ޖޫން މަހު އެމެރިކާއާ އެކު ވެވުނު ވަގުތީ އެއްބަސްވުމުގައި ބަޔާންކޮށްފައިވާ އީރާނުގެ ހަތް ޝަރުތު ފުރިހަމަ ނުވަނީސް، ސްޓްރެއިޓް އޮފް ހޮރްމޫޒް (ހޮރްމޫޒް ކަނޑުއޮޅި) އަލުން ނުހުޅުވާނެ ކަމަށް އީރާނުގެ ޕާލަމެންޓުގެ ރައީސް މުޙައްމަދު ބާޤިރު ޤާލިބާފް ވިދާޅުވެއްޖެއެވެ.
ސީއެންއޭގައި ރިޕޯޓްކޮށްފައިވާ ގޮތުން، އާދީއްތަ ދުވަހު އީރާނުގެ ދައުލަތުގެ މީޑިއާއިން ވަނީ ޤާލިބާފް މިހެން ވިދާޅުވި ކަމަށް ހާމަކޮށްފައެވެ. އީރާނުން އދ. ގެ އާންމު މަޖިލީހުގެ ތެރޭގައި ހުށަހެޅި ހުށަހެޅުމެއްގައި ބުނެފައިވަނީ، އެ ގައުމުން ހުށަހަޅާފައިވާ ޝަރުތުތައް ފުރިހަމަވެއްޖެނަމަ ހަތް ދުވަހުގެ ތެރޭގައި ހޮރްމޫޒް ކަނޑުއޮޅި އަލުން ހުޅުވައި، އާންމު ދަތުރުފަތުރުގެ ކަންކަން ކުރިއަށް ގެންދެވޭނެ ކަމަށެވެ. އެމެރިކާއިން މި ހުށަހެޅުމަށް ގަތަރު މެދުވެރިކޮށް މިދިޔަ ހަފުތާގައި ވަނީ ޖަވާބުދާރީވެފައެވެ.
އީރާނުގެ އިސް މަޝްވަރާވެރިޔާގެ ދައުރުވެސް އަދާކުރައްވާ ޤާލިބާފް ވިދާޅުވީ، އީރާނުގެ ނިންމުން ވަރަށް ސާފު ކަމަށާއި، އިސްލާމްއާބާދު އެއްބަސްވުމުގެ މައްޗަށް ބިނާކޮށްފައިވާ ހަތް ޝަރުތު ފުރިހަމަ ނުވަނީސް ކަނޑުއޮޅި ނުހުޅުވާނެ ކަމަށެވެ. އަދި ޑިޕްލޮމެޓިކް މަރުހަލާތައް ދިގުދައްމައި، އެއްކޮޅުން އެދޭ ކަންކަން މަޖުބޫރުކުރުމުގެ ޒަމާން މިހާރު މާޒީވެއްޖެކަން ވޮޝިންގޓަނުން ވިސްނަންޖެހޭނެ ކަމަށްވެސް އޭނާ ވިދާޅުވިއެވެ.
މިކަމާ ގުޅިގެން އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަޤާއީ ވިދާޅުވީ، އެމެރިކާގެ ޖަވާބާ ގުޅިގެން މެދުވެރިން މެދުވެރިކޮށް އީރާނުގެ ވިސްނުން ސާފުކޮށްދީފައިވާ ކަމަށާއި، އަދިވެސް އިތުރު ކަންކަން އެމެރިކާއަށް އަންގަން އެބަހުރި ކަމަށެވެ.
މީގެއިތުރުން، އެމެރިކާގެ ހުށަހެޅުންތައް އަދިވެސް ހުރީ ނިއުކްލިއާ މައްސަލައިގައި އެ ގައުމުން ކުރިންވެސް ގެންގުޅުނު ވިސްނުމާ އެއްގޮތަށް ކަމަށާއި، ނަމަވެސް މިވަގުތު އީރާނުގެ މައިގަނޑު ފޯކަސް ހުރީ ހޮރްމޫޒް ކަނޑުއޮޅީގެ މައްސަލައަށް ކަމަށް ތަރުޖަމާނު ފާހަގަކުރެއްވިއެވެ. އަދި އެ ސަރަހައްދުގެ ސަލާމަތާއި ރައްކާތެރިކަން އަލުން ގާއިމުކުރުމަށްޓަކައި އެމެރިކާއިން ސާފު ފިޔަވަޅުތަކެއް އަޅަންޖެހޭ ކަމަށްވެސް ވިދާޅުވިއެވެ.
އަދި ހަމައެއާއެކު، އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަށް ލުޔެއް ހޯދުމުގެ ބަދަލެއްގެ ގޮތުން، އދ. ގެ ނިއުކްލިއާ ވޮޗްޑޮގްގެ އިންސްޕެކްޓަރުންނަށް އީރާނުގެ ނިއުކްލިއާ މަރުކަޒުތައް ބެލުމުގެ ފުރުސަތު ދޭން އީރާނުން ހުށަހަޅާފައިވާ ކަމަށް ދެކެވޭ ވާހަކަތައް ތަރުޖަމާނު ވަނީ ދޮގުކުރައްވާފައެވެ. އަދި އެމެރިކާއާ އެކު އެއްވެސް ނިއުކްލިއާ މަޝްވަރާއެއް ކުރިއަށް ނުދާ ކަމަށްވެސް އޭނާ ވިދާޅުވިއެވެ.