އިންޑިއާގެ މުމްބާއީގެ މިތީ ކޯރު ސާފުކޮށް ފުންކުރުމުގެ މަޝްރޫޢާ ގުޅިގެން ހިންގާފައިވާ ބޮޑު ޚިޔާނާތުގެ ތުހުމަތުގައި، ބޮލީވުޑްގެ މަޝްހޫރު އެކްޓަރު ޑީނޯ މޯރެއާ މުމްބާއީ ފުލުހުންގެ އިކޮނޮމިކް އޮފެންސަސް ވިންގް (އީއޯޑަބްލިއު)އިން ހައްޔަރުކޮށްފިއެވެ.
މީޑިއާ ރިޕޯޓްތައް ބުނާ ގޮތުގައި، މުމްބާއީގެ ބަންޑްރާގައި ހުންނަ މޯރެއާގެ ގެއަށް ފުލުހުން ވަދެ، ގާތްގަނޑަކަށް އަށް ގަޑިއިރު ވަންދެން އޭނާއާ ސުވާލުކުރުމަށްފަހު ހައްޔަރުކޮށްފައިވަނީ އިއްޔެގެ ވަގުތެއްގައެވެ. މި މައްސަލައަކީ މިތީ ކޯރުގެ ފުންމިން އިތުރުކޮށް، އަލުން އާރޯކުރުމަށް ބްރިހަންމުމްބާއީ މުނިސިޕަލް ކޯޕަރޭޝަން (ބީއެމްސީ)އިން ހަވާލުކުރި ކޮންޓްރެކްޓްތަކުގެ ތެރެއިން ހިންގާފައިވާ މާލީ ބޮޑެތި ޖަރީމާތަކަކާ ގުޅިގެން ބަލަމުންދާ މައްސަލައެކެވެ.
މި ޚިޔާނާތް ހިންގާފައިވަނީ ކޮންޓްރެކްޓަރުންނާއި، މެދުވެރިން އަދި ސިޓީ ކައުންސިލުގެ އިސް ވެރިން ގުޅިގެން، ކޮންޓްރެކްޓްތައް ދިނުމުގަ އާއި ފައިސާ ދޫކުރުމުގައި ނާޖާއިޒު މަންފާތަކެއް ހޯދައިގެންނެވެ. އީއޯޑަބްލިއުއިން އަންދާޒާކުރާ ގޮތުގައި މި ކޮރަޕްޝަންގެ ސަބަބުން ބީއެމްސީއަށް 65.54 މިލިއަން ރުޕީސްގެ ބޮޑު މާލީ ގެއްލުމެއް ވަނީ ލިބިފައެވެ.
މި މައްސަލައިގެ ތަޙުޤީޤުގެ ތެރެއިން މޯރެއާގެ ނަން ފާހަގަވީ، މި ޚިޔާނާތުގައި ޝާމިލުވާ ފަރާތްތަކާއެކު އޭނާ ކޮށްފައިވާ ފޯނު ކޯލުތަކުގެ ރެކޯޑުތަކުންނެވެ. މީގެކުރިން، މިދިޔަ އަހަރުގެ މެއި މަހުވެސް އީއޯޑަބްލިއުއިން ވަނީ މޯރެއާ އާއި އޭނާގެ ބޭބެ ސަންތީނޯ މޯރެއާއާ ސުވާލުކޮށްފައެވެ. އެ މަރުޙަލާގައި ތަޙުޤީޤީ އިދާރާތަކުން މައިގަނޑު ގޮތެއްގައި ބަލާފައިވަނީ ސަންތީނޯ ޑިރެކްޓަރުކަން ކުރާ ކުންފުންޏެއް ކަމަށްވާ "ޔޫބީއޯ ރައިޑްޒް ޕްރައިވެޓް ލިމިޓެޑް" މެދުވެރިކޮށް ހިންގާފައިވާ މާލީ މުޢާމަލާތްތަކެވެ.
