މިހާރު ބޭނުންކުރާ އާޓިފިޝަލް އިންޓެލިޖެންސް (އޭއައި) މޮޑެލްތައް އިތުރަށް ތަރައްގީކުރުމަށް އިންސާނުންގެ އެހީތެރިކަމާއި ބެލެހެއްޓުން ބޭނުންވެއެވެ. ނަމަވެސް، އޭއައި އަމިއްލައަށް އޭގެ ނިޒާމުތައް ތަރައްގީކޮށް، އިންސާނުންގެ އެއްވެސް ދައުރެއް ނެތި ކުރިއަރައިގެން ހިނގައިދާނެ މުސްތަގުބަލަކާ މެދު ޓެކްނޮލޮޖީގެ ދާއިރާގައި އަންނަނީ ބަހުސްކުރަމުންނެވެ. "ރިކާސިވް ސެލްފް-އިމްޕްރޫވްމަންޓް" (އާރްއެސްއައި) ގެ ނަމުން ނަންދީފައިވާ މި ނަޒަރިއްޔާއަކީ، އޭއައި އަމިއްލައަށް އޭގެ ގާބިލުކަން އިތުރުކޮށް، އޭގެ ފަހުން އަންނަ މޮޑެލްތައް އަމިއްލައަށް އުފެއްދުމުގެ ގާބިލުކަން ލިބުމެވެ.
މި ނަޒަރިއްޔާގެ އެއް މާނައަކީ އޭއައި އެންމެ ވިސްނުންތޫނު އިންސާނުންގެ ފެންވަރަށް ވަރަށް ހަލުވިކަމާއެކު ތަރައްގީވެގެން ދިއުމެވެ. ގޫގުލް ޑީޕްމައިންޑްގެ ކުރީގެ ރިސާޗަރެއް ކަމަށްވާ އަދި އޭއައިގެ ރައްކާތެރިކަމަށް މަސައްކަތްކުރާ ޖަމިއްޔާއެއް ކަމަށްވާ ސަމްޕޫރާ ރިސާޗް އުފެއްދި ރިޝަބް ޖެއިން ބުނި ގޮތުގައި، އޭނާ އެންމެ ކަންބޮޑުވަނީ މި ހަލުވި ދުވެލީގައި އޭއައި ކުރިއަރައިގެން ދިއުމުންނެވެ. އޭއައި މާ ބޮޑަށް ސްމާޓްވެ، ދުނިޔެއިން ބޭރުގެ މަހުލޫގަކު ދުނިޔެ ހިފުން ފަދަ ހާލަތަކަށް ހިނގައިދާނެ ކަމަށް ދެކެވޭ ވާހަކަތަކަށް ވުރެ ބޮޑަށް، އޭނާ ކަންބޮޑުވަނީ އޭއައިގެ ގާބިލުކަން ކުއްލިއަކަށް އިތުރުވެ، އެ ނިޒާމުތަކުން ކުރާ ކަންކަން އިންސާނުންނަށް މޮނިޓާ ނުކުރެވޭ ހިސާބަށް ހިނގައިދާނެތީއެވެ.
“އޭއައިއަށް އެއްފަހަރާ މިލިއަނެއްހާ ކަންކަން ކުރުމުގެ ގާބިލުކަން ލިބުމުން، ނުވަތަ މުޅި ކުންފުންޏެއް ހިންގުމުގެ ބާރު ލިބުމުން، އެ ކުރާ ކަންކަމަކީ ރައްކާތެރި ކަންކަންތޯ އަހަރެމެންނަކަށް ނޭނގޭނެ،” ޖެއިން ބުނެފައިވެއެވެ. އޭނާ މިސާލެއްގެ ގޮތުން ފާހަގަކުރީ، އޭއައިގެ ތަރައްގީ ހަލުވިވެ، އޭގެ ރައްކާތެރިކަން ކަށަވަރުކުރާ މިންގަނޑުތަކަށް ވުރެ ކުރިއަރައިގެން ދިއުމުން މުޅި އިންޓަނެޓް ޑައުންވުން ފަދަ ހާލަތެއް މެދުވެރިވުމެވެ. ކޯޑިންގް ރަނގަޅުތޯ ބެލި ނަމަވެސް، ވެބް ސާވިސްތަކާ ގުޅިގެން އޭއައި މަސައްކަތްކުރާ ގޮތް ނުބެލިއްޖެ ނަމަ، އޭގެ ނަތީޖާއެއްގެ ގޮތުން އިންޓަނެޓް ހިދުމަތް ކެނޑިގެން ހިނގައިދާނެ ކަމަށް އޭނާ ބުންޏެވެ.
