ވިކްޓަރީ ރެލިގޭޝަނުން ސަލާމަތްވެ، ވީބީ ދެވަނަ ޑިވިޝަނަށް

ދިވެހި ލީގު ކޮލިފިކޭޝަންގައި މިރޭ، ވީބީ އައްޑޫ އެފްސީ 2-3 އިން ބަލިކޮށް ވިކްޓަރީ ސްޕޯޓްސް ކްލަބް ރެލިގޭޝަނުން ސަލާމަތްވީއިރު ވީބީ ދެވަނަ ޑިވިޝަނަށް ރެލިގޭޓް ވެއްޖެ އެވެ.

މިރޭގެ މެޗަށް ނުކުތްއިރުވެސް މޮޅުވުން ނޫން ގޮތެއް ވިކްޓަރީއަށް ނެތްއިރު މެޗުން ޕޮއިންޓެއް ހޯދައިގެން ވެސް ސަލާމަތްވުމުގެ ފުރުސަތު ވީބީއަށް އޮތެވެ. އެހެން ކަމުން ފުރަތަމަ ޑިވިޝަންގައި ބޮޑެތި ކާމިޔާބުތަކެއް ހޯދާފައިވާ ދެޓީމުވެސް މިރޭގެ މެޗަށް ނުކުތީ މިއީ، ފަހު ފުރުސަތުކަމަށް ބަލައިގެން ވަރަށް ބޮޑަށް ތައްޔާރު ވެގެންނެވެ.

މެޗުގެ ފެށިގެން ފަސްވަނަ މިނިޓުގައި ވިކްޓަރީއަށް ކުރިހޯދައި ދިނީ އެ ޓީމުގެ ލަންކާ ފޯވަޑް އެޑިރި ބަންޑަނަގެ ޗަންނަ ނަގައިދިން ކޯނަރެއް ވީބީގެ ގޯލް ރޮނގުމަތިން އެތެރެއަށް ފޮނުވާލައިގެން ހުސައިން ޝިމާޒް (ކޮކީ) އެވެ. އެހެން ނަމަވެސް ވީބީގެ ހެންސްލީ އަވިލޯ ވިކްޓަރީގެ ޕެނަލްޓީއޭރިޔާ ތެރެއަށް ނަގައިދިން ރީތި ހުރަހެއް ބޮލުން ޖަހައި ވިކްޓަރީގެ ގޯލްތެރެއަށް ފޮނުވާލައިގެން މެޗުގެ 24 ވަނަ މިނިޓްގައި ވީބީއަށް ނަތީޖާ ހަމަހަމަކޮށްދިނީ، އިމްރާން ނަޝީދު އެވެ.

ފުރަތަމަ ހާފްގެ ކުޅުން 1-1 ދެ ޓީމު އެއްވަރުވެގެން ނިމި، ދެވަނަ ހާފްގެ ކުޅުން ފެށިގެން މެޗުގެ 68 ވަނަ މިނިޓްގައި ވިކްޓަރީއަށް ދެވަނަ ފަހަރަށް ކުރި ހޯދައިދިނީ، އިބްރާހީމް ޝަފްރާޒް އެވެ. ވީބީގެ ޕެނަލްޓީ އޭރިޔާ ބޭރުން އޭނާ ފޮނުވާލި ބާރު ހަމަލާ ގޮސް އަމާޒުވީ، ވީބީގެ ގޯލްގެ މަތީ ދާގަނޑަށެވެ. އެއާއެކު ވިކްޓަރީގެ ސަޕޯޓަރުންނާއި ކުޅުންތެރިންގެ އަޑުން ދަނޑު ގުގުމައިގެން ދިޔައެވެ. އެހެން ނަމަވެސް އޭގެ ހަ މިނިޓްފަހުން ވިކްޓަރީގެ އުފާވެރިކަން މެދު ކަނޑުވާލީ، އެ ޓީމުގެ ޕެނަލްޓީ އޭރިޔާ ބޭރުން ވީބީއަށް ލިބުނު ހިލޭ ޖެހުމަކުންޝަމްވީލް ގާސިމް (ބޮންޑާ) ނަގައިދިން ރީތި ހުރަހެއް ބޮލުން ޖަހައި، ވިކްޓަރީގެ ގޯލްގެ ތެރެއަށް ފޮނުވާލައިގެން، އަބްދުﷲ ހަނީފް (ބެންޖޯ) އެވެ.

