ޝޭކްސްޕިއަގެ ތަމްސީލުތަކުން ފުރިހަމަ ތަމްރީނު ހޯދައި، "ސްޓާ ޓްރެކް" އަދި "އެކްސް-މެން" ފަދަ ހޮލީވުޑްގެ އެންމެ ކާމިޔާބު ފިލްމު ސިލްސިލާތަކަށް އާދަޔާޚިލާފު ހައިބަތެއް ގެނެސްދިން އިނގިރޭސިވިލާތުގެ ތަޖުރިބާކާރު އެކްޓަރު ސަރ ޕެޓްރިކް ސްޓެވާޓް އުމުރުން 86 އަހަރުގައި މަރުވެއްޖެއެވެ.
ސްޓެވާޓް މަރުވެފައިވަނީ އަލްޒައިމާސް އަދި ލެވީ ބޮޑީ ޑިމެންޝިއާ ބައްޔާ ދެކޮޅަށް ކުރަމުންދިޔަ ކުރު ނަމަވެސް އަސަރުގަދަ ހަނގުރާމައަކަށްފަހު، އެމެރިކާގެ ލޮސް އެންޖެލިސްގައެވެ. އޭނާ މި ބައްޔާ ކުރިމަތިލަމުން ގެންދިޔަކަން މީގެ ކުރިން ޢާންމުކޮށް އިޢުލާނުކޮށްފައެއް ނުވެއެވެ.
މި ހިތާމަވެރި ޚަބަރާއެކު، އޭނާއާއެކު ގިނަ ދުވަސްތަކެއް ވަންދެން މަސައްކަތްކުރި މަޝްހޫރު އެކްޓަރު ހިއު ޖެކްމަން ހާމަކުރި ގޮތުގައި، މިއަދު މި ވަކިވެދިޔައީ ތިއޭޓަރާއި ސިނަމާގެ ތާރީޚު ދުށް އެންމެ ވަރުގަދަ އެއް ފަންނާނު އަދި އޭނާގެ ޙަޔާތުގައި ދިމާވި އެންމެ އަގުހުރި އެއް ރަޙުމަތްތެރިޔާއެވެ. އެގޮތުން ސްޓެވާޓްގެ ކިބައިން އުނގެނުނު އަގުހުރި ފިލާވަޅުތަކުގެ ހަނދާންތައް ދުވަހަކުވެސް ފޮހެވިގެން ނުދާނެކަން ޖެކްމަން ވަނީ ފާހަގަކޮށްފައެވެ.
ބައިނަލްއަޤްވާމީ ފެންވަރުގައި ސްޓެވާޓް އެންމެ ބޮޑަށް ވިދައިގަތީ "އެކްސް-މެން"ގެ ޕްރޮފެސަރު ޗާލްސް ޒޭވިއާ އަދި "ސްޓާރ ޓްރެކް: ދަ ނެކްސްޓް ޖެނެރޭޝަން"ގެ ކެޕްޓަން ޖީން-ލޫކް ޕިކާޑްގެ ރޯލުން ނަމަވެސް، އޭނާގެ ފަންނީ ޙަޔާތުގެ ބޮޑުބައި ހޭދަކުރީ ތިއޭޓަރުގެ ސްޓޭޖު މަތީގައެވެ. ޝޭކްސްޕިއަގެ ކްލެސިކް ތަމްސީލުތަކުގެ އިތުރުން، އޭނާގެ އެންމެ ގާތް އެކުވެރިޔާ އިއާން މެކެލަންއާއެކު ވެސްޓް އެންޑް އަދި ބްރޯޑްވޭގެ ގިނަ ޑްރާމާތަކެއްގައި ފާހަގަކޮށްލެވޭ އެކްޓިންއެއް ސްޓެވާޓް ދައްކުވައިދިނެވެ.
ޕެޓްރިކް 'ސްޓާ ޓްރެކް"ގެ ފްރެންޗައިސްގެ މަންޒަރެއްގައި--ފޮޓޯ/ޕީޕްލްމެކެލަން ސިފަކުރި ގޮތުގައި ސްޓެވާޓަކީ މީހުންގެ އިތުބާރާއި ލޯބި ޙައްޤުވާ، ނުހަނު އިޚްލާސްތެރި ޝަޚްސިއްޔަތެކެވެ. އޭނާގެ ފުރިހަމަ ހުނަރާއެކު ސްޓެވާޓް ވަނީ ޝަރަފުވެރި އޮލިވިއޭ އެވޯޑް ތިން ފަހަރަށް ހޯދައި، ގްރެމީ އެވޯޑެއްވެސް ކާމިޔާބުކޮށްފައެވެ. މީގެއިތުރުން 2007 ވަނަ އަހަރު އޭނާ ކުޅުނު "މެކްބެތު"ގެ ކެރެކްޓާއަށް ބައިނަލްއަޤްވާމީ ނޫސްތަކުން ބޮޑު ތަޢުރީފެއް އޮއްސާލައި، ޓޯނީ އެވޯޑަށް ނޮމިނޭޓްވިއެވެ.
