އެސްޓީއޯގެ ފުރާޅަށް އަރައި، އެ ތަނުގައި ހުރި ތިން އޭސީ އައުޓްޑޯ ޔުނިޓެއް ރޫޅާލައި މުދަލަށް ގެއްލުންދިން މައްސަލައިގައި މީހެއްގެ މައްޗަށް ކުށް ސާބިތުވެ، އޭނާ ޖަލަށް ލުމަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައިގައި ހުކުމްކޮށްފައިވަނީ ސ. ފޭދޫ ޔެލޯހައުސް، މުޙައްމަދު ޝިއުނީޒްގެ މައްޗަށެވެ. އޭނާގެ މައްޗަށް ދައުލަތުން ދެ ދައުވާއެއް އުފުލިއެވެ. އެއީ އެނގިހުރެ ހުއްދަނޫން ތަނަކަށް ވަނުމުގެ ދައުވާއާއި، މުދަލަށް ގެއްލުން ދިނުމުގެ ދައުވާއެވެ.
ޝަރީއަތުން ނިންމެވި ނިންމެވުމުގައިވާ ގޮތުން، 18 މޭ 2026 ގައި ޝިއުނީޒް ވަނީ އެސްޓީއޯގެ ހުއްދައެއް ނެތި އެ ތަނުގެ ފުރާޅަށް އަރައި، އެނގިހުރެ ހުއްދަނޫން ތަނަކަށް ވަދެފައެވެ. އަދި ފުރާޅަށް އަރުމަށްފަހު، އެސްޓީއޯގެ ތިން އޭސީ އައުޓްޑޯ ޔުނިޓެއް ރޫޅާލައި، އެ މުދަލަށް ވަނީ ބޮޑެތި ގެއްލުންތަކެއް ދީފައެވެ.
މި ދެ މައްސަލައިގެ ޝަރީއަތް ކްރިމިނަލް ކޯޓުގައި ކުރިއަށް ގޮސް ނިމުނުއިރު، ދައުލަތުން ހުށަހެޅި ހެކިތަކާއި ލިޔެކިޔުންތަކުން ޝިއުނީޒް މި ކުށްތައް ކުރިކަން އެކަށީގެންވާ މިންވަރެއްގެ ޝައްކެއްނެތި ވަނީ ސާބިތުވެފައެވެ.
އެނގިހުރެ ހުއްދަނޫން ތަނަކަށް ވަނުމުގެ ކުށުގައި ދިވެހިރާއްޖޭގެ ގާނޫނުލްއުގޫބާތުގެ 230 ވަނަ މާއްދާގެ ދަށުން ކުށް ސާބިތުވާ ކަމަށް ކަނޑައަޅައި، ގާނޫނުގައިވާ ގޮތުގެ މަތިން ވަނީ އަދަބު ކަނޑައަޅާފައެވެ. އަދި މުދަލަށް ގެއްލުން ދިނުމުގެ ކުށުގައި ގާނޫނުލްއުގޫބާތުގެ 220 ވަނަ މާއްދާގެ ދަށުން ކުށް ސާބިތުވާ ކަމަށް ކަނޑައަޅައި، ޖަލު އަދަބު އިއްވައި، މުދަލަށް ދިން ގެއްލުމުގެ ބަދަލު ނަގައިދިނުމަށް ވަނީ ހުކުމްކޮށްފައެވެ.
އެނގިހުރެ ހުއްދަ ނޫންތަނަކަށް ވަނުމުގެ ކުށް ސާބިތުވެ އިއްވާފައިވަނީ ދެ މަހާއި 28 ދުވަހުގެ ހުކުމެކެވެ. އަދި މުދަލަށް ގެއްލުން ދިނުމުގެ ކުށް ސާބިތުވެ އިއްވާފައިވަނީ ތިން މަހުގެ ހުކުމެކެވެ.