އޯޓިޒަމާއި އޭޑީއެޗްޑީއާއެކު ވަރަށް ދަތި ހާލުގައި ދިރިއުޅެމުން އަންނަ، މުޙައްމަދު ފައްޔާހް ހަސަން (ދޮންކަލޯ) އާއި އޭނާގެ ބައްޕަ ހަސަން ފަޔާޒު ދިރިއުޅޭނެ ގެއެއް ބިނާކުރުމަށް ޓިކްޓޮކް މެދުވެރިކޮށް ފެށި ލައިވްއާއެކު، މިލިއަނަކަށްވުރެ ގިނަ ރުފިޔާ ހެޔޮ އެދޭ ފަރާތްތަކުން ޖަމާކޮށްދީފިއެވެ.
ދޮންކަލޯއަކީ، އުމުރުން 19 އަހަރުގެ ފައްޔާހަށް އޭނާގެ ބައްޕަ ލޯބިން ކިޔާ ނަމެވެ. ދޮންކަލޯ ދިރިއުޅެމުންދަނީ އޭނާގެ ބައްޕައާއި މާމައާއެކުގައި ބ. ހިތާދޫގައި ވަރަށް ދުވަސްވީ ގެއެއްގައެވެ.
ދޮންކަލޯގެ ދިރިއުޅުމާ ގުޅޭ ހާލަތު ފަޔާޒު ޓިކްޓޮކް މެދުވެރިކޮށް ހިއްސާކުރަމުން އަންނައިރު، އެ ވީޑިއޯތަކަށް ގިނަ ބަޔެއްގެ ސަމާލުކަން ވަނީ ލިބިފައެވެ.
ދޮންކަލޯއަކީ 'މަންމަ'އާއި 'ބައްޕަ' ފަދަ ބައެއް ބަސްތައް ކިޔާ ކުއްޖެއް ނަމަވެސް، ރަނގަޅަށް ވާހަކައެއް ނުދެކެއެވެ. އަދި ދަރިފުޅު ބެލުމަށް ޓަކައި ދޮންކަލޯ ވަނީ ވަޒީފާ ދޫކޮށްލައި، އެކަމަށް ހުސްވެފައެވެ.
އެ އާއިލާ މިހާރު ދިރިއުޅޭ ގޭގެ މާހައުލަކީ ދޮންކަލޯ ދުވެލާނެ ޖާގައެއް ނޯންނަ، އެހާމެ ހޫނުގަދަ، ބަންދުވެފައިވާ ތަނެއްކަން ފަޔާޒު ވަނީ ފާހަގަކޮށްފައެވެ. އެހެންކަމުން ދޮންކަލޯއަށް ރަނގަޅު މާހައުލެއް ހޯދައިދިނުމަށްޓަކައި އޭނާގެ ބައްޕަ ފަޔާ ގެއެއް ރާނަން ފަށައިފައިވާއިރު، މިހާރު އެ ގެ ވަނީ ހިޔާކޮށްފައެވެ.
އެ ގޭގައި ދެން އޮތީ ތަޅުންއެޅުމާއި މުށި ޖެހުންފަދަ ނުނިމި ހުރި މަސައްކަތްތައް ފުރިހަމަކުރުމެވެ. ނަމަވެސް ފަޔާޒުގެ މިހާރުގެ ހާލަތު ހުރިގޮތުން، ދޮންކަލޯއަށް ވަގުތުތައް ހުސްކޮށް ވަޒީފާއިން ކެނޑުނު ހިސާބުން، ހިޔާކޮށްފައިވާ ގެ ނިންމުމުގެ މަސައްކަތް ވަރަށް ބޮޑަށް ވަނީ މަޑުޖެހިފައެވެ.
ފަޔާޒު ބުނި ގޮތުގައި އެ އާއިލާއިން މިހާރު ދިރިއުޅެމުން އަންނަނީ ދޮންކަލޯއަށް ލިބޭ އެލަވެންސާއި އޭނާ ކުދިކުދި މަސައްކަތް ކޮށްގެން ލިބޭ ފައިސާއިންނެވެ. އޭނާ ބޭނުންވަނީ އަވަހަށް ގެ ނިމި، ދޮންކަލޯއަށް ކުޅެލެވޭނެ ޖާގަބޮޑު މާހައުލެއް ލިބުމެވެ.
އެހެންވެ، ދިވެހި ޓިކްޓޮކް ކޮމިއުނިޓީން އިސް ނަގައިގެން ވަނީ، ފަޔާޒުގެ ގެ އެޅުމުގައި އެހީވުމަށް ލައިވްއެއް ބާއްވައިފައެވެ. ޓިކްޓޮކްގެ ގިނަ ހޮސްޓުންތަކެއް ބައިވެރިވެގެން ކުރިއަށްގެންދިޔަ އެ ލައިވް ފެށިގެން 30 މިނެޓުވީއިރު، 14،000 އަށްވުރެ ގިނަ މީހުން ވަނީ އެ ލައިވްގައި ބައިވެރިވެފައެވެ.
އެ ލައިވް ތެރޭގައި ފަޔާޒުގެ ބީއެމްއެލްއާއި އެމްއައިބީ އެކައުންޓަށް ވެސް ފައިސާ ޖަމާކޮށްފައިވެއެވެ. އެގޮތުން ދަންވަރު އެކެއް ޖެހުމާ ހަމައަށް 1.2 މިލިއަން ރުފިޔާއަށް ވުރެ ގިނަ ރުފިޔާ އެކައުންޓުތަކަށް ޖަމާވެފައިވާ ކަމަށް އޭނާ ވަނީ ބުނެފައެވެ.
ފަޔާޒު ވަނީ، އެ އަދަދަށް ފައިސާ ހަދިޔާކުރާނެ ކަމަށް އުއްމީދު ވެސް ނުކުރެވޭކަން ފާހަގަކޮށް، ލައިވް އިންތިޒާމު ކުރި މީހުންނާއި ފައިސާ ހަދިޔާކުރި އެންމެންނަށް ވެސް ޝުކުރު އަދާކޮށްފައެވެ.
"ވަރަށް އުފާވެއްޖެ، އަހަރެން އުއްމީދެއް ނުކުރަން މިހާވަރު ވާނެ ކަމަށް، މިހާ ހިސާބަށް ދިޔައިމަ އެނގޭ ދިވެހި ރައްޔިތުން އެހީވާން ތައްޔާރަށް ތިބި މިންވަރު، އަޅުގަނޑާއި ދޮންކަލޯގެ ފަރާތުން ވަރަށް ބޮޑަށް ޝުކުރިއްޔާ،" ފަޔާޒު ބުންޏެވެ.
މީގެ އިތުރުން ވެސް އެ ލައިވް ތެރޭގައި ބައެއް ފަރާތްރަކުން ވަނީ އެ ގޭގައި ބޭނުންކުރާނެ ފަރުނީޗަރާއި ގޭގައި ބޭނުންކުރާނެ ބައެއް ތަކެތި ހަދިޔާކުރާނެކަން ހާމަކޮށްފައެވެ.
ފާހަގަކޮށްލެވޭ ގޮތުގައި މީގެ ކުރިން ވެސް ދިވެހި ޓިކްޓޮކް ކޮމިއުނިޓީން އިސް ނަގައިގެން ހަރަކާތްތައް ބާއްވައި، އެހީ ބޭނުންވާ މީހުންނަށް ފައިސާ ހޯދުމުގައި އެހީ ފޯރުކޮށްދީފައިވެއެވެ.