އީގަލް ހިލްސްއިން ރަސްމާލޭގައި 20 ބިލިއަން ޑޮލަރުގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރަން އުޅޭއިރު އެ އުސޫލާ މެދު ހިތްހަމަޖެހިވަޑައިނުގެންނެވި ނަމަވެސް، ދެފުށް ފެންނަ ގޮތަކަށް އީގަލް ހިލްސްގެ މަޝްރޫއެއް އައްޑުއަށް ގެނައުމަށް މަރުހަބާ ކިޔާނެ ކަމަށް އައްޑޫ ސިޓީގެ މޭޔަރު އަލީ ނިޒާރު މިއަދު ވިދާޅުވެއްޖެއެވެ.
އެމްޑީޕީގެ ކޮންގްރެސްގެ ތެރެއިން ބޭއްވި އިންވެސްޓްމަންޓް ފޯރަމްގައި ވާހަކަދައްކަވަމުން މޭޔަރު ނިޒާރު ފާހަގަކުރެއްވީ، މިހާރު ރަސްމާލޭގައި އެ މަޝްރޫއު ކުރިއަށްގެންދާ މޮޑެލްއަށް އައްޑޫ ސިޓީ ކައުންސިލުން ތާއީދު ނުކުރާ ކަމަށެވެ. ނަމަވެސް ރައްޔިތުންނަށް ސާފުކޮށް ކަންކަން އެނގޭނެހެން އަދި ޖަވާބުދާރީ ވެވޭފަދަ އުސޫލަކުން އެފަދަ ބޮޑު މަޝްރޫއެއް އައްޑުއަށް އައިސްފިނަމަ އެކަމަށް މަރުހަބާ ކިޔާނެ ކަމަށް އޭނާ ވިދާޅުވިއެވެ.
ނިޒާރު ވިދާޅުވި ގޮތުގައި އީގަލް ހިލްސްގެ ޕްރޮޖެކްޓް މިހާރު އޮތް ގޮތަށް އައްޑުއަށް ގެންދަން ބޭނުންނުވި ނަމަވެސް، ކަންކަން ސާފުކޮށް ބުނެދެވޭނެ ގޮތަކަށް އިންވެސްޓްމަންޓްތައް އައުމަކީ އައްޑޫގެ ތަރައްގީއަށް އޮތް ފުރުސަތެކެވެ.
"އީގަލް ހިލްސްގެ ޕްރޮޖެކްޓް މިހާރު އެއޮތް ގޮތަށް އައްޑޫއަށް ގެންދާކަށް އަޅުގަނޑު ބޭނުމެއް ނޫން. މިހާރު އެ ގެންދާ ގޮތަކަށް. [ނަމަވެސް] ދެފުށް ފެންނަ ގޮތަށް، ރައްޔިތުންނަށް އެނގޭ ގޮތަށް އައްޑޫ ރައްޔިތުންނަށް ވެސް މިވާ އެއްޗެއް ބުނެދެވޭ ގޮތަށް އަންނަންޔާމުން މަރުހަބާ ކިޔާނަން،" ނިޒާރު ވިދާޅުވިއެވެ.
އަބޫދާބީގެ މަޝްހޫރު ޑިވެލޮޕަރު، އީގަލް ހިލްސް އާއި ދިވެހި ސަރުކާރާ ދެމެދު ރަސްމާލޭގައި 20 ބިލިއަން ޑޮލަރުގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް އެއްބަސްވުމުގައި ސޮއިކޮށްފައިވަނީ މިދިޔަ މަހުގެ 21ގައެވެ. މިއީ ރާއްޖޭގެ ތާރީޚުގައި ވެސް ހިންގަން ހުށަހެޅުނު ބޭރުގެ އެންމެ ބޮޑު އެއް އިންވެސްޓްމަންޓް މަޝްރޫއެވެ.
ފާހަގަކޮށްލެވޭ ގޮތުގައި ރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ވެފައިވާ ވިޔަފާރި އެއްބަސްވުމަކީ ގާނޫނުއަސާސީއާ ޚިލާފު އެއްބަސްވުމެއް ކަމަށް ކަނޑައަޅައި، އެ އެއްބަސްވުން ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ވެސް މިހާރު ވަނީ ހުށަހަޅައިފައެވެ.
ކޯޓަށް ހުށަހެޅި މައްސަލައިގައި ބަޔާންކޮށްފައި ވަނީ، ދައުލަތުގެ މުދަލެއް ނުވަތަ މިލްކިއްޔާތެއް ކުއްޔަށް ދިނުމާއި ދޫކުރުން ފަދަ ކަންކަން ކުރަންވާނީ ގާނޫނުގައިވާ ގޮތުގެ މަތިން ކަމަށް ގާނޫނުއަސާސީގެ 250 ވަނަ މާއްދާގައި ބަޔާންކޮށްފައި އޮންނަ ކަމަށެވެ. ނަމަވެސް ބޭރުގެ ފަރާތަކަށް އެއްފަހަރާ 99 އަހަރަށް މިފަދައިން ދައުލަތުގެ ބިން ދޫކުރެވޭނެ ގާނޫނީ އޮނިގަނޑެއް ނެތުމުން، މި އެއްބަސްވުމަކީ ގާނޫނުއަސާސީއާ ސީދާ ޚިލާފު ކަމެއް ކަމަށް ވަނީ ފާހަގަކޮށްފައެވެ.