މާލޭ މަގުތައް ހެދުމުގެ މަޝްރޫގެ ދަށުން އަމީނީ މަގުގައި ޒަމާނީ ފެންވަރަށް ތަރައްގީކުރި ސަރަހައްދު ރޭ އާންމުންނަށް ހުޅުވާލައިފިއެވެ.
އަމީނީ މަގު ޒަމާނީ ފެންވަރަށް ތަރައްގީކުރުމަށް ހަވާލުކޮށްފައިވާ އެމްޓީސީސީއިން ވަނީ އަމީނީ މަގުގެ ސެގްމެންޓް އެކެއް އަދި ދޭއްގެ މަސައްްކަތް ނިންމާއާންމުންނަށް ހުޅުވާލާފައިވާ ކަމަށް ބުނެފައެވެ.
އެގޮތުން ސެގްމެންޓް އެކެއްގެ ދަށުން ކޮށްފައިވާ މަސައްކަތްތަކުގެ ތެރޭގައި ކުރިން އަޅާފައިވާ އޭބީސީ ފަށަލައާއި ތާރު ނެގުމަށްފަހު 2،794 އަކަމީޓަރު ސަރަހައްދުގައި ސަބްގްރޭޑް ސަބްބޭސް އަދި އޭބީސީގެ އިތުރުން ތާރު އެޅުމުގެ މަސައްކަތް ކޮށްފައިވާކަން އެމްޓީސީސީއިން ވަނީ ފާހަގަކޮށްފައެވެ.
މީގެ އިތުރުން ސެގްމެންޓް ދޭއްގެ ދަށުން ކޮށްފައިވާ މަސައްކަތުގެ ތެރޭގައި 133 އަކަމީޓަރު ސަރަހައްދެއްގައި ކުރިން އަޅާފައިވާ ތާރު ނެގުމަށްފަހު، އަލުން އެ ސަރަހައްދުގައި އޭބީސީއާއި ތާރު އެޅުމުގެ މަސައްކަތް ކޮށްފައިވާކަމަށް އެމްޓީސީސީއިން ވަނީ ބުނެފައެވެ.
އެމްޓީސީސީއިން ބުނީ ސެގްމެންޓް އެކެއް އަދި ދޭއްގެ މަސައްކަތް ނިމުމާއެކު އެ މަޝްރޫގެ ދަށުން ދެން ހަމަޖެހިފައިވާ ބައިތަކުގެ މަސައްކަތްވެސް ކުރިއަށްދާނެ ކަމަށެވެ. އަދި މިހާރު ހުޅުވާލެވުނު ސަރަހައްދާއެކު އެ މަގު ބޭނުންކުރުމުގައި ކުރިންހުރި ދަތިތައް ހައްލުވެ، މަގު ބޭނުންކުރާ ހުރިހާ ފަރާތްތަކަށްވެސް ވަރަށް ބޮޑު ލުއި ފަސޭހަތަކެއް ލިބިގެންދާނެކަން އެ ކުންފުނިން ވަނީ ފާހަގަކޮށްފައެވެ.
އަމީނީ މަގުގައި އަލަށް ތަަރައްގީކުރި ސެގްމެންޓް އެކެއް އަދި ދޭއް އާންމުންނަށް ހުޅުވާލައިފި --- ފޮޓޯ: އެމްޓީސީސީއެމްޓީސީސީއިން ބުނީ އިއްޒުއްދީން މަގުން ފެށީގެން ކޯރުކެނޑި މަގާ ހަމައަށް ތަރައްގީކުރުމަށް ނިންމާފައިވާ އަމީނީ މަގުގެ ތިން ވަނަ ސެގްމެންޓްގެ މަސައްކަތްތަކުގެ ތެރޭގައި 1،924 އަކަމީޓަރު ސަރަހައްދުގައި ކުރިން އަޅާފައިވާ ތާރު ނެގުމަށްފަހު އަލުން ތާރުއަޅައި މަގުގައި ނިޝާންތައް ކުރެހުން ހިމެނޭ ކަމަށެވެ.
މީގެ އިތުރުން ކޯރު ކެނޑި ހިނގުމުން ފެށިގެން ގިޔާސުއްދީން އިންޓަނޭޝަނަލް ސްކޫލާއި ހަމައަށް ހިމެނޭ ސެގްމެންޓް ހަތަރެއްގެ މަސައްކަތުގައިވެސް 1،148 އަކަމީޓަރު ސަރަހައްދުގައި ކުރިން އަޅާފައިވާ ތާރު ނެގުމަށްފަހު އަލުން ތާރުއަޅައި މަގުގައި ނިޝާންތައް ކުރެހުން ހިމެނޭ ކަމަށް އެ ކުންފުނިން ވަނީ ބުނެފައެވެ.
އަމީނީ މަގުގައި އަލަށް ތަަރައްގީކުރި ސެގްމެންޓް އެކެއް އަދި ދޭއް އާންމުންނަށް ހުޅުވާލައިފި --- ފޮޓޯ: އެމްޓީސީސީފާހަގަކޮށްލެވޭ ގޮތުގައި ފުލުހުން އިއްޔެ ވަނީ އަމީނީ މަގު ތަރައްގީ ކުރުމުގެ މަޝްރޫއަށް މާފަންނު ދަނޑުން ފެށިގެން ހައުސިން މިނިސްޓްރީގެ ކުރީގެ އޮފީހާ ހަމައަށް އޮތް ސަރަހައްދު ބަންދުކޮށް، އެ ސަރަހައްދުގައި ހުރި އުޅަނދުފަހަރު ނަގަން އަންގާފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ޕްލޭނިން މިނިސްޓްރީން އާރުޑީސީއާ އަމީނީ މަގު ޒަމާނީ ފެންވަރަށް ހެދުމުގެ މަސައްކަތް ހަވާލުކުރީ 84.4 މިލިއަން ރުފިޔާއަށެވެ.
މީގެ ދެ އަހަރު ކުރިން މި ސަރުކާރުން ވެރިކަމާ ހަވާލުވުމަށްފަހު އަމީނީ މަގުގެ އެންމެ ފަހު ސެގްމަންޓުގައި ތާރު އަޅައި ނިންމައިލިއެވެ. އެކަމަކު، ހާބަރު ފުޑްކޯޓު ސަރަހައްދުގައި "މުލިހި"ތަކެއްހެން ތާރުގަނޑު އުފުލި، އެ މަގުން ދަތުރުކުރާ ފަރާތްތަކަށް ބޮޑެތި ތަކުލީފުތަކަކާ ކުރިމަތިލާންޖެހުނެވެ.
އެހެންވެ، އެ ކަމުގެ ޝަކުވާ ބޮޑުވެ، ސަރުކާރަށް ފާޑުކިޔުން ވެސް އަމާޒުވިއެވެ.