ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) އިން ހިންގާ ފަރެސްމާތޮޑާ އެއާޕޯޓުގެ އެޑްމިނިސްޓްރޭޓިވް އޮފިސަރުގެ މަގާމުގައި ހުރި ގދ. ފިޔޯރީ، މީހަކު، ވަޒީފާއިން ވަކިކުރީ ގާނޫނާ ހިލާފަށް ކަމަށް ކަނޑައަޅައި، އޭނާއަށް އަލުން ވަޒީފާ ދިނުމަށާއި ގެއްލުމުގެ ބަދަލުގެ ގޮތުގައި 47,666.67 ދެއްކުމަށް ވަޒީފާއާބެހޭ ޓްރައިބިއުނަލުން އަމުރުކޮށްފިއެވެ.
މި މި މައްސަލައަކީ 14 މާރިޗު 2023 އިން ފެށިގެން ފަރެސްމާތޮޑާ އެއާޕޯޓުގައި ވަޒީފާ އަދާކުރަމުންދިޔަ މީހަކު، ސެޕްޓެންބަރު 2025 ގައި ވަޒީފާއިން ވަކިކުރުމުން ހުށަހެޅި މައްސަލައެކެވެ.
އާރްއޭސީއެލްގެ ފަރާތުން އެ މީހާ ވަޒީފާއިން ވަކިކުރި ސަބަބެއްގެ ގޮތުގައި ބުނެފައިވަނީ، ކުންފުނީގެ އެޓެންޑެންސް ޕޮލިސީއާ ހިލާފުވުމާއި، ޑިއުޓީ ގަޑީގައި އާންމުކޮށް ބޭރުގައި އުޅުމާއި، މުހިންމު ބައްދަލުވުންތަކަށް ހާޒިރުނުވުމުގެ އިތުރުން ފޯޖުކޮށްފައިވާ މެޑިކަލް ސެޓްފިކެޓެއް ހުށަހަޅާފައިވާތީ ކަމަށެވެ. އަދި އެކި ފަހަރު މަތިން އިސްލާހީ ފިޔަވަޅުތައް އެޅުމުންވެސް އެކަށީގެންވާ ބަދަލެއް ފެނިފައި ނުވާކަމަށް ކުންފުނިން ބުނެފައިވެއެވެ.
ވަޒީފާއާ ބެހޭ ޓްރައިބިއުނަލް --- ސަން ފޮޓޯ: މުހައްމަދު ހައްޔާންއެކަމަކު މި މައްސަލަ ބެއްލެވި ވަޒީފާއާބެހޭ ޓްރައިބިއުނަލުގެ މެންބަރު އިޝާރާ ޢަބްދުލްޢަޒީޒް މިދިޔަ ހޯމަ ދުވަހު ނިންމެވީ، އެ މުވައްޒަފު ވަޒީފާއިން ވަކިކޮށްފައިވަނީ ވަޒީފާއާބެހޭ ގާނޫނާ ހިލާފަށް، މައުޟޫޢީ ޢަދުލުވެރިކަމާއި އިޖުރާއީ ޢަދުލުވެރިކަން ގާއިމުކުރުމެއް ނެތި ކަމަށެވެ.
މެޑިކަލް ސެޓްފިކެޓްގެ މައްސަލައިގައާއި ހާޒިރީގެ މައްސަލައިގައި އެ މުވައްޒަފާމެދު އިންޒާރުދީ ކުރިން ފިޔަވަޅު އަޅާފައިވާއިރު، އޭގެ ފަހުން ވަޒީފާއިން ވަކިކުރުމާ ހަމައަށް އެފަދަ ކަމެއް ތަކުރާރުވިކަން ސާބިތުކޮށްދެވިފައެއް ނުވާ ކަމަށް މައްސަލަ ނިނިން ގޮތުގެ ރިޕޯޓުގައި ބަޔާންކޮށްފައިވެއެވެ. އަދި އެއް ކަމަކަށް ފިޔަވަޅު އެޅުމަށްފަހު، އެކަމަކަށް ބިނާކޮށް އިތުރު ފިޔަވަޅެއްގެ ގޮތުން ވަޒީފާއިން ވަކިކުރެވިދާނެ ގާނޫނީ އަސާސެއް ނެތްކަން ރިޕޯޓުގައި ބަޔާންކޮށްފައިވެއެވެ.
މީގެ އިތުރުން، ވަޒީފާއިން ވަކިކުރުމުގެ ކުރިން ޖަވާބުދާރީވުމުގެ އިތުރު ފުރުސަތެއް ދީފައި ނުވުމުގެ އިތުރުން، ގާނޫނުގައި ބަޔާންކުރާ ނޯޓިސް ދިނުމެއް ނެތި ވަޒީފާއިން ވަކިކޮށްފައިވާކަން ރިޕޯޓުގައި ފާހަގަކޮށްފައިވެއެވެ.
މައްސަލަ ނިންމައި ވަޒީފާއާބެހޭ ޓްރައިބިއުނަލުން އަމުރުކޮށްފައިވަނީ އެ މުވައްޒަފަކީ އެއްވެސް ހާލެއްގައި ވަޒީފާއިން ވަކިވެފައިވާ މީހެއް ކަމުގައި ނުބަލައި، އޭނާ ކުރިން އަދާކުރަމުންދިޔަ އެޑްމިނިސްޓްރޭޓިވް އޮފިސަރުގެ ވަޒީފާ އަލުން އިއާދަކޮށްދިނުމަށެވެ. އަދި އޭނާ ވަޒީފާއިން ވަކިކުރި 03 ސެޕްޓެންބަރު 2025 އިން ފެށިގެން، އޭނާ އާރްޑީސީގެ ވަޒީފާއާ ގުޅުނު 26 ޖަނަވަރީ 2026 އާ ހަމައަށް ހިނގި 04 މަހާއި 23 ދުވަހުގެ މުސާރައަށްވާ 47,666.67 ރުފިޔާ ގެއްލުމުގެ ބަދަލުގެ ގޮތުގައި ދިނުމަށް އަމުރުކޮށްފައިވެއެވެ.