ﷲ ތައާލާ ހަނދުމަކުރާ މީހަކާއި ނުކުރާ މީހެއްގެ މިސާލަކީ ދިރިހުރި މީހަކާއި މައްޔިތެއްގެ މިސާލުކަމަށް، ކީރިތި ރަސޫލާގެ ހަދީސް ބަސްފުޅެއްގެ އަލީގައި މިއަދުގެ ހުކުރު ހުޠުބާގައި ބުނެފިއެވެ.
"ގިނަގިނައިން ﷲ ހަނދުމަކުރުން" މި މައުޟޫއަށް މިއަދު އިއްވި ހުޠުބާގައި ބުނެފައިވަނީ، މިއަދުގެ މުޖުތަމައުގައި އާންމުވެފައިވާ ހާސްކަމާއި ނަފުސާނީ އެކި ގޮންޖެހުންތަކަށް އޮތް އެންމެ ފުރިހަމަ ފަރުވާއަކީ ގިނަގިނައިން މާތް ﷲ ހަނދުމަކުރުން ކަމަށެވެ. އަދި އެއީ ﷲ ތައާލާއަށް ކުއްތަންވުމަށް އޮތް އެންމެ ފަސޭހަ އަދި އެންމެ ކުރު މަގުކަމަށްވެސް ބުނެފައިވެއެވެ.
ﷲ ތައާލާ ހަނދުމަކުރުން މައިގަނޑު ތިން ބަޔަކަށް ބެހިގެންވާކަން ހުޠުބާގައި ފާހަގަކޮށްފައިވެއެވެ. އެއީ ހިތުގެ އިހްލާސްތެރިކަމާއެކު އެކަލާނގެ ހަނދުމަކުރުމާއި، ދުލުން ޒިކުރުކުރުމާއި، އަމަލީ ގޮތުން ނުވަތަ ގުނަވަންތަކުގެ ޒަރީއާއިން މާތް ﷲ ހަނދުމަކުރުމެވެ. ހިތުގެ ޒިކުރަކީ މާތް ﷲގެ ކުޅަދުންވަންތަކަމާއި އުފެއްދުންތަކާ މެދު ފިކުރުކޮށް، އެކަލާނގެއަށް ބިރުވެތިވުމާއި ލޯބިވުން ހިތުގައި ވަރުގަދަކުރުމެވެ.
ދުލުގެ ޒިކުރުގެ ތެރޭގައި ކީރިތި ގުރްއާން ކިޔެވުމާއި، ތަސްބީހަކިޔުމާއި، ފާފަފުއްސެވުމަށް އެދި ދުއާކުރުމުގެ އިތުރުން ކީރިތި ރަސޫލާގެ މައްޗަށް ސަލަވާތްކިޔެވުން ހިމެނެއެވެ. އަދި އަމަލީ ގޮތުން ކުރާ ޒިކުރުގެ ތެރޭގައި ފަރުޟު ފަސް ނަމާދު އަދާކުރުމާއި، ރޯދަ ހިފުމާއި، ޒަކާތް ދިނުމާއި، ހައްޖާއި އުމްރާގެ އަޅުކަމުގެ އިތުރުން މައިންބަފައިންނަށް އޯގާތެރިވުމާއި މީސްތަކުންނަށް އެހީތެރިވުން ހިމެނޭކަމަށް ހުޠުބާގައި ބުނެފައިވެއެވެ.
ﷲ ތައާލާ ހަނދުމަކޮށް، އެކަލާނގެއަށް ޒިކުރުކުރުމުގެ ސަބަބުން އިންސާނާގެ ނަފުސަށް ހަމަޖެހުމާއި އުފާވެރިކަން ލިބި، ދިރިއުޅުމުގެ ހާސްކަމާއި ބުރަކަން ފިލައިދާނެކަން ހުޠުބާގައި ހާމަކޮށްފައިވެއެވެ. މީގެ އިތުރުން، އެއީ ޝައިޠާނާގެ ވަސްވާސްތަކާ ދުރުކޮށްދީ، އިންސާނާ ގާފިލުކަމުގެ ނިދިން ހޭލައްވާލަދޭ ކަމެއްކަމަށްވެސް ބުނެފައިވެއެވެ. ޒިކުރުކުރުމަކީ ހަމައެކަނި މިސްކިތުގައި އިނދެގެން ކުރާ ކަމެއް ނޫންކަމަށާއި، ދިރިއުޅުމުގެ ކޮންމެ ހާލަތެއްގައިވެސް އެކަން ކުރެވިދާނެކަން ފާހަގަކޮށްފައިވެއެވެ.
ހަގީގީ ޒިކުރަކީ ދުލުން ކިޔާ ކަލިމަތަކާއެކު ހިތްވެސް އެކަމަށް ހާޟިރުކުރުން ކަމަށާއި، ﷲ ނަހީކުރެއްވި ފާފައަކާ ދިމާއަށް ދެވޭ ހިނދު އެކަލާނގެ ހަނދުމަކޮށް އެ ފާފައަކާ ދުރުހެލިވުމަކީވެސް ޒިކުރުކުރުމުގެ ތެރޭގައި ހިމެނޭ ކަމެއްކަމަށް ހުޠުބާގައި ބުނެފައިވެއެވެ. މިކަންކަން ބަޔާންކުރުމާއެކު، ހެނދުނާއި ހަވީރުގެ ދުއާތަކަށް ވަގުތު ހުސްކުރުމަށާއި ނަމާދުގެ ފަހުގައި ކުރާ ޒިކުރުތަކަށް ފަރުވާތެރިވުމަށް މިއަދުގެ ހުޠުބާގައި ވަނީ ގޮވާލާފައެވެ.