ޓޯޓަލް ފިޓްނަސް ގްރޫޕް (ޓީއެފްޖީ) އިން އިންތިޒާމުކޮށްގެން ބާއްވާ "މޯލްޑިވްސް ލޯންގް ރަން 2026" ގައި ބައިވެރިވުމުގެ ފުރުސަތު ހުޅުވާލައިފިއެވެ.
މި އަހަރުގެ ޑިސެންބަރު މަހުގެ ހަތަރު ވަނަ ދުވަހު ހުޅުމާލޭގައި ބޭއްވުމަށް ހަމަޖެހިފައިވާ މި ދުވުމަކީ ރާއްޖޭގައި ބާއްވާ އެންމެ ބޮޑު އެއް ދުވުމުގެ ހަރަކާތެވެ. ޓީއެފްޖީން ބުނި ގޮތުގައި، މި ފަހަރުގެ ދުވުމުގައި ވެސް ތަފާތު ހަތަރު ކެޓަގަރީއެއް ހިމެނޭނެއެވެ. އެއީ ފަސް ކިލޯމީޓަރު، 10 ކިލޯމީޓަރު، ހާފް މެރަތަން (21.1 ކިލޯމީޓަރު) އަދި ފުލް މެރަތަން (42.2 ކިލޯމީޓަރު) އެވެ.
އެ ދުވުމުގައި ބައިވެރިވުމަށް ޓީއެފްޖީގެ ރޭސަސް ވެބްސައިޓް މެދުވެރިކޮށް މިހާރު ރަޖިސްޓަރީ ކުރެވޭނެއެވެ.
ޓީއެފްޖީން އާންމުކޮށްފައިވާ ތާވަލުގައިވާ ގޮތުން، ދުވުމުގެ އެކި ކެޓަގަރީތައް ފަށާނީ އެކި ގަޑިތަކުގައެވެ. އެގޮތުން، އެންމެ ދިގު ރާސްތާ ކަމަށްވާ ފުލް މެރަތަން ފަށާނީ ރޭގަނޑު 2:00 ގައެވެ. އޭގެ ފަހުން 3:00 ގައި ހާފް މެރަތަން ފަށާއިރު، 10 ކިލޯމީޓަރުގެ ދުވުން ފަށާނީ ފަތިހު 6:00 ގައެވެ. އަދި އެންމެ ގިނަ މީހުން ބައިވެރިވާނެ ކަމަށް ބެލެވޭ ފަސް ކިލޯމީޓަރުގެ ދުވުން ފަށާނީ ހެނދުނު 7:00 ގައެވެ.
މި އަހަރުގެ ދުވުމުގެ ރޫޓު ފަރުމާކޮށްފައިވާ ގޮތަށް ބަލާއިރު، ފުލް މެރަތަން ދުވާ މީހުން ޓްރެކް ވަށައި ދެ ބުރު ޖެހުމަށްފަހު، 6.9 ކިލޯމީޓަރުގެ ލޫޕެއްގައި ހަ ބުރު ޖަހަން ޖެހޭނެއެވެ. ހާފް މެރަތަން ދުވާ މީހުން ޓްރެކް ވަށައި އެއް ބުރު ޖެހުމަށްފަހު، 6.9 ކިލޯމީޓަރުގެ ލޫޕުގައި ތިން ބުރު ޖަހާނެއެވެ. އަދި 10 ކިލޯމީޓަރު ދުވާ މީހުން ފަސް ކިލޯމީޓަރުގެ ލޫޕެއްގައި ދެ ބުރު ޖަހާއިރު، ފަސް ކިލޯމީޓަރު ދުވާ މީހުން ޖަހާނީ އެއް ބުރެވެ. ޓީއެފްޖީން ފާހަގަކުރި ގޮތުގައި، ފަސް ކިލޯމީޓަރާއި 10 ކިލޯމީޓަރުގެ ދުވުންތެރިން އިންޑަސްޓްރިއަލް ސަރަހައްދަށް ނުވަދެ، ސީދާ ރޫޓަކުން ދުވުން ކުރިއަށްގެންދާނެއެވެ.
މި ހަރަކާތުގެ މައިގަނޑު މަގުސަދަކީ ދުޅަހެޔޮ ސިއްހަތެއްގައި ތިބުމަށް ބާރުއެޅުމާއި ރާއްޖޭގައި ދުވުންތެރިންގެ ގުޅުންތައް ބަދަހިކުރުން ކަމަށް ޓީއެފްޖީން ބުނެއެވެ. އަދި އަލަށް ދުވާ މީހުންނާއި ތަޖުރިބާކާރު ދުވުންތެރިންނަށް ވެސް މި ހަރަކާތުގައި ބައިވެރިވުމުގެ ފުރުސަތު އޮންނާނެ ކަމަށް އެ ފަރާތުން ފާހަގަކުރިއެވެ.
މި އަހަރުގެ ދުވުމުގައި އާންމު ފަރުދުންގެ އިތުރުން، ކުންފުނިތަކާއި ދުވާ ކްލަބްތަކުން ޓީމު ހަދައިގެން ބައިވެރިވުމަށް ޓީއެފްޖީން ވަނީ ބާރުއަޅާފައެވެ. އެގޮތުން، ދުވާ ކްލަބްތަކަކީ ރަސްމީކޮށް ބަލައިގަންނަ ބައެއްގެ ގޮތުގައި ހަމަޖައްސައި، އެންމެ ގިނަ ބައިވެރިން ހިމެނޭ ޖަމިއްޔާއަކަށް ނުވަތަ ކުންފުންޏަކަށް ޚާއްސަ އެވޯޑެއް ދިނުމަށް ވަނީ ނިންމާފައެވެ.
ޓީއެފްޖީން 2013 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ މޯލްޑިވްސް ލޯންގް ރަން އަކީ ގިނަ އަދަދެއްގެ ދިވެހިންނާއި ބިދޭސީން ބައިވެރިވާ ހަރަކާތެކެވެ. ކޮވިޑް-19 ގެ ބަލިމަޑުކަމަށްފަހު ވެސް މި ދުވުމަށް ބޮޑު ތަރުހީބެއް ލިބެމުން އަންނައިރު، ފާއިތުވި އަހަރުތަކުގައި ވެސް އެއް ހާހަށް ވުރެ ގިނަ މީހުން ވަނީ މި ހަރަކާތުގައި ބައިވެރިވެފައެވެ.