ޒަމާނީ ޓެކްނޮލޮޖީއާ އެކު ސްމާޓްފޯނަކީ އަޅުގަނޑުމެންގެ ދުވަހީ ދިރިއުޅުމުގެ މުހިންމު ބަޔަކަށް ވެފައިވާއިރު، ސޯޝަލް މީޑިއާ ބެލުމާއި، މެސެޖުކުރުމާއި، މަސައްކަތުގެ ބޭނުމުގައި ގިނަ ވަގުތު ފޯނު ބޭނުންކުރަން ޖެހުމަކީ އަތާއި އިނގިލިތަކުގެ ދުޅަހެޔޮކަމަށް ނޭދެވޭ އަސަރުތަކެއް ކުރާ ކަމެކެވެ.
ޚާއްޞަކޮށް، ފޯނު ހިފަހައްޓައިގެން ހުންނައިރު ނުވަތަ ޓައިޕްކޮށް، ސްކްރޯލްކުރާއިރު ބޮޑުވާއިނގިއްޔަށް ތަދުވުމަކީ ގިނަ ބަޔަކަށް ކުރިމަތިވާ، ނަމަވެސް ފަރުވާކުޑަކޮށްލެވޭ މައްސަލައެކެވެ. މިއީ އެއްގޮތަކަށްވެސް އާދައިގެ ކަމެއްގެ ގޮތުގައި ދޫކޮށްލެވޭވަރުގެ ކަމެއް ނޫނެވެ.
މިގޮތަށް ތަކުރާރުކޮށް އެއް ޙަރަކާތްތަކެއް ކުރުމުގެ ސަބަބުން، ބޮޑުވާއިނގިއްޔާއި އަތްތިލައިގެ ކުދި ނާރުތަކަށާއި މަސްތަކަށް ގެއްލުން ލިބެއެވެ. މިފަދައިން ދިމާވާ އެންމެ އާންމު އެއް މައްސަލައަކީ، ބޮޑުވާއިނގިއްޔާއި އަތުކުރި ގުޅޭ ހިސާބުގައިވާ ޓެންޑަންތައް (މަސްތައް ގުޅުވައިދޭ ނާރު) ދުޅަވުމުގެ ސަބަބުން މެދުވެރިވާ "ޑި ކުއަވޭންސް ޓެނޯސައިނޯވައިޓިސް"އެވެ. މިއީ މައިގަނޑު ގޮތެއްގައި ފޯނު ހިފަހައްޓައިގެން ގިނަ ވަގުތު ހޭދަކުރުމާއި، ބޮޑުވާއިނގިއްޔަށް މާބޮޑަށް ބާރުލައިގެން ޓައިޕްކުރުމުގެ ސަބަބުން ދިމާވާ ސިއްޙީ ހާލަތެކެވެ.
އަތުގެ ބޭނުންކުރުން މަދުކުރުމުންވެސް ލުޔެއް ނުލިބި، ދުވަހީ މަސައްކަތްތަކަށް ދަތިވާނަމަ ސިއްހީ އެހީތެރިއެއްގެ ލަފާ އެކަމުގައި ހޯދަންވާނެ--ފޮޓޯ/ގެޓީއިމޭޖްސްއިންޑޮނޭޝިއާގެ އީއެމްސީ ޕެކާޔޯން ހޮސްޕިޓަލުގެ އޯތޯޕެޑިކް ޓްރައުމަޓޮލޮޖީ ސްޕެޝަލިސްޓް ޑރ. ފްރެޑީ އަރިއަންޓޯ ފާހަގަކުރައްވާ ގޮތުގައި، މި މައްސަލަ ދިމާވުމުން ބޮޑުވާއިނގިއްޔާ ވީ ފަރާތުން އަތްތިލައިގެ އަރިމައްޗަށް ތަދުވުމާއި، އެ ހިސާބު ދުޅަވެ، ޙަރަކާތްތެރިކުރުމަށް ދަތިތަކާ ކުރިމަތިވެއެވެ. އަދި އެއްޗެއްގައި ހިފަހައްޓާލަން ނުވަތަ އިނގިލި ޙަރަކާތްކޮށްލަން އުޅޭ ވަގުތުތަކުގައި ތަދު އިތުރަށް ގަދަވެގެންދެއެވެ. ޑރ. ފްރެޑީ އިތުރަށް ވިދާޅުވީ، ފޯނު ބޭނުންކުރުމުގެ އިތުރުން ބަރު ތަކެތި އުފުލުމާއި، ބޮޑުވާއިނގިއްޔަށް ބާރުބޮޑުވާ ފަދަ އެހެނިހެން ޙަރަކާތްތަކަކީވެސް މި ޢަލާމާތްތައް އިތުރަށް ގޯސްކުރުވާ ކަންކަމެވެ.
ބޮޑުވާއިނގިއްޔާއި އަތުގެ ނާރުތަކަށް ލިބޭ މިފަދަ އަނިޔާތަކުން ރައްކާތެރިވުމަށްޓަކައި، ފޯނު ބޭނުންކުރާ ވަގުތު މަދުކުރުމާއި، ގިނައިރު ފޯނު ބޭނުންކުރަންޖެހޭ ޙާލަތްތަކުގައި ދޭތެރެދޭތެރެއިން އަތަށް އަރާމުދިނުން މުހިންމެވެ. މީގެއިތުރުން، ފޯނު ބޭނުންކުރުމާއި، ޓައިޕްކުރުމުގައި އެހެން އިނގިލިތަކުގެ ބޭނުން ހިފުމަކީވެސް ބޮޑުވައިއިނގިއްޔަށް ކުރާ ބާރު ވަރަށް ބޮޑަށް ކުޑަކޮށްދޭނެ ކަމެކެވެ.
މިފަދަ ރިހުމެއް ދިގުލައިގެންދާނަމަ، ނުވަތަ އަތްތިލައިގެ ބޭނުންކުރުން މަދުކުރުމުންވެސް ލުޔެއް ނުލިބި، ދުވަހީ މަސައްކަތްތަކަށް ދަތިވާނަމަ އެކަމަށް އިހުމާލުވެގެން ނުވާނެއެވެ. ދާއިމީ ނުކުޅެދުންތެރިކަމަކަށް ނުވަތަ އިތުރު ގެއްލުމަކަށް މިކަން ބަދަލުވުމުގެ ކުރިން، ލަސްނުކޮށް ކަށީގެ އަދި ހުޅުތަކުގެ ޚާއްޞަ ޑޮކްޓަރަކަށް ދައްކައިގެން ރަނގަޅު ފަރުވާ ހޯދުމަކީ ކޮންމެހެން ބޭނުންތެރި ކަމެކެވެ.
ބޮޑުވައިއިނގިއްޔަކީ އަޅުގަނޑުމެންގެ ދުވަހީ ދިރިއުޅުމުގެ އެތައް ކަމެއް ފުރިހަމަކުރުމުގައި އެންމެ މުހިންމު ދައުރެއް އަދާކުރާ ގުނަވަނަށްވާއިރު، އެ އިނގިލީގެ ދުޅަހެޔޮކަމަށް ޚާއްޞަ ސަމާލުކަމެއް ދިނުމަކީ ނުހަނު މުހިންމު ކަމެކެވެ.