ސްޓެވާޓްގެ ކާމިޔާބީގެ ފަހަތުގައިވަނީ އިންތިހާއަށް ހިތްދަތި، ދަތި އުނދަގޫ ޅަފުރާއެކެވެ. އިނގިރޭސިވިލާތުގެ އުތުރުގެ މަސައްކަތްތެރިން ދިރިއުޅޭ އަވަށެއް ކަމަށްވާ މިރްފީލްޑްގައި އުފަންވި ސްޓެވާޓް ބޮޑުވީ ފާޚާނާއެއްވެސް ނެތް އާދައިގެ ކުޑަ ގެއެއްގައެވެ. އުމުރުން 12 އަހަރުގައި އެކްޓިންގެ ދާއިރާއަށް ޝައުގުވެރިވެ، ސްކޮލަޝިޕެއްގެ އެހީގައި ތިއޭޓާ ސްކޫލަކުން ތަޢުލީމު ހާސިލުކުރަން ފެށި ނަމަވެސް، އޭނާގެ ޒުވާން ޢުމުރު ފެށުނީ އާއިލީ ވާރުތަ ބައްޔެއްގެ ސަބަބުން ބޯ ތަލަވުމުގެ ހިތާމައާއެކުގައެވެ.
މިއަށްވުރެވެސް ބޮޑު ހިތްދަތިކަމަކީ، އިނގިރޭސި ސިފައިންގެ ތެރޭގައި އުޅުނު އޭނާގެ ބައްޕަ މަސްތުވެގެން އައިސް މަންމައަށް ކުރަމުންދިޔަ އަނިޔާވެރި ޢަމަލުތަކެވެ. އެ ބިރުވެރި ރޭތަކުގެ ހަނދާންތައް ފަހުން އޭނާގެ ޙަޔާތުނާމާގައި ބަޔާންކުރަމުން ބުނެފައިވަނީ، އަނިޔާވެރިކަމަކީ ފިރިހެނުން އަމިއްލައަށް އިޚްތިޔާރުކުރާ ކަމެއް ކަމަށާއި އޭގެ ޒިންމާ އެމީހުން ފުރިހަމައަށް އުފުލަންޖެހޭނެ ކަމަށެވެ. އެ ހިތި ތަޖުރިބާތަކުގެ ސަބަބުން، އޭނާ ވެގެންދިޔައީ ގެވެށި އަނިޔާ ލިބޭ އަންހެނުންނަށް ހިޔާވަހިކަން ފޯރުކޮށްދޭ ޖަމިއްޔާއެއް ކަމަށްވާ "ރެފިއުޖް"ގެ ވަރުގަދަ މަދަދުގާރަކަށެވެ.
ޕެޓްރިކް އަނބިމީހާ ސަނީ އޮޒެލްއާ އެކު--ފޮޓޯ/ޕީޕްލްޙަޤީޤީ ދިރިއުޅުމުގެ ބިރުވެރިކަމުން ސަލާމަތްވެ ރައްކާތެރިކަން ހޯދުމަށް ސްޓެވާޓަށް ލިބުނު އެންމެ ބޮޑު ހިޔާވަހިކަމަކީ ތިއޭޓަރުގެ ސްޓޭޖެވެ. ރޯޔަލް ޝޭކްސްޕިއަ ކޮމްޕެނީގައި 14 އަހަރު ހޭދަކުރުމަށްފަހު، 1987 ވަނަ އަހަރު ހޮލީވުޑްގެ "ސްޓާ ޓްރެކް"އިން ފުރުސަތު ލިބުނުއިރު ގިނަ ބަޔަކު ހީކުރީ އެ ޝޯ ފްލޮޕްވާނެ ކަމަށެވެ. ނަމަވެސް ސްޓެވާޓްގެ ގަދަފަދަ އަޑާއި އޭނާގެ ޝަޚުޞިއްޔަތުގެ ސަބަބުން، އެ ޝޯ ދުނިޔޭގެ ރެކޯޑުތައް މުގުރާލައި ހަތް އަހަރަށް ދެމިގެންދިޔައެވެ. ޝޭކްސްޕިއަގެ ތަމްރީނުތަކުގެ އެހީގައި ކެޕްޓަން ޕިކާޑްގެ ކެރެކްޓާ އޭނާ ދިރުވައިދިނީ ހިތްވަރުގަދަ އަދި އިންސާނިއްޔަތުކަން އިސްކުރާ ލީޑަރެއްގެ ސިފައިގައެވެ.