ކައުންސިލް އޮން ސްޓްރެޓީޖިކް ރިސްކްސްގެ ސީނިއާ ފެލޯއެއް ކަމަށްވާ ކްރިސްޓަލް ގްރާންޓް ބުނި ގޮތުގައި، އޭއައިގެ ސަބަބުން ގިނަ ފައިދާތަކެއް ލިބުމުގެ ފުރުސަތު އޮތް ނަމަވެސް، އޭގެ ނުރައްކާތެރި ސައިބާ ގާބިލުކަމާ މެދު އޭނާ ކަންބޮޑުވެއެވެ. އިންތިހާބެއް އޮންނަ ދުވަހު ކަރަންޓު ކަނޑާލުން ފަދަ ކަންކަން މެދުވެރިކޮށް، މުޖުތަމައުއަށް ބޮޑެތި ގެއްލުންތަކެއް ދިނުމުގެ ފުރުސަތު އޮތް ކަމަށް އޭނާ ފާހަގަކުރިއެވެ. އަދި އޭއައި އޭޖެންޓުން އަމިއްލައަށް ތަރައްގީވަމުންދާ ވަރަކަށް، އެ ނިޒާމުތަކުން ކުރާ ކަންކަން ސިއްރުކުރުމުގެ ގާބިލުކަން އިތުރުވެ، މިއީ ކޮން ބަޔަކު ކުރުވާ ކަމެއްކަން ނޭނގޭ ފަދަ އާ ސައިބާ ފިނި ހަނގުރާމައެއް ފެށިދާނެ ކަމުގެ ބިރު އޮތް ކަމަށް ގްރާންޓް ބުންޏެވެ.
މިފަދަ ކަންބޮޑުވުންތަކަށް ބާރުދޭ ހާދިސާއެއް މި ހޫނުމޫސުމުގައި ވަނީ ހިނގާފައެވެ. އޯޕަންއޭއައިގެ އޭޖެންޓެއް ވަނީ ޓެކް ކުންފުންޏެއް ކަމަށްވާ ހަގިންގް ފޭސްގެ ނިޒާމުގެ ތެރެއަށް ވަދެ، ހެކްކުރުމުގެ އަމަލުތަކެއް ހިންގާފައެވެ. ރިޕޯޓުތައް ބުނާ ގޮތުން، މިކަން އޯޕަންއޭއައިއަށް އެނގުނީ އެ ނުރައްކާ ކޮންޓްރޯލްކުރެވުނު ފަހުންނެވެ. މި ހާދިސާގެ ސަބަބުން، އޭއައި އޭޖެންޓުން އިންސާނުންގެ ކޮންޓްރޯލުން ނެއްޓިގެން ހިނގައިދާނެ ކަމާމެދު ޓެކްނޮލޮޖީގެ ސިނާއަތުގައި ވަނީ ސުވާލު އުފެދިފައެވެ.
އޭއައި އުފައްދާ ބޮޑެތި ކުންފުނިތަކުން ވެސް ވަނީ އޭއައި އަމިއްލައަށް ތަރައްގީވުމުގައި ހުރި ނުރައްކާތައް ގަބޫލުކޮށްފައެވެ. އޯޕަންއޭއައި އިން މި މަހު އާންމުކުރި ބްލޮގް ޕޯސްޓެއްގައި ބުނެފައިވަނީ، ރައްކާތެރިކަމާއެކު ފުރިހަމަ އާރްއެސްއައި އަކާ ހަމައަށް ދާނެ ގޮތެއް އަދި ނޭނގޭ ކަމަށެވެ. އެ ކުންފުނީގެ އަމާޒަކީ 2028 ވަނަ އަހަރުގެ މާޗް މަހުގެ ނިޔަލަށް އޮޓޮމޭޓެޑް އޭއައި ރިސާޗަރެއް އުފެއްދުމެވެ. މީގެ އިތުރުން، އެންތްރޮޕިކް ކުންފުނިން މި އަހަރުގެ ބަހާރުމޫސުމުގައި ބުނެފައިވަނީ، ފުރިހަމައަށް އޭއައި އަމިއްލައަށް ތަރައްގީވުމަކީ އިންސާނުންނަށް އޭއައި ސިސްޓަމްތަކުގެ ކޮންޓްރޯލް ގެއްލުމުގެ ނުރައްކާ ބޮޑުވެދާނެ ކަމެއް ކަމަށެވެ. އަދި އެ ކުންފުނީގެ ސީއީއޯ ޑާރިއޯ އަމޮޑެއި މިދިޔަ ސެޕްޓެންބަރު މަހު ބުނެފައިވަނީ، މިފަދަ މަސައްކަތްތައް ކުރިއަށް ގެންދަންވާނީ ވަރަށް ބޮޑަށް ފަރުވާތެރިވެގެން ކަމަށެވެ.
