އަތުގެ ކުޑަހުޅުގައި ރިއްސުމާއި، އިނގިލިތައް އައްސިވެ، ކަށިހެރޭ ފަދަ އުނދަގޫ އިހުސާސެއް ކުރެވުމަކީ ވަރަށް ގިނަ ބަޔަކު ތަޙައްމަލުކުރަމުންދާ ކަމެކެވެ. ޚާއްޞަކޮށް ރޭގަނޑުގެ ހަމަހިމޭން ވަގުތުތަކުގައި މި ތަދު އިތުރަށް ގަދަވެ، އަރާމު ނިދިން މަހުރޫމްވާނަމަ، މިއީ 'ކާޕަލް ޓަނަލް ސިންޑްރޯމް' (ސީޓީއެސް)ގެ ސަބަބުން ދިމާވާ ކަމަކަށް ވުން އެކަށީގެންވެއެވެ.
މި ބަލި މެދުވެރިވަނީ އަތުގެ ކުޑަހުޅު ހުރަސްކޮށް އިނގިލިތަކަށް ދަތުރުކުރާ މައި ނާރު ކަމަށްވާ 'މީޑިއަން ނާވް' ފިތި، އޭގެ މަސައްކަތަށް ބުރޫއެރުމުންނެވެ. މި ނާރަކީ އަތުގެ އިނގިލިތަކަށް އިހުސާސްތައް ފޯރުކޮށްދިނުމާއި، އަތްތިލައިގެ މުހިންމު ހަރަކާތްތައް ކޮންޓްރޯލްކުރުމުގައި އެންމެ އިސް ދައުރެއް އަދާކުރާ ނާރެވެ.
މި ބަލީގެ އަލާމާތްތައް އެކި މީހުންގެ ކިބައިން ފެންނަނީ އެކި މިންވަރަށެވެ. އެގޮތުން ކުޑަހުޅުގައި ރިއްސުމުގެ އިތުރުން، ބޮޑުވައި އިނގިލި، ޝަހާދަތް އިނގިލި، މެދު އިނގިލި އަދި ކަށި އިނގިލީގެ އެއްފަޅި އައްސިވުމާއި، ކަރަންޓު އަރާ ފަދަ އިހުސާސެއް ވުން ހިމެނެއެވެ.
މީގެ އިތުރުން، އެއްޗެހީގައި ހިފަހައްޓާއިރު އަތުން ވާގިދޫވެ، އަތުގައި ހުންނަ ތަކެތި ވެއްޓޭ ގޮތް ވެއެވެ. އަދި ރޭގަނޑުގެ ވަގުތުތަކުގައި އަތުގައި ދިލަނެގުމާއި ތޫނު އެއްޗަކުން ހަރާހެން ހީވާ އުނދަގޫތައް އިތުރުވެގެންދެއެވެ. މިފަދަ އަލާމާތްތަކަށް އަޅައިނުލައި ދޫކޮށްލައިފިނަމަ، ދުވަހެއް ދުވަހަކަށް ބަލީގެ ހާލަތު ގޯސްވެ، އާންމު ދިރިއުޅުމުގެ ކަންކަން ކުރުމަށް ބޮޑެތި ދަތިތަކާ ކުރިމަތިލާން ޖެހިދާނެއެވެ.
އަތް އައްސިވެ ރިއްސާނަމަ، ބަލީގެ އަސްލު ދެނެގަނެ، އެންމެ އެކަށޭނަ ފަރުވާ ހޯދުމަށްޓަކައި އަތުގެ ބަލިތަކާއި 'މައިކްރޯ ސާޖަރީ'އަށް ޚާއްޞަ ޑޮކްޓަރެއްގެ މަޝްވަރާ ހޯދުން މުހިންމު--ފޮޓޯ/އީއެމްސީކާޕަލް ޓަނަލް ސިންޑްރޯމަށް ފަރުވާ ދިނުމުގައި ބަލަނީ ބަލީގެ އަސަރު ހުރި މިންވަރަށާއި މީހާގެ ޖިސްމާނީ ހާލަތަށެވެ. ބަލީގެ ފުރަތަމަ މަރުހަލާގައި ދިރިއުޅުމުގެ ވައްޓަފާޅިއަށް ބަދަލުތަކެއް ގެނައުމާއި، ކުޑަހުޅު އެއްވަރެއްގައި ހިފެހެއްޓުމަށް އަޅާ ޚާއްޞަ 'ސްޕްލިންޓް' ބޭނުންކުރުމުގެ އިތުރުން، ތަދު ކަނޑުވާ ބޭހާއި ފިޒިއޮތެރަޕީގެ އެހީގައި މިކަމަށް ބޮޑު ލުޔެއް ލިބެއެވެ. ނަމަވެސް، ބަލީގެ ހާލަތު ވަރަށް ބޮޑަށް ގޯސްވެފައިވާނަމަ، ނާރުގެ ފިތުން ކުޑަކުރުމަށްޓަކައި ކުޑަ އޮޕަރޭޝަނެއް ކުރަން ޖެހިދާނެއެވެ.
އީއެމްސީ ޕެކަޔޯން ހޮސްޕިޓަލުގެ އޮތޯޕީޑިކް ޓްރޯމަޓޮލޮޖީ ސްޕެޝަލިސްޓް، ޑރ. ފްރެޑީ އަރިއަންޓޯ އިރުޝާދު ދެއްވާ ގޮތުގައި، އަތް އައްސިވެ ރިއްސާނަމަ ހަމައެކަނި އަތް މޮޑެލުމަކުން ނުވަތަ މަސާޖުކޮށްލުމަކުން ފަރުޖައްސާލައިގެން ނުވާނެއެވެ. ބަލީގެ އަސްލު ދެނެގަނެ، އެންމެ އެކަށޭނަ ފަރުވާ ހޯދުމަށްޓަކައި އަތުގެ ބަލިތަކާއި 'މައިކްރޯ ސާޖަރީ'އަށް ޚާއްޞަ އޮތޯޕީޑިކް ޑޮކްޓަރަކަށް ދައްކައިގެން ލަފާ ހޯދުމަކީ ނުހަނު މުހިންމު ކަމެކެވެ.
އަތް އައްސިވުމުގެ ސަބަބުން ތިބާގެ އުފާވެރި ދިރިއުޅުމަށާއި މަސައްކަތްތަކަށް ހުރަސްއެޅުނަ ނުދެއްވާށެވެ. ހަށިގަނޑުން ދައްކާ މިފަދަ އިންޒާރުތަކަށް ސަމާލުވެ، ކުރިއާލާ ސިއްހީ އެހީތެރިކަން ހޯއްދެވުމަކީ ފުރިހަމަ ސިއްހަތެއްގައި ދެމިހުރުމަށް އެޅޭނެ އެންމެ ރައްކާތެރި ފިޔަވަޅެވެ.