"އަޅުގަނޑު މި ލިޔުން ލިޔަން މި އިށީނީ ހިތާމައާއި ލަދުވެތިކަމުން ފުރިގެންވާ ހާލުގައެވެ. ދުލުން ބުނަން ނުކުޅެދޭ ފަދަ ބޮޑު ހިތާމައެއްގެ ތެރޭގައި ހުރެ، އަޅުގަނޑުގެ އަމިއްލަ ނަފްސުގެ އިތުރުން މުޅި މުޖުތަމައުގެ ކިބައިން މައާފަށް އެދުމަށެވެ."
"އަޅުގަނޑު ދަންނަ ބައެއް މީހުނަށް މީ ހައިރާން ކުރަވަނިވި ވާހަކަ އަކައް ވާނެކަންވެސް ޔަގީނެވެ."
މިއީ ފަހަކަށް އައިސް ދިވެހިންގެ ތެރޭގައި އާންމުވެފައިވާ އޮންލައިން ޖުވާ ނުވަތަ ބެޓްކުރުމުގެ ވަބާގައި ޖެހި، މުޅި ދިރިއުޅުން ހަލާކުވެފައިވާ ދިވެހި ޒުވާނަކު ސޯޝަލް މީޑިއާގައި އާންމުކުރި ޕޯސްޓެއްގެ ފެށުމެވެ.
އެއް އިރެއްގައި އުފާވެރި، ހަމަޖެހޭ އަދި އުންމީދުން ފުރިގެންވި ދިރިއުޅުމެއް އުޅެމުންދިޔަ މި ޒުވާނާ މިއަދު އިންތިހާ ދަރަޖައިގެ ޑިޕްރެޝަނަކަށް ވެއްޓި، ކޮޓަރިން ބޭރަށް ނުކުންނަން ނުކެރޭ ހިސާބަށް ކަންކަން ވަނީ ގޮސްފައެވެ. އޭނާގެ މި ހިތްދަތި ތަޖުރިބާއިން ހާމަވެގެންދަނީ، ސްމާޓްފޯނުތަކުގެ ޒަރީއާއިން ފަސޭހަކަމާއެކު ކުޅެވޭ ޖުވާގެ ސަބަބުން މީހާގެ ނަފްސާނީ އަދި މާލީ ދުޅަހެޔޮކަން ފުނޑުފުނޑުވެގެންދާ މިންވަރެވެ. މިއީ ހަމައެކަނި އެކަކުގެ ވާހަކައެއް ނޫނެވެ. މިއީ މިއަދު ރާއްޖޭގެ އެތައް އާއިލާއެއްގެ ތެރޭގައި ފޮރުވިފައިވާ ހިތްދަތި ހަގީގަތެކެވެ.
އެ ޒުވާނާ ސޯޝަލް މީޑިއާގައި ބުނި ގޮތުގައި، ޝައިތާނާގެ މަގުފުރެއްދުމުގެ ތެރެއިން ޖުވާކުޅުމުގެ ނުބައި ވަބާގައި އޭނާ ޖެހުނީ ހަމައެކަނި މަޖަލަކަށެވެ. ނަމަވެސް ވަގުތު ފާއިތުވަމުން ދިޔަވަރަކަށް އޭނާގެ މުޅި ދިރިއުޅުން އެކަމުގެ އަނދިރި އަނދަވަޅުގެ ތެރެއަށް ގެނބިގެން ދިޔައެވެ.
"މި ލަދުވެތި އަމަލުގެ ސަބަބުން އަޅުގަނޑުގެ ކައިވެނި ނިމުމަކަށް އައެވެ. އިތުބާރުކުރި އެންމެހައި އެކުވެރިންނާއި ހެޔޮއެދޭ މީހުން ގެއްލި، އަޅުގަނޑު މުޅިން އެކަނިވެރިވިއެވެ،" އޭނާ ލިޔެފައިވެއެވެ.
