ދިވެހި ވަތަވީ ޚިދުމަތުގެ ޕްރޮގްރާމަށް އަހަރެއް ފުރުނުއިރު، އެ ޚިދުމަތަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކަނޑައެޅުއްވި ލަނޑުދަނޑިއަށްވުރެ އިތުރަށް ހާސިލްކުރެވިފައިވާ ކަމަށް ޑިފެންސް މިނިސްޓަރު ހަސަން ރަޝީދު މިއަދު ވިދާޅުވެއްޖެއެވެ.
ނޭޝަނަލް ސާވިސް ސްކިލް ޓްރެއިނިންގެ ދެވަނަ ބެޗުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައި މިނިސްޓަރު ވަނީ، ކޮންމެ ކަމެއްގައި ވެސް ގޮތްދޫނުކޮށް އެކަމެއްގައި ދެމިހުރުމަށް މަސައްކަތްކޮށްފިނަމަ ކޮންމެ ކަމެއްވެސް ކާމިޔާބުވާނެކަން ފާހަގަކުރައްވާފައެެވެ.
މިނިސްޓަރު ވަނީ ވަތަނީ ޚިދުމަތް ފުރިހަމަކުރުމަށްފަހު މުޖުތަމައަށް ނުކުންނަ ޒުވާނުންނަކީ އެހެން ހުރިހާ އެންމެންނަށް ނަމޫނާއަަކަށް ވާން ޖެހޭނެ ކަމަށް ވިދާޅުވެފައެވެ. އެ ކުދީންނަކީ ކޮންމެ ބަޔަކާއެކު، ކޮންމެ ފަދަ މާހައުލެއްގައި ވެސް މަސައްކަތްކުރެވޭނެ އަދި ކޮންމެ ހާލަތަކަށް ވެސް ކެތްތެރިވާން އެނގޭނެ ބަޔަކަށް ވާންވާނެ ކަމަށް މިނިސްޓަރު ވަނީ ވިދާޅުވެފައެވެ.
ނޭޝަނަލް ސާވިސް ސްކިލް ޓްރެއިނިންގެ ދެވަނަ ބެޗުގެ ދަސްވެނިވުމުގެ ރަސްމިއްޔާތުގެ ތެރެއިން --- ފޮޓޯ: ޑިފެންސް މިނިސްޓްރީމިނިސްޓަރު ވަނީ ދިވެހި ޒުވާނުންނަކީ ޚުލްގުހެޔޮ ޒިންމާދާރު ބަޔަކަށް ހެދުމަށް ރައީސް އިފުތިތާހުކޮށްދެވި ދިވެހި ވަތަނީ ޚިދުމަތަށް ނިމުނު ބުރާސްފަތި ދުވަހު އަހަރެއް ފުރިހަމަވެފައިވާއިރު، ރައީސް ކަނޑައެޅުއްވި ލަނޑުދަނޑިއަށްވުރެ އިތުރަށް ހާސިލްކުރެވިފައިވާ ކަމަށް ވިދާޅުވެފައެވެ.
ރައީސުލްޖުމްހޫރިއްޔާ ކަނޑައަޅުއްވާފައިވާ ލަނޑުދަނޑިއަކީ އެއް އަހަރު ދުވަހުގެ ތެރޭގައި އެއް ހާސް ދަރިވަރުން ތަމްރީނުކުރުން. އެހެން ނަމަވެސް އެއް އަހަރު ދުވަސް ތެރޭގައި އަޅުގަނޑުމެންގެ މުދައްރިބުން ވަނީ 1،028 ކެޑޭޓުން ތަމްރީނުކުރައްވާފަ. އެކަމަށްޓަކައި ހުރިހާ މުދައްރިބުންނަށް އަދި ޚާއްސަކޮށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒަށް އިޚްލާސްތެރިކަމާއެކު މަރުހަބާ ދަންނަވަން.ޑިފެންސް މިނިސްޓަރު ހަސަން ރަޝީދު
މިނިސްޓަރު ވަނީ މިފަދަ އަގުހުގުރި މަސައްކަތެއް ދިވެހި ގައުމަށްޓަކައި ފައްޓަވައިދެއްވައި، ކާމިޔާބުކަމާއެކު ކުރިއަށްގެންދާ ކަމަށްޓަކައި ރައީސަށް ޝުކުރުދަންނަވާފައެވެ.
ރާއްޖޭގެ ހުރިހާ އަތޮޅުތަކެއް ޝާމިލުވާ ގޮތަށް 167 ރަށަށް ނިސްބަތްވާ 1،028 ޒުވާނުން ނެޝަނަލް ސާވިސް އިނީޝިއަލް ޓްރެއިނިން ފުރިހަމަކުރިއިރު، އޭގެ ތެރެއިން 136 ޒުވާނުން ފަންނީ ތަމްރީނު ފުރިހަމަކޮށްފައިވާކަން މިނިސްޓަރު ވަނީ ފާހަގަކުރައްވާފައެވެ. މިނިސްޓަރު ވަނީ އެއީ މި ސަރުކާރުން ހާސިލްކޮށްފައިވާ ފަޚުރުވެރި ބޮޑު ކާމިޔާބީއެއްގެ ގޮތުގައި ސިފަކުރައްވައިފައެވެ.