އުރީދޫގެ ސީއީއޯ ޝާދީ ގަވާސްމީ މިއަދު ސޯޝަލް މީޑިއާގައި ލައިވް ޗެޓް މެދުވެރިކޮށް ބައިވެރިވެވަޑައިގެން، އާންމުންގެ ސުވާލުތަކަށް ޖަވާބުދޭ ގޮތަށް ހަމަޖެހިއްޖެއެވެ.
މިއީ އެ ކުންފުނީގެ ކަސްޓަމާ ސާވިސް ހަފުތާގެ ހަރަކާތްތަކުގެ ތެރެއިން ކުރިއަށްގެންދާ ސެޝަނެކެވެ.
މި ލައިވް ޗެޓް ސެޝަން ކުރިއަށްދާނީ މިއަދު ހެނދުނު 11:00 އިން ފެށިގެން 11:30 އަށެވެ. އުރީދޫން ބުނި ގޮތުގައި، މި ސެޝަން އެ ކުންފުނީގެ މައިގަނޑު ހުރިހާ ސޯޝަލް މީޑިއާ މަންސަތަކެއްގައި ސުވާލު ފޮނުވޭނެއެވެ. އޭގެ ތެރޭގައި ފޭސްބުކް، އެކްސް އަދި އިންސްޓަގްރާމް ހިމެނެއެވެ.
މި ޕްލެޓްފޯމުތައް މެދުވެރިކޮށް ކަސްޓަމަރުންނަށް ސީދާ ޗެޓް މެދުވެރިކޮށް ސީއީއޯއާ ސުވާލުކުރުމުގެ ފުރުސަތު ހުޅުވާލާފައިވާއިރު، ލައިވް ކުރިއަށްދާ ވަގުތު ފޮނުވާ ސުވާލުތަކަށް ޝާދީ ގަވާސްމީ ވަގުތުން ޗެޓް މެދުވެރިކޮށް ޖަވާބުދެއްވާނެއެވެ.
މިއަދުގެ ލައިވް ސެޝަންގެ އިތުރުން، ކަސްޓަމާ ސާވިސް ހަފުތާ ފާހަގަކުރުމުގެ ގޮތުން މި ހަފުތާގެ ތެރޭގައި އުރީދޫގެ މެނޭޖްމަންޓާއި އާންމު މުވައްޒަފުން ކަސްޓަމަރުންނާ ސީދާ ބައްދަލުކުރުމަށް ވަނީ ހަމަޖެހިފައެވެ. އެގޮތުން، ކަސްޓަމަރުންނަށް ހިދުމަތްދޭ އެކި މަރުކަޒުތަކަށް މެނޭޖްމަންޓުގެ އިސްވެރިންނާއި މުވައްޒަފުން ޒިޔާރަތްކުރާނެއެވެ. މި ޒިޔާރަތްތަކުގެ މައިގަނޑު ބޭނުމަކީ ކަސްޓަމަރުންނާ ބައްދަލުކޮށް، ކުންފުނިން ފޯރުކޮށްދޭ ހިދުމަތްތަކާ ގުޅޭގޮތުން ކަސްޓަމަރުންގެ ހިޔާލާއި ފީޑްބެކް ހޯދުން ކަމަށް އުރީދޫން ބުނެފައިވެއެވެ.