އެތައް މިލިއަން ރުފިޔާއެއް ލިބުނު ނަމަވެސް، އެއަށްވުރެ އެތައް ގުނައެއް އިތުރަށް ގެއްލި، އޭނާ މުޅިން ބަނގުރޫޓުވީއެވެ. ނަތީޖާއެއްގެ ގޮތުން، އެތައް ބަޔަކަށް ބޮޑެތި އަދަދުތަކުން ދަރަނިވެރިވެ، އެކަކު އަތުން ލޯނު ނަގައިގެން އަނެކަކަށް ދައްކަމުން ދިޔަ ދޮގާއި މަކަރުގެ ދަލެއްގައި އޭނާ ތާށިވިއެވެ. މިއަދު އޭނާގެ ހާލަކީ، މީހުންގެ އިންޒާރުތަކާއި ބިރުވެރިކަމުގެ ސަބަބުން ކޮޓަރިން ބޭރަށް ނުކުންނަން ނުކެރި، ބިރުވެރިކަމެއްގެ ތެރޭގައި ދުވަސްތައް ގުނުމެވެ.
އޭނާ ބުނާގޮތުގައި ވަޒީފާއަކަށް ދިޔަ ނަމަވެސް، އެތަނަށް މީހުން ގުޅައި ބިރުދައްކަމުން ދާތީ އެއްވެސް މަސައްކަތެއް ހަމަޖެހިގެން ކުރެވޭނެ ގޮތެއް ނެތެވެ. މި ހުރިހާ ކަމެއްގެ ޒިންމާ އޭނާ ފުރިހަމައަށް އަމިއްލަ ބޮލުގައި އަޅާއިރު، މިއީ އެޑިކްޝަންގެ އެންމެ ފަހު މަރުހަލާގައި މީހާގެ އަމިއްލަ ނަފްސުގެ މައްޗަށް އޮންނަ ބާރު ކެނޑިގެންދާ ގޮތުގެ ސާފު މަންޒަރެކެވެ.
ޖުވާއަކީ އާންމުކޮށް މީހުން އުފުލާ ފަދަ ބުރައެއް އުފުލުމަކާ ނުލައި، ނަސީބުގެ މައްޗަށް ބިނާކޮށް ފައިސާ ނުވަތަ މުދާ ހޯދުމަށް ކުޅޭ ކުޅިވަރެކެވެ. ޒަމާނީ ޓެކްނޮލޮޖީއާއެކު، އޮންލައިން ބެޓިން އެޕްލިކޭޝަންތައް މެދުވެރިކޮށް ޖުވާ ކުޅުން ވަނީ ވަރަށް ބޮޑަށް ފަސޭހަވެފައެވެ.
އެމެރިކަން ސައިކޮލޮޖިކަލް އެސޯސިއޭޝަނުން ފާހަގަކުރާ ގޮތުގައި، މަސްތުވާތަކެތީގެ އެޑިކްޝަނެކޭ އެއްފަދައިން ޖުވާ ކުޅުމަކީ ވެސް ސިކުނޑީގެ ރިވޯޑް ސިސްޓަމަށް ބަދަލުތަކެއް ގެނުވާ ކަމެކެވެ. ފުރަތަމަ ލިބޭ ކުދި މޮޅުވުންތަކުގެ ސަބަބުން ސިކުނޑިއަށް ލިބޭ އުފާވެރިކަމުގެ އިހުސާސް، ފަހުން ބޮޑެތި އަދަދުތަކުން ބަލިވުމުން ވެސް އަލުން އެ އިހުސާސް ހޯދުމަށް މީހާ މަޖުބޫރުކުރުވައެވެ. އެމެރިކާގެ ނޭޝަނަލް ކައުންސިލް އޮން ޕްރޮބްލަމް ގެމްބްލިންގްގެ ތަފާސްހިސާބުތަކުން ދައްކާ ގޮތުގައި، ޖުވާ ކުޅުމުގެ އެޑިކްޝަން ހުންނަ މީހުންގެ ތެރެއިން 82 އިންސައްތަ މީހުންނަކީ ނަފްސާނީ އެހެން މައްސަލަތައް، ޚާއްސަކޮށް ޑިޕްރެޝަން އަދި އެންޒައިޓީ ތަހައްމަލުކުރަމުންދާ މީހުންނެވެ. އަދި މިފަދަ މީހުންގެ ތެރެއިން ގާތްގަނޑަކަށް 31 އިންސައްތަ މީހުން އަމިއްލައަށް މަރުވުމުގެ ހިޔާލުތައް ކުރާއިރު، 16 އިންސައްތަ މީހުން އަމިއްލައަށް މަރުވާން މަސައްކަތްކޮށްފައިވާ ކަމަށް ދިރާސާތަކުން ދައްކައެވެ.
