އެމެރިކާގެ ޓެނެސީ ސްޓޭޓުގައި، މަރުގެ ހުކުމް އިއްވައިފައިވާ ކްރިސްޓާ ޕައިކްގެ އަދަބު ތަންފީޒުކުރުމަށް ދިން ލީތަލް އިންޖެކްޝަންގެ ދެ ޑޯޒުން ވެސް މަރުނުވެ، އަދަބު ދިނުމުގެ ތެރޭގައި ހެދުނު ގޯހަކާ ގުޅިގެން، އެ ސްޓޭޓުގެ ޑިޕާޓްމަންޓް އޮފް ކަރެކްޝަންގެ ކޮމިޝަނަރު ފްރޭންކް ސްޓްރާޑާ މަގާމުން އިސްތިއުފާ ދެއްވަން ނިންމަވައިފިއެވެ.
އޭބީސީ ނިއުސްގައިވާ ގޮތުން، ޓެނެސީގެ ގަވަރުނަރު ބިލް ލީ ވަނީ މި ހިނގާ މަހުގެ ނިޔަލަށް ސްޓްރާޑާ މަގާމުން ވަކިވެވަޑައިގަންނަވާނެ ކަމަށާއި އޭނާގެ އިސްތިއުފާ ގަބޫލުކުރައްވާފައިވާ ކަމަށް އިއްޔެ ވިދާޅުވެފައެވެ. އަދި މި މައްސަލައިގެ މިނިވަން ތަހުގީގެއް ކުރިއަށްދާއިރު، މަގާމުން އެއްފަރާތްވުމަކީ ރައްޔިތުންގެ މަސްލަހަތަށް އެންމެ ރަނގަޅު ގޮތް ކަމަށް ދެކެވަޑައިގަންނަވާ ކަމަށް ސްޓްރާޑާ ވިދާޅުވެފައިވެއެވެ.
މި އިސްތިއުފާ އައިސްފައިވަނީ މި ނިމުނު ސެޕްޓެމްބަރު މަހުގެ 30 ގައި ކްރިސްޓާ ޕައިކް ނަމަކަށް ކިޔާ އަންހެން ގައިދީއަކަށް ލީތަލް އިންޖެކްޝަން ޖަހައިގެން މަރުގެ އަދަބު ތަންފީޒުކުރަން އުޅުމުގެ ތެރޭގައި ދިމާވި މައްސަލަތަކަކާ ގުޅިގެންނެވެ. އެ ހާދިސާއަށްފަހު އޭނާގެ ހާލު ވަރަށް ބޮޑަށް ސީރިއަސްވެ، ހޮސްޕިޓަލުގައި މިހާރު ފަރުވާ ދެމުންދަނީ ހޭނާރައި، ވެންޓިލޭޓަރުގައެވެ.
ޕައިކްގެ ވަކީލުން ކޯޓަށް ހުށަހެޅި ލިޔުންތަކުގައިވާ ގޮތުން، އޭނާގެ ގަޔަށް އިންޖެކްޝަން ޖެހުމަށް ހަތް ކަށި ބޭނުންކޮށްފައިވާއިރު، އެއް ކަށި ވަނީ 90 ޑިގްރީއަށް ލެނބިފައެވެ. އަދި ބޭނުންކުރި "ޕެންޓޯބާބިޓަލް" ކިޔާ ބޭހުގެ ސަބަބުން އޭނާގެ ދެއަތް ވަރަށް ބޮޑަށް ދުޅަވެ، ފިހި، އަނިޔާވެފައިވާ ކަމަށް ވަކީލުން ބުނެއެވެ. ޕައިކް އަކީ ވިހަ އިންޖެކްޝަން ޖެހުމަށްފަހު ދުނިޔޭގައި ސަލާމަތްވި ފުރަތަމަ މީހާ ކަމަށް މަރުގެ އަދަބާ ބެހޭ މައުލޫމާތު އެއްކުރާ އިދާރާތަކުން ބުނެއެވެ.
ސްޓްރާޑާ މީގެ ކުރިން އަރިޒޯނާގެ ޖަލުތަކުގެ އިސްވެރިއެއްގެ ގޮތުގައި ހުންނެވި ދުވަސްވަރު ވެސް މަރުގެ އަދަބު ތަންފީޒުކުރުމުގައި ތިން ފަހަރެއްގެ މަތިން މިފަދަ ބޮޑެތި މައްސަލަތައް ދިމާވެފައިވާ ކަމަށް ރިޕޯޓުތައް ބުނެއެވެ.
މި ހާދިސާއާ ގުޅިގެން ޓެނެސީގެ ގަވަރުނަރު ވަނީ މަރުގެ އަދަބު ތަންފީޒުކުރުން ވަގުތީ ގޮތުން މެދުކަނޑާލައި، ތިންވަނަ ފަރާތެއް މެދުވެރިކޮށް މިކަން ހިނގައިދިޔަ ގޮތުގެ ފުރިހަމަ ތަހުގީގެއް ހިންގުމަށް އަމުރުކުރައްވާފައެވެ.