ސައުދީ އަރަބިއްޔާގެ ވެރިރަށް ރިޔާޒުގައި ހުންނަ ސައުދީ އަރާމްކޯ ކުންފުނީގެ މަރުކަޒަކަށް ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދީފިއެވެ.
އީރާނުގެ ތާއީދު އޮންނަ ޔަމަނުގެ ހޫތީ ޖަމާއަތުން ވަނީ މި ހަމަލާގެ ޒިންމާ ނަގައިފައެވެ. ހޫތީންގެ އަސްކަރީ ތަރުޖަމާނު ޔަހްޔާ ސަރީއާ ހަވާލާދީ އަލްމަސީރާ ޓީވީން ރިޕޯޓުކޮށްފައިވާ ގޮތުގައި، މި ހަމަލާތައް ވަނީ އޭގެ އަމާޒަށް ވާސިލުވެފައެވެ. އަދި ހަމަލާގެ ސަބަބުން އެ މަރުކަޒުގައި އަލިފާން ރޯވި ކަމަށް ވެސް އޭނާ ބުނެފައިވެއެވެ.
ރޮއިޓާސްއިން ރިޕޯޓުކޮށްފައިވާ ގޮތުގައި، އިއްޔެ ރިޔާޒުގެ ދެކުނުގައި ހުންނަ އަރާމްކޯގެ މަރުކަޒެއް ހުންނަ ސަރަހައްދުން ބޯ ދުމާއި އަލިފާންގަނޑެއް އަރަމުންދިޔަ މަންޒަރު ވަނީ ފެނިފައެވެ. މީގެ އިތުރުން، އެ ސަރަހައްދުގައި އަލިފާން ނިއްވާ މީހުން ހަރަކާތްތެރިވަމުންދިޔަ ކަމަށާއި، ފުލުހުންނާއި އެމްބިއުލާންސްތައް އެ ސަރަހައްދުގައި ހަރަކާތްތެރިވި ކަމަށް އޭއެފްޕީގެ ނޫސްވެރިންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.
ނަމަވެސް، މި ހަމަލާއާ ގުޅޭގޮތުން ސައުދީ އަރަބިއްޔާގެ ރަސްމީ ފަރާތްތަކުން އަދި އެއްޗެއް ބުނެފައެއް ނުވެއެވެ. އަދި މިކަމާ ގުޅޭގޮތުން ދުނިޔޭގެ އެންމެ ބޮޑު އެއް ތެޔޮ ކުންފުނި ކަމަށްވާ ސައުދީ އަރާމްކޯއިން ވެސް ވަކި އެއްޗެއް ހާމަކޮށްފައެއް ނުވެއެވެ.
އަރަމްކޯގެ މަރުކަޒަށް ހަމަލާ ދިނުމުން ދުން އަރަނީ-- ފޮޓޯ: ރޮއިޓާސްހޫތީން ބުނި ގޮތުގައި، ރިޔާޒަށް މި ހަމަލާ ދިނީ ސައުދީ ކޯލިޝަނުން ޔަމަނުގެ ވެރިރަށް ސަންއާއާއި އެހެނިހެން ސަރަހައްދުތަކަށް ދެމުންދާ ހަމަލާތަކުގެ ބަދަލުހިފުމަށެވެ. ހޫތީންނާ ގުޅުން ހުރި މީޑިއާތަކުން ރިޕޯޓުކޮށްފައިވާ ގޮތުގައި، ފާއިތުވި ގަޑިއިރުތަކުގެ ތެރޭގައި ސައުދީގެ މަތިންދާބޯޓުތަކުން ވަނީ ސަންއާއަށް 26 ހަމަލާއެއް ދީފައެވެ. މި ހަމަލާތަކުގައި ލިބުނު ގެއްލުމުގެ ތަފްސީލެއް އަދި ސާފެއް ނުވެއެވެ.
ރިޔާޒަށް ދިން ހަމަލާއަކީ 2022 ވަނަ އަހަރު ގާއިމުކުރި ވަގުތީ ސުލްހައިގެ އެއްބަސްވުން އުވި، ސައުދީ އަރަބިއްޔާއާއި ހޫތީންނާ ދެމެދު ހިނގަމުންދާ ހަމަނުޖެހުންތައް އަލުން އިތުރުވެފައިވާ ދަނޑިވަޅެއްގައި ދިން ހަމަލާއެކެވެ.
މީގެ ކުރިން، ފާއިތުވި ހަފުތާގައި ޔަންބޫގައި ހުންނަ އަރާމްކޯގެ މަރުކަޒުތަކަށް ވެސް މިސައިލާއި ޑްރޯން ބޭނުންކޮށްގެން ހަމަލާދިން ކަމަށް ހޫތީން ވަނީ ބުނެފައެވެ. އެ ފަހަރު ސައުދީން ބުނެފައިވަނީ، ތާއިފް އަދި ޔަންބޫ ސަރަހައްދަށް އަމާޒުކޮށް ހޫތީން ފޮނުވާލި ހަ ބެލިސްޓިކް މިސައިލް ވައްޓާލާފައިވާ ކަމަށާއި، އަރާމްކޯގެ އެއްވެސް މަރުކަޒަކަށް ގެއްލުމެއް ލިބިފައިނުވާ ކަމަށެވެ.
ޔަމަނުގެ ދާހިލީ ހަނގުރާމައިގައި ސައުދީ ކޯލިޝަނުން ބައިވެރިވާން ފެށި ފަހުން، ހޫތީން ދަނީ ސައުދީގެ މުހިންމު އުމްރާނީ ވަސީލަތްތަކަށާއި ތެލުގެ މަރުކަޒުތަކަށް އަމާޒުކޮށް ގިނަ ހަމަލާތަކެއް ދެމުންނެވެ. ފަހަކަށް އައިސް ހޫތީން ވަނީ ރަތް ކަނޑުގެ އައްސޭރިފަށުގެ ބޮޑު ބައެއްގެ ކޮންޓްރޯލް ނަގައި، އެ ސަރަހައްދުގައި ވެސް ހަރަކާތްތައް އިތުރުކޮށްފައެވެ.