ޖުވާގެ ބާވަތެއް ކަމަށްވާ ކެސީނޯ: އިންޓަނެޓްރާއްޖޭގައި ވެސް މި މައްސަލަ ބޮޑުވެ، 2024 ވަނަ އަހަރުގެ ތެރޭގައި ކަމާބެހޭ ފަރާތްތަކުން ވަނީ ޖުވާ ކުޅޭ 242 ވެބްސައިޓެއް ބްލޮކްކޮށް، ގަވާއިދާ ހިލާފު 7،800 އަށް ވުރެ ގިނަ ލިންކްތައް ބަންދުކޮށްފައެވެ. މީގެ އިތުރުން، ދާދި ފަހުން ރާއްޖޭގެ ދައުލަތުގެ މީޑިއާގެ ލޯގޯ ބޭނުންކޮށްގެން އާޓިފިޝަލް އިންޓެލިޖެންސް މެދުވެރިކޮށް ޖުވާ ޕްރޮމޯޓްކުރި މައްސަލައެއް ވެސް ފުލުހުން ވަނީ ބަލަން ފަށާފައެވެ. މިއީ މުޖުތަމައުގެ އިގުތިސާދީ އަދި އިޖުތިމާއީ ފޭރާން ހަލާކުކުރަމުންދާ ކަމެއްކަން ކަމާބެހޭ ފަރާތްތަކުން ފާހަގަކުރެއެވެ.
އިސްލާމްދީނުގައި ޖުވާ ވަނީ ކަނޑައެޅިގެން ހަރާމްކުރައްވާފައެވެ. ސޫރަތުލް މާއިދާގެ 90 ވަނަ އާޔަތާއި 91 ވަނަ އާޔަތުގައި ﷲ ތައާލާ ވަހީކުރައްވާފައިވަނީ، ރަލާއި ޖުވާކުޅުމާއި ބުދުތަކާއި ނަސީބު ހުރިގޮތް ބަލަން ގެންގުޅޭ ދުނިދަނޑިތަކަކީ ޝައިތާނާގެ އަމަލުތަކުގެ ތެރެއިންވާ މުޑުދާރު ތަކެތި ކަމަށާއި، އެކަންކަމާ ދުރުވެގަތުމަށެވެ. އަދި ޝައިތާނާ އެދޭކަން ކަށަވަރީ ރާއާއި ޖުވާގެ ސަބަބުން މީސްތަކުންގެ މެދުގައި އަދާވާތްތެރިކަމާއި ރުޅިވެރިކަން އުފެއްދުމަށް ކަމަށް އެ އާޔަތްތަކުގައި ބަޔާންކުރައްވާފައިވެއެވެ.
މި ޒުވާނާގެ ވާހަކައިން ވެސް ފެންނަނީ ހަމަ މި ހަގީގަތެވެ. އޭނާގެ ސަބަބުން މާލީ ގޮތުންނާއި ނަފްސާނީ ގޮތުން އަނިޔާ ލިބުނު ހުރިހާ ފަރާތްތަކުގެ ކިބައިން އޭނާ ވަނީ ނިހާޔަތަށް، އިހުލާސްތެރިކަމާއެކު މައާފަށް އެދިފައެވެ.
