ސްޕެއިންގެ ގާނޫނުހަދާ މަޖިލީހުން ބޯހިޔާވަހިކަމުގެ ކުއްލި ބިލުތަކެއް ފާސްނުކުރުމާ ގުޅިގެން، ކުލި ކޮންޓްރޯލްކުރުމަށް ގޮވާލައި އެ ގައުމުގެ އެކި ކަންކޮޅުތަކުގައި އިއްޔެ އެތައް ހާސް ބަޔަކު މުޒާހަރާކޮށްފިއެވެ.
މެޑްރިޑް، ވެލެންސިއާ އަދި ބާސެލޯނާ ހިމެނޭ ގޮތަށް 50 އަށް ވުރެ ގިނަ ސަރަހައްދުގައި ހިނގާލުންތައް ބާއްވާފައިވެއެވެ. މި މުޒާހަރާތައް ފެށުނީ ކުލި ބޮޑުވުމުގެ ސަބަބުން ފައިސާ ނުދެއްކިގެން އުމުރުން 87 އަހަރުގެ އަންހެނަކު އޭނާ ދިރިއުޅެމުންދިޔަ ގެއިން މިދިޔަ މަހު ނެރުނު މައްސަލައިގައި އާންމުންގެ ނުރުހުން ފާޅުކުރަން ފެށުމާ ގުޅިގެންނެވެ.
ވެލެންސިއާގައި ކުރިއަށްދިޔަ ރިއަލް އެސްޓޭޓް ސަމިޓެއް ބޭއްވި ސަރަހައްދުގައި މުޒާހަރާގެ ބައިވެރިންނާއި ފުލުހުންނާ ދެމެދު ވަނީ ހަމަނުޖެހުން ހިނގާފައެވެ. ސްޕެއިންގެ މީޑިއާތަކުން ރިޕޯޓުކޮށްފައިވާ ގޮތުގައި، މުޒާހަރާގެ ބައިވެރިން ފުލުހުންނަށް އެކި ތަކެތި އުކުމުން ފުލުހުން ވަނީ ރަބަރު ވަޒަން ބޭނުންކޮށްފައެވެ. އާންމު ބްރޯޑްކާސްޓަރު އާރްޓީވީއީ އިން ބުނި ގޮތުގައި މި ހަމަނުޖެހުންތަކުގައި ނުވަ ފުލުހަކަށް އަނިޔާވެ، ފަސް މީހަކު ވަނީ ހައްޔަރުކޮށްފައެވެ.
އެންމެ ބޮޑު މުޒާހަރާއެއް ކުރިއަށްދިޔައީ ވެރިރަށް މެޑްރިޑްގައެވެ. މެޑްރިޑްގެ ޓެނަންޓްސް ޔޫނިއަނުން ބުނި ގޮތުގައި އެ މުޒާހަރާގައި ފަސް ލައްކަ މީހުން ބައިވެރިވިއެވެ. ނަމަވެސް ރަސްމީ އިދާރާތަކުން އަންދާޒާކުރާ ގޮތުގައި ބައިވެރިވީ 70،000 މީހުންނެވެ. މުޒާހަރާގެ ބައެއް ބައިވެރިން ވަނީ މެޑްރިޑްގެ މައި މައިދާނެއް ކަމަށްވާ ޕުއެރްޓާ ޑެލް ސޯލްގައި އެތައް ދުވަހެއް ވަންދެން ކޭމްޕްކޮށްފައެވެ. މި ސަރަހައްދަށް ވަންނަން މަސައްކަތްކުރި ކަނާތުފިޔައިގެ ހަރުކަށި ޖަމާއަތެއްގެ ތިން މީހަކު ހައްޔަރުކޮށްފައިވާ ކަމަށް ފުލުހުން ބުނެފައިވެއެވެ.
ސްޕެއިންގައި ކުރިއަށް ގެންދިޔަ މުޒާހަރާ-- ފޮޓޯ: ބީބީސީއާރްޓީވީއީއަށް މައުލޫމާތު ދެމުން މުޒާހަރާގެ ބައިވެރިއަކު ބުނީ އެ މީހުން އެތަނަށް ނުކުމެ ތިބީ މަޖާކުރަން ނޫން ކަމަށާއި، އެއީ ގަބޫލުކުރާ އުސޫލުތަކެއްގެ ސަބަބުން ކަމަށެވެ. އަދި އޭއެފްޕީއަށް މައުލޫމާތު ދެމުން އުމުރުން 26 އަހަރުގެ މާކޯސް ސައިންޒް ބުނީ ކުރިން 900 ޔޫރޯއަށް ދެ ކޮޓަރީގެ އެޕާޓްމަންޓެއް ލިބުނު ނަމަވެސް، މިހާރު އެއް ކޮޓަރީގެ އެޕާޓްމަންޓަކަށް 1،000 ޔޫރޯ ހޭދަވާ ކަމަށެވެ.
