އެމެރިކާއިން ޑީސަލް އެކްސްޕޯޓުކުރުން މަނާކުރަން ވިސްނަވަމުންދާ ކަމަށް އެ ގައުމުގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން، ޔޫރަޕުގެ ގައުމުތަކުން ޑީސަލް ރިޒާވްތައް ބޭނުންކުރަން ފެށުމަށް އެމެރިކާއިން ބާރުއަޅަން ފަށައިފިއެވެ.
އެމެރިކާގެ ޓްރެޝަރީ ސެކްރެޓަރީ ސްކޮޓް ބެސެންޓް ވިދާޅުވި ގޮތުގައި، ޔޫރަޕުން ވަގުތުން ޑީސަލް ސަޕްލައި ނެރެން ތައްޔާރުވާން ޖެހެއެވެ. އޭނާ ފާހަގަކުރެއްވި ގޮތުގައި ތެލުގެ އަގު އުފުލެމުންދާ ދަނޑިވަޅެއްގައި އޭގެ ބުރަ އުފުލަން ޖެހޭ ބަޔަކީ އެމެރިކާގެ ދަނޑުވެރިންނާއި ވިޔަފާރިތައް ކަމުގައި ވެގެން ނުވާނެއެވެ.
އިއްޔެ ނޫސްވެރިންނާ ވާހަކަދައްކަވަމުން، ޔޫރަޕުގެ ރިޒާވްތައް ބޭނުންކުރަން އެދިވަޑައިގަންނަވާނެތޯ ސުވާލުކުރުމުން ޓްރަމްޕް ވިދާޅުވީ އެގޮތަށް އަމަލުކުރުން އެކަށީގެންވާ ކަމަށާއި، ޔޫރަޕުގައި ޑީސަލް އެބަހުރި ކަމަށެވެ.
ނޮވެންބަރު މަހު އޮންނަ އިންތިހާބާ ދިމާކޮށް އެމެރިކާގެ ވޯޓުލާ މީހުންނަށް ތެލުގެ އަގު ބޮޑުވުމުގެ މައްސަލަ ކުރިމަތިވެފައިވަނީ ފެބްރުއަރީ މަހު އީރާނުގައި ފެށުނު އެމެރިކާއާއި އިސްރާއީލުގެ ހަނގުރާމައާ ގުޅިގެންނެވެ. ދުނިޔޭގެ ތެލާއި ގޭހުގެ ފަސްބައިކުޅަ އެއްބައި އުފުލާ ހޯރުމުޒް ކަނޑުއޮޅި ބަންދުކުރުމުގެ ސަބަބުން ތެލުގެ ބާވަތްތަކުގެ އަގު ވަނީ ވަރަށް ބޮޑަށް އުފުލިފައެވެ.
މީގެ އިތުރުން، ދުނިޔޭގެ ބާޒާރަށް ޑީސަލް ފޯރުކޮށްދޭ މައިގަނޑު އަނެއް ގައުމު ކަމަށްވާ ރަޝިޔާއިން އެކްސްޕޯޓުކުރުން މަނާކުރުމުގެ ސަބަބުންވެސް އަގުތަކަށް ވަނީ އަސަރުކޮށްފައެވެ. އަދި ޗައިނާގެ އެތެރޭގެ ޑިމާންޑަށް އިސްކަންދިނުމުގެ ގޮތުން އެ ގައުމުގެ ރިފައިނަރީތަކުން އޮކްޓޫބަރު މަހު ބައެއް ބާވަތްތަކުގެ ތެޔޮ އެކްސްޕޯޓުކުރުން ހުއްޓާލާފައިވާ ކަމަށް ރިޕޯޓުތައް ބުނެއެވެ.
