މަސްތުވާތަކެތި ބޭނުންކުރިޔަސް އެ ތަކެތި ވިއްކާ ނުހަދާ ކަމަށް މަސްތުވާތަކެއްޗަށް ޔޫރިން ޕޮޒިޓިވް މީހަކު ކްރިމިނަލް ކޯޓުގައި އިއްޔެ ބުނެފިއެވެ.
އުތުރުގެ ރަށަކަށް ނިސްބަތްވާ 32 އަހަރުގެ ފިރިހެނަކު 15 ބަންދުކުރުމަށް ކޯޓުން ކުރި އަމުރުގައި ވަނީ، އޭނާއާ ދެކޮޅަށް ތުހުމަތުކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށެވެ. އޭގެތެރޭގައި ހިމެނެނީ، ސީނަށް ދިޔަ ފުލުހުންގެ ބަޔާނެވެ.
އޭނާގެ މައްޗަށް ކުރަނީ، މަސްތުވާތަކެތި ގެންގުޅެ، ބޭނުންކުރި ކަމުގެ ތުހުމަތެވެ.
އަމުރުގެ އިތުރު ބަޔާނުން އެނގޭ ގޮތުގައި، އެ މީހާގެ ޔޫރިންވަނީ މަސްތުވާތަކެއްޗަށް ޕޮޒިޓިވްވެފައެވެ. އެކަމަކު، އެއީ ކޮން ބާވަތެއްކަން ހާމަނުކޮށް ކޯޓުން ބުނީ، އޭނާއަކީ ކުށުގެ ރެކޯޑު އޮތް މީހެއް ކަމަށެވެ.
މި މައްސަލައިގައި ތުހުމަތުކުރެވޭ މީހާ މަސްތުވާތަކެތި ބޭނުންކުރާ ކަމަށް ކޯޓުގައި ވަނީ އެއްބަސްވެފައެވެ. އެކަމަކު، އޭނާއަކީ މަސްތުވާތަކެތި ވިއްކާ ވިޔަފާރި ކުރާ މީހެއްނޫން ކަމަށް ކޯޓުގައި އެ މީހާ ބުނެފައިވެއެވެ.
ކޯޓުން ވަނީ، އެ މީހާ ހައްޔަރުކޮށްފައި ވަނީ އިޖުރާއަތާ އެއްގޮތަށް ކަމަށް ކަނޑައަޅާފައެވެ.
ފާހަގަކުރެވޭ ގޮތުގައި، މަސްތުވާތަކެތީގެ މައްސަލަތައް ރާއްޖޭގައި އިތުރުއިރު، ހަށިގަނޑުގައި ފޮރުވައިގެންނާއި ޕެކޭޖު މެދުވެރިކޮށް އެތެރެކުރާ މަސްތުވާތަކެތި ދޭތެރެދޭތެރެއިން އަތުލައިގަނެއެވެ. އެ ފަދަ މައްސަލަތަކުގައި ބިދޭސީން ވެސް ހައްޔަރުކުރާއިރު، މި މައްސަލަ ހައްލުކުރުމަށް ސަރުކާރުން އަންނަނީ މަސައްކަތްތައް ކުރަމުންނެވެ.