ނަމަވެސް، މި ނަޒަރިއްޔާއާ މެދު ތަފާތު ހިޔާލުތައް ވެސް އެބަހުއްޓެވެ.
ކޯނެލް ޔުނިވާސިޓީގެ ކޮމްޕިއުޓާ ސައިންސްގެ އެސިސްޓެންޓް ޕްރޮފެސަރެއް ކަމަށްވާ ޖޯން ތިކްސްޓަން ބުނި ގޮތުގައި، އޭއައި އަމިއްލައަށް ތަރައްގީވުމާ ގުޅޭގޮތުން ދެކެވޭ ވާހަކަތަކަކީ ހަގީގަތަށް ވުރެ މާ ބޮޑަށް ބޮޑުކޮށްފައިވާ ވާހަކަތަކެކެވެ. އޭނާ ބުނީ، ފުރިހަމައަށް އޮޓޮމޭޓްކޮށް އަމިއްލައަށް ތަރައްގީވާ ނިޒާމެއް ވަރަށް އަވަހަށް ފެނިދާނެ ކަމަށް ލަފާނުކުރާ ކަމަށެވެ. އޭގެ ސަބަބެއްގެ ގޮތުގައި އޭނާ ފާހަގަކުރީ، މި ޓެކްނޮލޮޖީގެ އާ ވަޝަންތައް ތަރައްގީކުރެވޭނެ ހަލުވިމިނުގައި ފިޒިކަލް ހުރަސްތަކެއް ހުރުމާއި، އޭއައިގެ ވިސްނުންތޫނުކަން އެއްވެސް ހައްދެއް ނެތި އިތުރުވަމުން ދާނެ ކަމަށް ގަބޫލުނުކުރުމެވެ.
ތިކްސްޓަން ގަބޫލުކުރާ ގޮތުގައި، ކުރިއަށް އޮތް ތާނގައި އޭއައި ސިސްޓަމްތައް ޓްރެއިންކުރުމުގައި އޭއައިގެ ދައުރު ބޮޑުވާނެއެވެ. އޭނާ އެންމެ ކަންބޮޑުވަނީ، މި މަސައްކަތްތައް އޭއައިއާ ހަވާލުކުރަމުންދާ ވަރަކަށް، މިހާރު ވެސް ދެނެގަންނަން އުނދަގޫ މި ނިޒާމުތަކުގެ ދެފުށްފެންނަ މިންވަރު ކުޑަވަމުން ދާނެތީއެވެ. މީގެ އިތުރުން، އޭއައިއަށް ވުރެ ބޮޑަށް އޭނާ ކަންބޮޑުވަނީ އޭއައި ކުންފުނިތަކުގެ އެތެރޭގައި އޮންނަ އޮނިގަނޑާ މެދުގައެވެ. ރައްކާތެރިކަމާއި ބެލެހެއްޓުމަށް ވުރެ ބޮޑަށް، ފައިދާ ލިބޭނެ އުފެއްދުންތައް ނެރުމަށް ކުންފުނިތަކުން އިސްކަންދޭތީ އެކަމާ މެދު ކަންބޮޑުވާ ކަމަށް ތިކްސްޓަން ބުނެފައިވެއެވެ.
މިފަދަ ކަންބޮޑުވުންތައް ހުރި ނަމަވެސް، އޭއައިގެ ސަބަބުން ގިނަ ފައިދާތަކެއް ލިބުމުގެ ފުރުސަތު އޮތްކަން މާހިރުން ފާހަގަކުރެއެވެ. އަދި އޭއައިގެ ގާބިލުކަން އެއްވެސް ހައްދެއް ނެތި އިތުރުވެދާނެ ކަމަށް ގަބޫލުނުކުރެވޭތީ، މިއީ ކޮންޓްރޯލުން ނެއްޓިދާނެ ޓެކްނޮލޮޖީއެއް ކަމަށް ބުނަން އަދި މާ އަވަސް ކަމަށް ތިކްސްޓަން ފަދަ ތަޖުރިބާކާރުން ދެކެއެވެ.