އިންޑިއާގެ ޖައްވީ އިދާރާ (އިސްރޯ) އިން އެ ޤައުމުގެ އަމިއްލަ ނެވިގޭޝަން ނިޒާމު އިތުރަށް ހަރުދަނާކުރުމުގެ ގޮތުން، އައު ޖީލުގެ ނެވިގޭޝަން ސެޓެލައިޓެއް ކަމަށްވާ "އެންވީއެސް-03" ކާމިޔާބުކަމާއެކު ޖައްވަށް ފޮނުވާލައިފިއެވެ.
މި ސެޓެލައިޓް ޖައްވަށް ފޮނުވާލާފައިވަނީ ސްރީހަރިކޯޓާގައި ހުންނަ ސަތިޝް ދަވަން ސްޕޭސް ސެންޓަރުން، ހުކުރު ދުވަހުގެ ރޭ 11:51 ގައެވެ. މި މިޝަންގައި ބޭނުންކޮށްފައިވަނީ އިސްރޯގެ "ޖީއެސްއެލްވީ-އެފް18" މަރުކާގެ ރޮކެޓެކެވެ. ބަރުދަނުގައި 2،250 ކިލޯގުރާމު ހުރި މި ސެޓެލައިޓް ކަނޑައެޅިފައިވާ ޖިއޯސިންކްރޮނަސް ޓްރާންސްފަރ އޯބިޓަށް (ޖީޓީއޯ) ވާސިލުވެފައިވާކަން އެ އިދާރާއިން ވަނީ ކަށަވަރުކޮށްދީފައެވެ.
މި ކާމިޔާބީއާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީ ވަނީ އިސްރޯގެ ސައިންސްވެރިންނަށާއި އިންޖިނިއަރުންނަށް މަރުޙަބާ ވިދާޅުވެފައެވެ. ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި މޯދީ ވިދާޅުވީ، މިއީ އިންޑިއާގެ އަމިއްލަ ނެވިގޭޝަން ނިޒާމު "ނެވިކް" އިތުރަށް ވަރުގަދަކުރުމަށާއި، މުހިންމު ޓެކްނޮލޮޖީތަކުގައި އަމިއްލަ ފައިމައްޗަށް ތެދުވުމަށް އެޅުނު މުހިންމު ފިޔަވަޅެއް ކަމަށެވެ. އަދި މި ޚިދުމަތްތަކުގެ ފައިދާ އެ ޤައުމުގެ ރައްޔިތުންނަށް ފުޅާ ދާއިރާއެއްގައި ލިބިގެންދާނެ ކަމަށްވެސް އެމަނިކުފާނު ފާހަގަކުރެއްވިއެވެ.
"އެންވީއެސް-03" އަކީ އިސްރޯގެ އައު ޖީލުގެ ނެވިގޭޝަން ސެޓެލައިޓް ސީރީޒްގެ ތިންވަނަ ސެޓެލައިޓެވެ. އިންޑިއަން ރީޖަނަލް ނެވިގޭޝަން ސެޓެލައިޓް ސިސްޓަމް (އައިއާރްއެންއެސްއެސް) ނުވަތަ "ނެވިކް" ގެ ޚިދުމަތްތައް އަޕްގްރޭޑްކޮށް ދެމެހެއްޓުމަށް ފޮނުވި މި ސެޓެލައިޓުގައި އިންޑިއާއިން އަމިއްލައަށް އުފައްދާފައިވާ އެޓޮމިކް ކްލޮކަކާއި، އިތުރަށް ފުރިހަމަކޮށްފައިވާ އެލް1 ފްރިކުއެންސީ ސިގްނަލް ހިމެނެއެވެ.