ޑީނޯ އެންމެފަހުން ބެލުންތެރިންނަށް ފެނިފައިވަނީ މިދިޔަ އަހަރު ރިލީޒްކުރި ފިލްމު "ހައުސްފުލް 5"ގެ ރޯލަކުން--ފޮޓޯ/ފިލްމުފެއައީއޯޑަބްލިއުގެ ތަޙުޤީޤަށް ހޯދިފައިވާ މަޢުލޫމާތުތަކަށް ބަލާއިރު، މި ޚިޔާނާތުގެ މައިގަނޑު އެއް ތުހުމަތު އޮތް ކެތަން ކަދަމް ވަނީ އެކި ފަހަރު މަތިން 1.8 މިލިއަން ރުޕީސް ޔޫބީއޯ ރައިޑްޒްގެ ބޭންކު އެކައުންޓަށް ޖަމާކޮށްފައެވެ. ކަދަމްއަކީ މި ކޮންޓްރެކްޓްތަކުގައި ޝާމިލުވާ "ވޯޑަ އިންޑިއާ އެލްއެލްޕީ"އާ ސީދާ ގުޅުން އޮންނަ ފަރާތެކެވެ. އަދި ވޯޑަ އިންޑިއާ އާއި މޯރެއާގެ އާއިލީ ވިޔަފާރި ކަމަށްވާ ޔޫބީއޯ ރައިޑްޒް ހިންގަމުން އައިސްފައިވަނީ މުމްބާއީގެ ވޯރްލީގައި ހުންނަ ފޭމަސް ސްޓޫޑިއޯ ކައިރީގައި ހުރި އެއް ޢިމާރާތެއްގައެވެ.
މި މަޝްރޫޢުގެ ޓެންޑަރިންގް މަރުޙަލާ ކުރިއަށްދިޔަ ގޮތް ތަޙުޤީޤަށް ހާމަވެފައިވާ ގޮތުގައި، ސިޓީ ކައުންސިލުގެ އޮފިޝަލުން ވަނީ މިތީ ކޯރު ފުންކުރުމަށް ބޭނުންވާ ޚާއްޞަ މެޝިނަރީތައް ބެލުމަށް ކޮޗީއަށް ދަތުރުކޮށްފައެވެ. އެއަށްފަހު، ބީއެމްސީން ޓެންޑަރުތައް އެކުލަވާލައި އިޢުލާނުކުރީ އެ ދަތުރުގައި ފާހަގަކުރި މެޝިނަރީތަކުގެ ޝަރުޠުތަކާ އެއްގޮތްވާ ގޮތަށެވެ. އަދި އޭގެ ފަހުން، ނާޖާއިޒު ފައިދާ ނަގާ މެދުވެރިންތަކެއްގެ އަތުން އިންތިހާއަށް ބޮޑު އަގުގައި އެ މެޝިންތައް ކުއްޔަށް ހިފުމަށް ކޮންޓްރެކްޓަރުންނަށް މަޖުބޫރުކުރުވި ކަމަށް އީއޯޑަބްލިއުއިން ތުހުމަތުކުރެއެވެ.
މި މައްސަލައިގައި ހިމެނޭ މަނީ ލޯންޑްރިންގްގެ ބައިތައް އިންފޯސްމަންޓް ޑިރެކްޓްރޭޓް (އީޑީ) އިންވެސް އަންނަނީ ވަކި މައްސަލައެއްގެ ގޮތުގައި ތަޙުޤީޤު ކުރަމުންނެވެ. މިގޮތުން މިދިޔަ އަހަރުގެ ތެރޭގައި އީޑީން ވަނީ މުމްބާއީ އާއި ކޮޗީގެ އެކި ސަރަޙައްދުތަކުގައި ހުރި މޯރެއާގެ ގެއާއި، ބީއެމްސީގެ އޮފިޝަލުންނާއި ކޮންޓްރެކްޓަރުންގެ އިތުރުން މެދުވެރިންގެ އޮފީސްތައްވެސް ބަލައި ފާސްކޮށްފައެވެ.
މިތީ ކޯރު މަޝްރޫޢުގެ ކޮރަޕްޝަން ފުރިހަމައަށް ތަޙުޤީޤު ކުރުމަށްޓަކައި 2024 ވަނަ އަހަރު އީއޯޑަބްލިއުއިން ވަނީ ޚާއްޞަ އިންވެސްޓިގޭޝަން ޓީމެއް ވެސް އެކުލަވާލާފައެވެ. މި ތަޙުޤީޤުގެ ދަށުން ކެތަން ކަދަމް އާއި ޖަޔޭޝް ޖޯޝީ ހިމެނޭހެން މިހާތަނަށް ގިނަ ބަޔަކު ހައްޔަރުކޮށްފައިވާއިރު މި މުޢާމަލާތްތަކާ ގުޅޭ އިތުރު ތަޙުޤީޤުތައް ފުލުހުން އަދިވެސް ދަނީ ފުޅާ ދާއިރާއެއްގައި ކުރިއަށް ގެންދަމުންނެވެ.