އިންޑިއާއިން އެ ގައުމުގެ ނިއުކްލިއާ ހަތިޔާރު އުފުލުމުގެ ނިޒާމުތައް އެއްދުވަހުން އަނެއްދުވަހަށް ޒަމާނީކޮށް ފުޅާކުރަމުން އަންނަ ކަމަށާއި، އެ ގައުމުގައި މިހާރު ގާތްގަނޑަކަށް 190 ނިއުކްލިއާ ވޯހެޑް (އެޓޮމް ބޮން) އެބަހުރި ކަމަށް ބޭރުގެ ސައިންސްވެރިންގެ އައު ދިރާސާއަކުން ހާމަވެއްޖެއެވެ.
އެންޑީޓީވީގައި ރިޕޯޓުކޮށްފައިވާ ގޮތުގައި، މި މައުލޫމާތު ހާމަކޮށްފައިވަނީ ބައިނަލްއަގްވާމީ ގޮތުން ފާހަގަކޮށްލެވޭ "ބުލެޓިން އޮފް ދި އެޓޮމިކް ސައިންޓިސްޓްސް" (ބީއޭއެސް) އިން ދާދިފަހުން ޝާއިޢުކުރި ރިޕޯޓެއްގައެވެ. ހޭންސް އެމް ކްރިސްޓެންސަން، މެޓް ކޯޑާ، އެލިއާނާ ޖޯންސް އަދި މެކެންޒީ ނައިޓް-ބޮއިލް އެކުލަވާލި މި ރިޕޯޓުގައި ބަޔާންކޮށްފައިވާ ގޮތުގައި، އިސްވެ ނިއުކްލިއާ ހަމަލާއެއް ނުދިނުމުގެ ސިޔާސަތު (ނޯ ފަސްޓް ޔޫސް) އިންޑިއާއިން ދެމެހެއްޓި ނަމަވެސް، އެ ގައުމުން ދަނީ އެއްގަމާއި، ވައިގެ މަގުން އަދި ކަނޑުއަޑިން ހަމަލާދެވޭ ފުރިހަމަ "ނިއުކްލިއާ ޓްރިއަޑް" އެއް ބޭނުންކުރަމުންނެވެ.
ރިޕޯޓުގައި ފާހަގަކޮށްފައިވާ ގޮތުގައި، އިންޑިއާއިން އެ ގައުމުގެ ސްޓްރެޓެޖިކް ހަތިޔާރުތަކުގެ އަސްލު ގާބިލުކަމާއި، ރޭންޖު އަދި ބަހައްޓާފައިވާ ތަންތަނުގެ މައުލޫމާތު ވަރަށް ބޮޑަށް ސިއްރުކުރެއެވެ. އެހެންވެ އާންމުވެފައިވާ މައުލޫމާތަކީ އަންދާޒާތަކެއް ކަމަށާއި ހަގީގީ ބާރު މިއަށްވުރެ މާ ވަރުގަދަވުން އެކަށީގެންވާ ކަމަށް ރިޕޯޓުގައި ބުނެފައިވެއެވެ.
ވައިގެ މަގުން ނިއުކްލިއާ ހަމަލާ ދިނުމަށް އިންޑިއާއިން މިހާރު މައިގަނޑު ގޮތެއްގައި ބޭނުންކުރަނީ ފްރާންސުން ގަނެ އަޕްގްރޭޑްކޮށްފައިވާ މިރާޖް 2000 އަދި ޖެގުއާ މަރުކާގެ ހަނގުރާމަމަތީ މަތިންދާބޯޓުތަކެވެ. އަދި ކުރިމަގުގައި ފްރާންސުން ގަނެފައިވާ ރަފޭލް މަތިންދާބޯޓުތަކަށް މި ދައުރު ބަދަލުވާނެ ކަމަށް ލަފާކުރެވެއެވެ.
އިންޑިއާގެ ސްޓްރެޓެޖިކް ދިފާޢުގެ މައިބަދައަކީ އެ ގައުމުގެ ޑިފެންސް ރިސާޗް އެންޑް ޑިވެލޮޕްމަންޓް އޯގަނައިޒޭޝަން (ޑީއާރުޑީއޯ) އިން އަމިއްލަ ޓެކްނޮލޮޖީގައި ތަރައްޤީކޮށްފައިވާ 'އަގްނީ' މިސައިލް އާއިލާއެވެ. އިންޑިއާގެ އަތުގައި މިހާރު އޮޕަރޭޝަނަލް ހާލަތުގައި ހުރި ނިއުކްލިއާ މިސައިލްތަކުގެ ތެރޭގައި ޕްރިތުވީ-2، އަގްނީ-1 (700 ކިލޯމީޓަރުގެ ރޭންޖު)، އަގްނީ-2 (2،000 ކިލޯމީޓަރަށްވުރެ ދުރު)، އަގްނީ-3 (3،200 ކިލޯމީޓަރަށްވުރެ ދުރު)، އަގްނީ-4 (3،500 ކިލޯމީޓަރަށްވުރެ ދުރު) އަދި އަގްނީ-5 ހިމެނެއެވެ. މީގެ އިތުރުން 'އަގްނީ ޕްރައިމް' މިސައިލް އޮޕަރޭޝަނަލް ކުރުމުގެ މަސައްކަތްވެސް ދަނީ ކުރެވެމުންނެވެ.
ގާތްގަނޑަކަށް 6،000 ކިލޯމީޓަރާ ހަމައަށް ދަތުރުކުރުމުގެ ގާބިލުކަން ލިބިފައިވާ އަގްނީ-5 މިސައިލްގެ އެހީގައި ޕާކިސްތާނާއި ޗައިނާ އެއްކޮށް، މެދުތެރޭ އޭޝިއާ، ރަޝިއާގެ ބޮޑުބައެއް، އިރުދެކުނު އޭޝިއާ، މެދުއިރުމަތި އަދި ޔޫރަޕުގެ ބޮޑު ސަރަޙައްދަކަށް އިންޑިއާގެ އެތެރޭގައި ތިބެގެން ނިއުކްލިއާ ހަމަލާ ދިނުމުގެ ފުރިހަމަ ޤާބިލުކަން އިންޑިއާއަށް ލިބިފައިވާ ކަމަށް މި ރިޕޯޓުގައި ފާހަގަކޮށްފައިވެއެވެ. މިފަދަ ދުރު ރޭންޖުގެ މިސައިލްތަކުގެ ސަބަބުން، ހަނގުރާމައިގެ ހާލަތެއްގައި ބޯޑަރު ސަރަޙައްދުތަކާ ދުރުގައި ރައްކާތެރިކަމާއެކު ހަތިޔާރު ބެހެއްޓުމުގެ ފުރުޞަތު އިންޑިއާއަށް ލިބިގެންދެއެވެ.