"އަދި ބިރުން ގޮސް ފޯނު ނުނަގައި، ޖަވާބުދާރީ ނުވެވި ފިލައިގެން އުޅެވުނު ކަމަށްޓަކައި ނިހާޔަތަށް ލަދުވެތިވެ މައާފަށް އެދެމެވެ،" އޭނާގެ ޕޯސްޓުގައި ލިޔެފައިވެއެވެ. އިތުރަށް އޭނާ ބުނެފައިވަނީ، "އަޅުގަނޑު ﷲ ގަންދީ ވައުދުވަމެވެ. އަޅުގަނޑު ދައްކަންޖެހޭ އެންމެހައި ފައިސާއެއް، ކިތަންމެ ދަތި ހާލުގައި ނަމަވެސް، މަސައްކަތް ކޮށްގެން އަނބުރާ ދައްކައި ހަލާސްކުރާނަމެވެ،"
އިސްލާމްދީނުގައި ތައުބާވުމުގެ ދޮރު އަބަދުވެސް ހުޅުވިފައިވާއިރު، މީހުންގެ ހައްގުތައް އަދާކުރުމާއި ދަރަނިތައް ހަލާސްކުރުމަކީ ތައުބާ ގަބޫލުކުރެއްވުމުގެ މުހިންމު ޝަރުތެކެވެ. ދަރަންޏާއެކު މަރުވެއްޖެނަމަ، އެމީހެއްގެ ފުރާނަ އެ ދަރަންޏަކާ ގުޅިފައިވާކަން ރަސޫލާ ﷺ ގެ ހަދީސްތަކުން ސާބިތުވެއެވެ.
މި ހިތްދަތި ތަޖުރިބާއިން އިބުރަތް ހާސިލުކުރުމަށް މުޅި މުޖުތަމައަށް، ހާއްސަކޮށް ޒުވާނުންނަށް އޭނާ ވަނީ ނަސޭހަތްތެރިވެފައެވެ. އޭނާ ސިފަކުރި ގޮތުގައި ޖުވާ ކުޅުމަކީ މީހާގެ ދުނިޔެއާއި އާހިރަތް ހަލާކުކޮށްލާ ބޮޑު ވަބާއެކެވެ.
"އެއީ އުފަލެއް ނޫނެވެ. އެއީ މުޅި ދިރިއުޅުން އަނދާ އަޅިއަށް ހަދާލާ ވިހައެކެވެ،" އޭނާ ފާހަގަކުރިއެވެ.
މިފަދަ ނުބައި މަގަކަށް ފިޔަވަޅު ނޭޅުމަށް އޭނާ އެދިފައިވާއިރު، މިއީ ކޮންމެ އާއިލާއަކުން ވެސް ސަމާލުވާންޖެހޭ ކަމެކެވެ. ސްމާޓްފޯނުތަކުގެ ޒަރީއާއިން ކުޑަކުދިންނާއި ޒުވާނުންނަށް މިފަދަ އެޕްލިކޭޝަންތަކަށް ވަދެވޭއިރު، ބެލެނިވެރިންގެ ސަމާލުކަން މިކަމަށް އިންތިހާއަށް ބޭނުންވެއެވެ. ޖުވާގެ މަޅީގައި ޖެހިފައިވާ މީހުންނަށް މަލާމާތްކުރުމުގެ ބަދަލުގައި، އެހީތެރިކަން ފޯރުކޮށްދީ، ނަފްސާނީ ފަރުވާ ހޯދައިދިނުމަކީ މުޖުތަމައުގެ ޒިންމާއެކެވެ.
އޭނާގެ ކުށްތަކަށް ތައުބާވެ، ރަނގަޅު މީހެއްގެ ގޮތުގައި މުޖުތަމައަށް އެނބުރި އައުމަށް ކުރާ މަސައްކަތުގައި އެންމެންގެ މައާފާއި ހެޔޮދުއާއަށް އޭނާ ވަނީ އެދިފައެވެ. މި ޒުވާނާ މިއަދު ކުރިމަތިލަމުންދާ ބިރުވެރިކަމާއި ދަރަނީގެ ބުރަޔަކީ، މަޖަލަކަށް ފަށާ ކުޅިވަރެއްގެ ނިމުން ކިހާ ހިތްދަތިވެދާނެކަން އަންގައިދޭ ވަރުގަދަ މިސާލެކެވެ. އޭނާގެ ދަރަނިތައް ހަލާސްކުރުމަށްޓަކައި ކުރަންޖެހިފައިވާ ދިގު އަދި އުނދަގޫ ދަތުރުން ދައްކައިދެނީ، އޮންލައިން ޖުވާގެ ސަބަބުން ލިބޭ ގެއްލުމަކީ އެންމެ ރެއަކުން ފިލައިގެންދާނެ ކަމެއް ނޫންކަމެވެ.