މައްކާގެ މަސްޖިދުލްހަރާމްގައި ޖާނުންފިދާވެގެން ހަމަލާއެއް ދޭން އުޅުނު ކަމަށް ފެތުރެމުންދާ ވާހަކަތައް ސައުދީ އަރަބިއްޔާގެ ކަމާބެހޭ ފަރާތްތަކުން މިއަދު ދޮގުކޮށްފިއެވެ.
ސައުދީގެ ޕަބްލިކް ސެކިއުރިޓީއާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، އެފަދަ އެއްވެސް ކަމެއް ހިނގާފައެއް ނުވެއެވެ. އޭގެ ބަދަލުގައި ސަލާމަތީ ބާރުތަކުން ހައްޔަރުކޮށްފައިވަނީ އާންމުންނަށް އުނދަގޫކޮށް، ބިރުވެރިކަން އުފެދޭ ގޮތަށް އަމަލުކުރި މީހެއް ކަމަށް އެ އިދާރާއިން ބުނެއެވެ.
މައްކާގެ ސަލާމަތީ ފަރާތްތަކުން އެ މީހާ ހައްޔަރުކުރީ މަސްޖިދުލްހަރާމްގެ ސަރަހައްދުގައި އުޅޭ މީހުންނަށް އުނދަގޫކޮށް، ހާސްކަން އުފެދޭ ގޮތަށް އަމަލުކުރުމާ ގުޅިގެން ކަމަށް ސައުދީން ބުންޏެވެ.
ކަމާބެހޭ ފަރާތްތަކުން ވަގުތުން އެ މައްސަލައަށް އެޓެންޑްވެ، އޭނާއާ މެދު ގާނޫނީ ފިޔަވަޅުތައް އަޅާފައިވާ ކަމަށް ޕަބްލިކް ސެކިއުރިޓީން ބުނެފައިވެއެވެ.
އެ މީހާގެ މައްސަލަ މިހާރު ވަނީ ޕަބްލިކް ޕްރޮސިކިއުޝަނަށް ފޮނުވާފައެވެ. މީގެ އިތުރުން، މި ހާދިސާއާ ގުޅޭގޮތުން ދައުރުވަމުންދާ ވާހަކަތަކަކީ ދޮގެއް ކަމަށް ކަނޑައަޅައި، ރަސްމީ ފަރާތްތަކުން މައުލޫމާތު ހޯދުމަށް ޕަބްލިކް ސެކިއުރިޓީން ވަނީ އާންމުންނަށް އިލްތިމާސްކޮށްފައެވެ.
މިފަދަ ވާހަކަތަކެއް ފެތުރިފައި މިވަނީ، ޔަމަނުގެ ހޫތީން މައްކާއަށް އަމާޒުކޮށް ހަމަލާތަކެއް ދޭން އުޅުނު ކަމަށް ބުނެ ސައުދީން ދާދި ފަހުން އެލާޓްތަކެއް ނެރެފައިވާ ދަނޑިވަޅެއްގައެވެ. އެގޮތުން، މިދިޔަ ސެޕްޓެމްބަރު މަހުގެ ތެރޭގައި މައްކާއަށް އަމާޒުކޮށް ހޫތީން ފޮނުވާލި ކަމަށް ބުނާ ޑްރޯނެއް ސައުދީގެ ސަލާމަތީ ބާރުތަކުން ވައްޓާލާފައިވާއިރު، މައްކާ އާއި ޖިއްދާ ފަދަ ސަރަހައްދުތަކަށް ވަނީ އެމަޖެންސީ އެލާޓް ނެރެފައެވެ. ނަމަވެސް ހޫތީން ވަނީ މައްކާއަށް ހަމަލާދޭން އުޅުނު ކަމަށް ބުނާ ވާހަކަތައް ދޮގުކޮށްފައެވެ.