އިގުތިސާދީ ގޮތުން އެންމެ ކުރިއަރައިފައިވާ ގައުމުތައް ހިމެނޭ ޖީ7 ގައުމުތަކުން 100 މިލިއަން ފީފާގެ ސާފުނުކުރާ ތެލާއި ޑީސަލް ބާޒާރަށް ނެރެން ނިންމައިފިއެވެ.
އެމެރިކާ، އިނގިރޭސިވިލާތް، ކެނެޑާ، ޖަޕާން، ޖަރުމަނުވިލާތް، އިޓަލީ އަދި ފަރަންސޭސިވިލާތް ހިމެނޭ ގޮތަށް އެކުލަވާލާފައިވާ ޖީ7 ގެ މި ނިންމުމަކީ، މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ ސަޕްލައި މަދުވެ އަގުތައް އުފުލުމުގެ ސަބަބުން ކުރިމަތިވެފައިވާ ކަންބޮޑުވުންތަކަށް ހައްލެއް ހޯދުމަށް އެޅި ފިޔަވަޅެކެވެ. އަދި އެ ގައުމުތަކުން އެގޮތަށް ނިންމީ، އެމެރިކާއިން ޑީސަލް ބޭރުކުރުން ހުއްޓާލުމުގެ އިންޒާރު އެ ގައުމުގެ ރައީސް ޑޮނަލްޑް ޓްރަމްޕް ދެއްވި ފަހުންނެވެ.
ޖީ7ގެ ގައުމުތަކުން ބޭއްވި ބައްދަލުވުމުގައި ވަނީ، އިންޓަނޭޝަނަލް އެނާޖީ އޭޖެންސީ (އައިއީއޭ) މެދުވެރިކޮށް ކުރިއަށްގެންދާ މަސައްކަތެއްގެ ދަށުން، ކުރިއަށް އޮތް ހަތަރު މަސްދުވަހުގެ ތެރޭގައި ތެޔޮ ބާޒާރަށް ނެރެން ނިންމައިފައެވެ.
ޖީ7 ގެ ލީޑަރުން ނެރުއްވި ގުޅިފައިވާ ބަޔާނެއްގައި ބުނެފައިވަނީ، ފުރަތަމަ 20 ދުވަހުގެ ތެރޭގައި ގިނަ އަދަދެއްގެ ޑީސަލް ބާޒާރަށް ނެރުމަށް ހަމަޖެހިފައިވާ ކަމަށާއި، ބޭނުން ޖެހިއްޖެ ހާލަތެއްގައި އިތުރަށް ޑީސަލް ނެރުމާ ގުޅޭގޮތުން މަޝްވަރާކުރަމުންދާ ކަމަށެވެ.
އިނގިރޭސިވިލާތުގެ ފޮރިން ސެކްރެޓަރީ އެޑް މިލިބޭންޑް ވިދާޅުވި ގޮތުގައި، މި ފިޔަވަޅުގެ ސަބަބުން ހަކަތަ ފޯރުކޮށްދިނުން ޔަގީންވެ، ސަޕްލައި ޗެއިންތައް ވަރުގަދަވެ، އަގުތަކަށް އަންނަ ކުއްލި ބަދަލުތަކުން އާންމުންނާއި ވިޔަފާރިތައް ސަލާމަތްކޮށްދޭނެއެވެ.
ފަރަންސޭސިވިލާތުގެ ރައީސް އެމެނުއެލް މެކްރޯން ވިދާޅުވީ، ގުޅިގެން އަޅާ މި ފިޔަވަޅުގެ ސަބަބުން ތެލުގެ ބާވަތްތަކުގެ އަގު، ޚާއްސަކޮށް ޑީސަލްގެ އަގު ދަށްވާނެ ކަމަށެވެ. އަދި ޖީ7 ގައުމުތަކުގެ މެދުގައި ހަކަތަ އެކްސްޕޯޓުކުރުން މަނާނުކުރުމަށް އެއްބަސްވެފައިވާކަން ފާހަގަކުރައްވައި، ޓްރަމްޕް ވެސް އެކަމުގައި ވަރަށް ސާފުކޮށް ވާހަކަދެއްކެވި ކަމަށް މެކްރޯން ވިދާޅުވިއެވެ.
ޖީ7 ގެ މި ނިންމުމާއެކު، އެމެރިކާއިން ޑީސަލް އެކްސްޕޯޓުކުރުން މަނާކުރާނެ ކަމަށް ޓްރަމްޕް ދެއްވި އިންޒާރު ވަނީ އަނބުރާ ގެންދަވާފައެވެ. ޓްރަމްޕް އެ އިންޒާރު ދެއްވީ، ނޮވެންބަރު މަހު އޮންނަ މިޑްޓާމް އިންތިޚާބާ ދިމާކޮށް އެމެރިކާގެ ރައްޔިތުންނަށް ތަކުލީފު ކުޑަކޮށްދިނުމުގެ ގޮތުން ކުރައްވާ މަސައްކަތްތަކަށް، ތެލުގެ އަގު އުފުލުމާ ގުޅިގެން ހުރަސް އެޅިފައިވުމުންނެވެ.
ޖީ7ގެ ނިންމުމާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވަނީ، ޔޫރަޕުން ގިނަ އަދަދެއްގެ ޑީސަލް ބާޒާރަށް ނެރެން އެއްބަސްވެފައިވާ ކަމަށާއި، އެ މަސައްކަތް ވަގުތުން ފަށާނެ ކަމަށް ވިދާޅުވެފައެވެ. އަދި ފަހުން ވައިޓް ހައުސްގައި ވާހަކަދައްކަވަމުން ޓްރަމްޕް ވަނީ، ޑީސަލް އެކްސްޕޯޓުކުރުން މަނާކުރުމަކީ ހަގީގަތުގައި ކުރަން އުޅުނު ކަމެއް ނޫން ކަމަށް ވިދާޅުވެފައެވެ.
އެމެރިކާގެ އެނާޖީ އިންފޮމޭޝަން އެޑްމިނިސްޓްރޭޝަން (އީއައިއޭ) އިން ހާމަކޮށްފައިވާ ގޮތުގައި، އެމެރިކާއިން ދުވާލަކު ހަތަރު މިލިއަނާއި ފަސް މިލިއަން ފީފާއާ ދެމެދުގެ އަދަދަކަށް ޑީސަލް އުފައްދާއިރު، އޭގެ ތެރެއިން 3.6 މިލިއަން ފީފާ ބޭނުންކުރަނީ އެ ގައުމުގެ އެތެރޭގައެވެ. އަދި ބާކީވާ 1.2 މިލިއަނާއި 1.5 މިލިއަން ފީފާ އެކްސްޕޯޓުކުރެއެވެ.
ދުނިޔޭގެ ބާޒާރުގައި ތެލުގެ އަގަށް ބޮޑެތި ބަދަލުތަކެއް އަންނަމުންދާއިރު، އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމަ ފެށުމުގެ ކުރިން ބްރެންޓް ކްރޫޑް ފީފާއެއްގެ އަގު ހުރީ 73 ޑޮލަރުގައެވެ. ނަމަވެސް ތެލުގެ އަގު އުފުލެމުން ގޮސް ފީފާއެއްގެ އަގު 100 ޑޮލަރަށް އަރައިފައިވެއެވެ. އަދި ޓްރަމްޕްގެ އިންޒާރާ ގުޅިގެން 102 ޑޮލަރަށް އުފުލުނު ނަމަވެސް، ޖީ7ގެ ނިންމުމާއެކު އަނެއްކާވެސް އަގު ވަނީ 100އަށް ދަށްވެފައެވެ.