ދެވަނަ ފަހަރަށް މެޗުގެ ނަތީޖާ ވީބީން ހަމަހަމަ ކުރުމަށްފަހު އެ ޓީމުގެ ކުޅުންތެރިން މެޗު ލަސްކުރަން މަސައްކަތް ކުރަމުން ދިޔައެވެ. އެހެން ނަމަވެސް މުޅި ޓީމު ކުރިއަށް ނެރެގެން ވިކްޓަރީން އުފެއްދި ހަމަލާތައް އެންމެ ފަހުން ނިމުމަކަށް ގެނެސްދިނީ މެޗުގެ ފަހު ވަގުތު ކޮޅުގައި ޗަންނަ ވީބީގެ ގޯލް ކުރިމަށްޗަށް ހުރަސްކޮށްލި ބޯޅަ ބޮލުން ޖަހައި ވީބީގެ ގޯލްތެރެއަށް ފޮނުވާލައިގެން ވިކްޓަރީގެ ކެމަރޫން މިޑްފީލްޑަރު ޗިންޑާ ޗިޒީ ކަކާ އެވެ. އެއާއެކު ވިކްޓަރީގެ ކުޅުންތެރިންނާއި އޮފިޝަލުން ވަރަށް ބޮޑަށް އުފާފާޅު ކުރަމުން ގެންދިޔަ އެވެ. އަދި މެޗުގެ އިތުރު ވަގުތުގެ ގޮތުގައި ދެއްކި ހަތަރު މިނިޓްގައި ވީބީއިން ނަތީޖާ ބަދަލު ކުރަން ކުރި މަސައްކަތް ނާކާމިޔާބުވެ މެޗް ނިމުނީ 3-2ން ވިކްޓަރީ މޮޅުވެ ދެވަނަ ޑިވިޝަނަށް ވީބީ އައްޑޫ އެފްސީ ރެލިގޭޓް ވެގެންނެވެ.

މެޗު ނިމުމާއެކު ވިކްޓަރީގެ ކުޅުންތެރިންނާއި އޮފިޝަލުންނާއި ސަޕޯޓަރުން ދަނޑުމަތީގައި އުފާފާޅުކުރަމުން ގެންދިޔައިރު، ލީގުގައި ކުޅޭ އެހެނިހެން ބޮޑެތި ކްލަބްތަކުގެ ކުޅުންތެރިންނާއި އޮފިޝަލުންގެ އިތުރުން ވީބީގެ އެއް މުއައްސިސް އަދި މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު ޝަވީދުއާއި ސެކްރެޓަރީ ޖެނެރަލް އަދި ވިކްޓަރީގެ ކުރީގެ ޖެނެރަލް ސެކްރެޓަރީ އަހްމަދު މަރްޒޫގު (މަރޭ) ވަނީ އެޓީމަށް މަރުހަބާ ކިޔާފަ އެވެ.

ރެލިގޭޝަނުން ސަލާމަތްވުމުން ވިކްޓަރީގެ ކެޕްޓަން ސޮބާހު މުޙައްމަދާއި ޓީމުގެ އެހެނިހެން ކުޅުންތެރިންގެ އިތުރުން އެޓީމުގެ އޮފިޝަލުންނާއި ޓީމަށް ހެޔޮއެދޭ އެތައް ބަޔަކަށް ވަނީ އުފަލުން ގޮސް ރޮވިފަ އެވެ.