މިކަމާ ގުޅިގެން އިނގިރޭސިވިލާތުގެ އެނާޖީ މިނިސްޓަރު މާޓިން މެކްލަސްކީ ވަނީ އިއްޔެ ޔޫރަޕުގެ އިސް އޮފިޝަލުންނާ މަޝްވަރާކުރައްވާފައެވެ. ޔޫރަޕިއަން ކޮމިޝަންގެ ތަރުޖަމާނަކު ވިދާޅުވި ގޮތުގައި ޑީސަލްގެ މައްސަލައިގައި އެމެރިކާގެ އިސް އޮފިޝަލުންނާއެކު ގިނަ ބައްދަލުވުންތަކެއް ދަނީ ބާއްވަމުންނެވެ. މަޝްވަރާތަކުގެ މައުލޫމާތު އެނގޭ ފަރާތަކާ ހަވާލާދީ ބީބީސީން ރިޕޯޓުކޮށްފައިވާ ގޮތުގައި، އެހެން ގައުމުތަކާ ގުޅިގެން މިކަމަށް ފިޔަވަޅުތަކެއް އެޅުމަށް ދަނީ ތައްޔާރުވަމުންނެވެ. އަދި މިއަހަރުގެ ކުރީކޮޅު ބޭނުންކުރި ސްޓްރެޓީޖިކް ރިޒާވްތަކުގެ ބާކީ ޔޫރަޕުގައި އަދިވެސް އެބަހުރި ކަމަށް އެ ފަރާތުން ބުނެފައިވެއެވެ.
އެމެރިކާއަކީ ދުވާލެއްގެ މައްޗަށް 1.2 މިލިއަނާއި 1.5 މިލިއަން ފީފާއާ ދެމެދުގެ އަދަދަކަށް ޑީސަލް އެކްސްޕޯޓުކުރާ ގައުމެކެވެ. އާގަސް މީޑިއާގެ ޗީފް އިކޮނޮމިސްޓް ޑޭވިޑް ފައިފް ވިދާޅުވި ގޮތުގައި، އެމެރިކާގެ ސަޕްލައި ކަނޑާލައިފިނަމަ ބައިނަލްއަގުވާމީ ބާޒާރުގައި ޑީސަލްގެ އަގު އިންތިހާއަށް އުފުލިގެންދާނެއެވެ.
އެހެން ގޮތަކުން ސަޕްލައި ނުލިބިއްޖެނަމަ، އެމެރިކާއިން އެކްސްޕޯޓުކުރުން މަނާކުރުމަކީ އެހެން ގައުމުތަކުގައި ޑީސަލްގެ އަގު އިތުރަށް އުފުލިގެންދާނެ ކަމެއް ކަމަށް މާހިރުންނާ ހަވާލާދީ ރިޕޯޓުތަކުގައި ބުނެފައިވެއެވެ.
އިނގިރޭސިވިލާތުން ބޭނުންކުރާ ޑީސަލްގެ ދެބައިކުޅަ އެއްބަޔަށް ވުރެ ގިނަ އަދަދެއް އިމްޕޯޓުކުރާއިރު، އޭގެ 31 ޕަސެންޓް ގެންނަނީ އެމެރިކާއިންނެވެ. އިނގިރޭސިވިލާތުގައި ހަތަރު ރިފައިނަރީ ހިންގަމުންދިޔަ ނަމަވެސް، އެ ތަންތަނުން އުފައްދަނީ ގައުމަށް ބޭނުންވާ ވަރަށް ވުރެ މަދުންނެވެ. އާރްއޭސީގެ ތަފާސްހިސާބުތައް ދައްކާ ގޮތުން އިނގިރޭސިވިލާތުގައި ޑީސަލް ލީޓަރެއްގެ އަގު ވަނީ 142.38 ޕެންސް އިން 199.79 ޕެންސް އަށް އުފުލި، ރެކޯޑު މިންވަރަކަށް ބޮޑުވެފައެވެ.
އިނގިރޭސި ސަރުކާރުގެ ތަރުޖަމާނަކު ވިދާޅުވީ ޑީސަލް ލިބުމުގައި ދަތިތަކެއް ކުރިމަތިވެދާނެ ކަމުގެ ކަންބޮޑުވުމެއް ނެތް ކަމަށާއި، ބައިނަލްއަގުވާމީ ބައިވެރިންނާއެކު މަސައްކަތްކުރަމުންދާ ކަމަށެވެ. ޑިޕާޓްމަންޓް ފޯ ޓްރާންސްޕޯޓުގެ ތަފާސްހިސާބުތަކަށް ބަލާއިރު، ޖޫން މަހުގެ ނިޔަލަށް އިނގިރޭސިވިލާތުގައި 15.1 މިލިއަން ޑީސަލް އުޅަނދު ދުއްވައެވެ. މިއީ އޭގެ ކުރީ އަހަރު ހުރި 15.7 މިލިއަނާ އަޅައި ބަލާއިރު ދަށް އަދަދެކެވެ.