މޯލްޑިވްސް އިސްލާމިކް ބޭންކު (އެމްއައިބީ)ގެ ގެސްޓްހައުސް ސިމްޕޯސިއަމްގެ ގެސްޓްހައުސް ޗެމްޕިއަން ރަށަށް ބައި މިލިއަން ރުފިޔާގެ އަގުހުރި މަޝްރޫއުތައް ހިންގުމުގެ ފުރުސަތު ދިނުމަށް އެ ބޭންކުން ނިންމައިފިއެވެ.
އެމްއައިބީން ބުނީ، މި ހިނގާ އޮކްޓޯބަރު މަހުގެ 15ވަނަ ދުވަހު އޮންނަ ގެސްޓްހައުސް ސިމްޕޯސިއަމާއި ގެސްޓްހައުސް އެވޯޑު ހަފުލާގައި އެ އިނާމު ލިބޭ ރަށެއް އިއުލާނުކުރާނެ ކަމަށެވެ.
އެ އެވޯޑަށް ކުރިމަތިލުމުގެ ފުރުސަތު މިދިޔަ ސެޕްޓެންބަރު މަހުގެ 15ވަނަ ދުވަހަށް ހަމަވީއިރު ވަރަށް ބޮޑު ތަރުހީބެއް ލިބުނު ކަމަށް އެމްއައިބީން ބުންޏެވެ. އެ އެވޯޑު ލިބޭ ރަށަކަށް އެ ރަށުގެ ރައްޔިތުންނަށާއި އެ ރަށަށް ޒިޔާރަތްކުރާ މެހެމާނުންނަށް ފައިދާވާނެ މަޝްރޫއަކަށް ޕްރޮޕޯސަލް ހުށަހެޅުމުގެ ފުރުސަތު ލިބިގެންދާނެ ކަމަށް އެމްއައިބީން މައުލޫމާތުދެއެވެ.
އެ ބޭންކުން އުންމީދުކުރަނީ މި ކަމުގެ ސަބަބުން ރަށުގެ ރައްޔިތުންނާއިއި މެހެމާނުންނަށް އިތުރު ލުއިފަސޭހަކަން ނުވަތަ ހިތްފަސޭހަކަން ލިބިގެންދާނެ ކަމަށެވެ.
އެމްއައިބީ ގެސްޓް ހައުސް ސިމްޕޯސިއަމާއި އެވޯޑު ހަފްލާ މި އަހަރު ބޭއްވުމަށް ހަމަޖެހިފައިވަނީ ބާސެލޯ ނަސަންދުރާ ހޮޓެލުގައި މި މަހުގެ 15 ވާ ބުރާސްފަތި ދުވަހެވެ.