މި މުޒާހަރާތައް ފުޅާވެފައިވަނީ ބޮޑުވަޒީރު ޕެޑްރޯ ސަންޗޭޒްގެ ސަރުކާރުން ހުށަހެޅި ބޯހިޔާވަހިކަމުގެ ދެ ގަރާރެއް ހުކުރު ދުވަހު ކޮންގްރެސްއިން ފާސްނުވުމާ ގުޅިގެންނެވެ. ފުރަތަމަ ގަރާރުގައި ހިމެނެނީ 2030 ވަނަ އަހަރާ ހަމައަށް މީހުން ގެއިން ނެރުން މަޑުޖައްސާލުމާއި، 2028 ގެ ކުރިން ހަމަވާ ކުލީގެ އެއްބަސްވުންތައް އިތުރު ދެ އަހަރަށް ދެމެހެއްޓުމާއި، ފަތުރުވެރިންނަށް ކުއްޔަށްދޭ އެޕާޓްމަންޓްތަކުގެ ޓެކްސް ބޮޑުކުރުމުގެ އިތުރުން އިންވެސްޓްމަންޓް ފަންޑުތަކުން ގޯތިގެދޮރު ގަތުން ހިފެހެއްޓުމެވެ. ދެވަނަ ގަރާރުގައި ހިމެނެނީ ކުލީގެ އެއްބަސްވުންތައް އޮޓޮމެޓިކުން އާވާ ގޮތަށް ހެދުމެވެ.
ކޮންގްރެސްގެ މެންބަރުން ފުރަތަމަ ގަރާރު ބޭރުކޮށްލީ 178 ވޯޓު 172 ވޯޓުންނެވެ. އަދި ދެވަނަ ގަރާރު ބޭރުކޮށްލީ 184 ވޯޓު 166 ވޯޓުންނެވެ. މި ގަރާރުތައް ފާސްނުވީ ކޮންޒަވޭޓިވް ޕީޕަލްސް ޕާޓީ (ޕީޕީ) އާއި ކަނާތުފިޔައިގެ ވޮކްސް ޕާޓީގެ އިތުރުން ކެޓަލޯނިއާ އަދި ބާސްކް ކަންޓްރީގެ ބައެއް ނޭޝަނަލިސްޓް ޕާޓީތަކުން ދެކޮޅަށް ވޯޓު ދިނުމުންނެވެ.
ސަރުކާރުން މި ގަރާރުތައް އެކުލަވާލީ ސެޕްޓެންބަރު މަހު އުމުރުން 87 އަހަރުގެ މަރިކާމެން އަބަސްކާލް ގެއިން ނެރުމާ ގުޅިގެން އުފެދުނު މުޒާހަރާތައް ހުއްޓުވުމަށެވެ. އާންމުންގެ ފާޑުކިޔުންތަކާ ގުޅިގެން އެ އެޕާޓްމަންޓްގެ ވެރިފަރާތުން ފަހުން ވަނީ ކުޑަ ކުއްޔެއްގައި އޭނާއަށް އަނބުރާ އެތަނަށް ވަދެވޭނެ ގޮތް ހަމަޖައްސައިދީފައެވެ. ނަމަވެސް މުޒާހަރާތައް އަދިވެސް ދަނީ ކުރިއަށެވެ.
ބޭންކް އޮފް ސްޕެއިން އިން އަންދާޒާކުރާ ގޮތުގައި އެ ގައުމަށް 7 ލައްކަ ގޭގެ ދަތިކަން ވަނީ ކުރިމަތިވެފައެވެ. ގައުމީ ތަފާސްހިސާބުތަކާ ބެހޭ އިދާރާ (އައިއެންއީ) އިން ބުނާ ގޮތުގައި 2026 ވަނަ އަހަރުގެ ދެވަނަ ކުއާޓަރާ ހަމައަށް ފާއިތުވި އަހަރުގެ ތެރޭގައި ގޭގެ އަގުތައް ވަނީ 12.2 އިންސައްތަ އުފުލިފައެވެ.
ރިއަލް އެސްޓޭޓް ކުންފުނި އައިޑިއަލިސްޓާއިން ހާމަކުރި ގޮތުގައި 2025 ވަނަ އަހަރު ކުލީގެ އަގުތައް 8.5 އިންސައްތަ ބޮޑުވެފައިވާއިރު، މެޑްރިޑްގައި އެކަނިވެސް ކުލި ވަނީ 9.7 އިންސައްތަ އުފުލިފައެވެ. އެ ކުންފުނިން ބުނި ގޮތުގައި ސްޕެއިންގައި ކުލި އެންމެ ބޮޑީ ބާސެލޯނާ އަދި މެޑްރިޑްގައެވެ. ބާސެލޯނާގައި އަކަމީޓަރަކަށް 23.80 ޔޫރޯ ޖެހޭއިރު، މެޑްރިޑްގައި އަކަމީޓަރަކަށް ޖެހެނީ 22.70 ޔޫރޯއެވެ.