ސްޓާ ޓްރެކްގެ މަޝްހޫރު އެކްޓަރު ވޯލްޓަ ކޮއެނިގް މަރުވިތާ ކުޑަ ދުވަސްކޮޅެއްގެ ތެރޭގައި ސްޓެވާޓް ވަކިވެދިޔުމާ ގުޅިގެން، ކެޕްޓަން ކާކްގެ ރޯލު ކުޅުނު ވިލިއަމް ޝެޓްނާ ބުނީ، މިއީ ފޫނުބެއްދޭނެ ފަދަ ހިތާމަވެރި ހަފުތާއެއް ކަމަށާއި، ސްޓެވާޓަކީ ސްޓޭޖުން ފެށިގެން އެންޓަޕްރައިޒްގެ ބްރިޖާ ހަމައަށްވެސް ތަހުޒީބާއި އިންސާނިއްޔަތުކަން ގެނެސްދިން އަގުހުރި ފަންނާނެއް ކަމަށެވެ. ފަންނީ ދާއިރާއަށް ކޮށްދިން އަގުހުރި ޚިދުމަތްތަކުގެ އަގުވަޒަންކޮށް، 2010 ވަނަ އަހަރު އިނގިރޭސި ރާނީ އެލިޒަބަތު ދެވަނަ ވަނީ އޭނާއަށް 'ނައިޓްހުޑް'ގެ ޝަރަފު އަރުވާފައެވެ.
ސީރިއަސް އަދި ބޮޑު ރޯލުތަކުގެ އިތުރުން، އޭނާއަކީ ހެއްވާ މަޖާ މިޒާޖެއްގެ ވެރިއެއްކަންވެސް އެކި މަސައްކަތްތަކުން ވަނީ ސާބިތުކޮށްދީފައެވެ. "އެކްސް-މެން" އަދި "ޑޮކްޓަ ސްޓްރޭންޖް" ފަދަ ސުޕަހީރޯ ފިލްމުތަކުގައި ވިދާލުމުގެ އިތުރުން، "ދަ އިމޯޖީ މޫވީ" އަދި "ދަ ސިމްޕްސަންސް" ފަދަ މަޖާ ކާޓޫންތަކަށް އަޑުއަޅައިދީގެންވެސް ބެލުންތެރިން ހެއްވާލެއްވިއެވެ. ހަމައެއާއެކު، ސޯޝަލް މީޑިއާގައި އޭނާ ހިއްސާކުރި މަޖާ ފޮޓޯތަކާއި ވީޑިއޯތަކުގެ ސަބަބުން، ޒުވާން ޖީލުތަކުގެ މެދުގައިވެސް އޭނާ ވެގެންދިޔައީ ބޮޑު މަޤްބޫލުކަމެއް ހޯދި ޝަޚުޞިއްޔަތަކަށެވެ.
ދިރިއުޅުމުގެ ފަހުކޮޅުގައި، 2013 ވަނަ އަހަރު ލަވަކިޔުންތެރިޔާ ސަނީ އޮޒެލްއާ ކައިވެނިކޮށްފައިވާ ސްޓެވާޓް ދުނިޔެ ދޫކުރިއިރު، އަނބިމީހާގެ އިތުރުން ދެ ކުދިން ކަމަށްވާ ސޯފިއާ އަދި ޑެނިއަލް ދުނިޔޭގައި އެބަތިއްބެވެ. ސަރ ޕެޓްރިކް ސްޓެވާޓް ވަކިވެދިޔަ ނަމަވެސް، ތިއޭޓަރާއި ހޮލީވުޑްގެ ސިނަމާތަކަށް އޭނާ ދޫކޮށްދިޔަ ފަންނީ ތަރިކައަކީ ދުވަހަކުވެސް ފަނޑުވެގެންދާނެ ތަރިކައެއް ނޫނެވެ.