތެރެއިން އެކަށިގެންވާ އާމްދަނީއެއް ލިބިވަޑައިގަންނަވާނެ. އެހެންވީމާ، އަޅުގަނޑުމެންގެ ބަހުން ދަންނަވަންޏާ ބޭނިޔަސް ނުބޭނިޔަސް، މަސްވެރިންނަށް ފައިސާ ލިބޭނޭ ނިޒާމެއް އަޅުގަނޑުމެން ހަމަޖައްސާނަން ފުރަތަމަ ކަމެއްގެ ގޮތުގައި،" ޔާމީން ވިދާޅުވި އެވެ.
ޔާމީން ވިދާޅުވީ ޕީޕީއެމްގެ ސަރުކާރެއްގައި މަސްވެރިންގެ ސިނާއަތު މިހާރު އޮތްވަރަށް ވުރެ ދެގުނައަށް ބޮޑުކުރައްވަން ބޭނުންފުޅުވާ ކަމަށާއި، ސަބަބަކީ މަސްވެރި ކަމުގެ ސިނާއަތަކީ ރާއްޖޭގައި ޓޫރިޒަމާއެކީ ޓޫރިޒަމް ފަދައިން "މައިކަށި" ކަމަށް ގަބޫލު ކުރައްވާތީ ކަމަށެވެ.
"މި ސިނާއަތަކީ ދުނިޔޭގައި ވަރަށް ބޮޑަށް ފުޅާކޮށްފައި އޮތް ސިނާއަތަކަށް ވާތީ، އަޅުގަނޑުމެން ހާއްސަ މަސައްކަތްތަކެއް ކުރަން އަޅުގަނޑުމެންގެ މި ސިނާއަތްތަކުގެ ތެރޭގައި މަސްވެރިކަމުގެ ސިނާއަތަށް އަޅުގަނޑުމެން އެބަ އިސްކަން ދެން،" ޔާމީން ވިދާޅުވި އެވެ.
ޕީޕީއެމްގެ ރިޔާސީ ކެންޑިޑޭޓް ވިދާޅުވީ، މަސްވެރިކަމުގެ ސިނާއަތު ކުރިއަށް ގެންދިއުމަށް ރޭވިފައިވާ ކަންތައްތަކުގެ ތެރޭގައި "ޒުވާން ވިޔަފާރިވެރިޔާ" އުފައްދާ ގޮތަށް ޒުވާން މަސްވެރިންތަކެއް ވެސް އުފައްދަން ބޭނުންވާ ކަމަށެވެ.
"ޒުވާން މަސްވެރިން އުފައްދާއިރު އަދި މަސްވެރި ކަމުގެ އެ އުޅަނދުގައި އުޅެނީ ޒުވާނުން ކަމުގައިވާކަމަށް ވަންޏާ، ނޫނީ އަޅުގަނޑުމެން ގަބޫލުކުރާ ނިސްބަތެއްގެ ޒުވާނުން އުޅޭކަމަށް ވަންޏާ، އެމީހުންނަށް ލޯނުދީގެން އަދި ދޯނިފަހަރު ގަތުމަށް ޓަކައި ބޭނުންވާ ފައިސާ އަށް ސަރުކާރުން ރަހުނުގެ ގޮތުގައި ބަހައްޓާނެ އެއްޗެއް ނުވަތަ ސަރުކާރުން ގެރެންޓީ ދީގެން މަސްވެރިންނަށް، މަސްވެރިންނަށް އާ ޒުވާނުންނަށް މިކަމަށް ވަދެވޭނޭ މަގުތައް އަޅުގަނޑުމެން ތަނަވަސްކޮށްދޭން ބޭނުންވޭ،" ޔާމީން ވިދާޅުވި އެވެ.
އޭނާ ވިދާޅުވީ ރާއްޖޭގެ ހުރިހާ އަތޮޅުތަކެއްގައި މަސްވެރިން އެންމެ ބޮޑަށް ބަނދަރުކުރާ ސަރަހައްދުތަކުގައި، މަސްވެރިން އެންމެ ބޮޑަށް ބަނދަރުކުރާ ރަށްރަށުގައި މަސްވެރިންނަށް ހާއްސަކޮށްގެން، ގިނަ ހިދުމަތްތަކަކާ އެކު މަސްވެރިންގެ މެރީނާ ތަކެއް ނުވަތަ ޕާކުތަކެއް އަޅުއްވައި ދެއްވާނެ ކަމަށެވެ.
"ހާއްސަކޮށް ޒުވާން މަސްވެރިން މީގެތެރެއަށް ގެންނާތީ، މަސްވެރި ކަމަކީ ވަރަށް ގިނަ ވަގުތު އުޅެންޖެހޭ ކަމަކަށްވާތީ، މި މަސްވެރިންގެ ޕާކުގައި ނުވަތަ މަސްވެރިންގެ މެރީނާގައި އަޅުގަނޑުމެން ބޭނުންވަނީ ހަމަ ޒުވާނުންނަށް ބޭނުންވާ، އަދި މުނިފޫހި ފިލުވުމާއި ކުޅިވަރުގެ ހުރިހައި ސާމާނެއް ލައިދިނުމާއި، އަދި އެތަނުން ފެނާއި ތެލާއި، ކެއިންބުއިމާއި މިކަހަލަ ހުރިހައި ކަންތައްތަކެއް ކުރެވޭނެ އިންތިޒާމްތަކެއް ހަމަޖައްސަން،" ޔާމީން ވިދާޅުވި އެވެ.
ކުރިން ރައީސް މައުމޫނުގެ ސަރުކާރުގައިވެސް އިގްތިސާދީ ވަޒީރުކަމާއި އަދިވެސް އެފަދަ ގިނަ ދާއިރާތަކެއްގައި ހަރަކާތްތެރިވެ ތަޖްރިބާތަކެއް ލިބިވަޑައިގެންފައިވާ ޔާމީން ވިދާޅުވީ ޕީޕީއެމްގެ ސަރުކާރެއްގައި ހިންގާ މަޝްރޫއުތަކަށް އިގްތިޞާދީ ސިޔާސަތުތައް ކަނޑައަޅާއިރު މަސްވެރިންނަށް ވަރަށް ހާއްސަ އަހައްމިއްޔަތެއް ދީގެން އިގްތިސާދީ ސިޔާސަތުތައް އެކަށައަޅާފައިވާ ކަމަށެވެ.
date_range
އާދިއްތަ 22 ޑިސެމްބަރ 2024