ށ. ދޮޅިޔަދޫގައި ތަރައްގީކޮށްފައިވާ "ދޮޅިޔަދޫ އައިލެންޑް ރިސޯޓު" ނުވަ މިލިއަން އެމެރިކާ ޑޮލަރަށް ވިއްކާލުމަށް ސްޓޭޓް ބޭންކް އޮފް އިންޑިއާ (އެސްބީއައި) އަށް ސިވިލް ކޯޓުން ދިން ހުއްދަ، ދޮޅިޔަދޫ އިންވެސްޓްމަންޓްސްގެ ފަރާތުން ހައިކޯޓުގައި އިސްތިއުނާފުކުރި މައްސަލައަކީ ޝަރީއަތުގެ ނިޒާމު ނަހަމަ ގޮތުގައި ބޭނުންކުރުމުގެ ގޮތުން ހުށަހެޅި މައްސަލައެއް ކަމަށް ކަނޑައަޅައި، އެ އިސްތިއުނާފު ހައިކޯޓުގެ ފަނޑިޔާރުންގެ މަޖިލީހުގެ އަޣްލަބިއްޔަތުން ބާތިލުކޮށްފިއެވެ.
މި މައްސަލައަކީ ސިވިލް ކޯޓުގެ ތަންފީޒީ ގަޒިއްޔާއާ ގުޅިގެން މިދިޔަ އެޕްރީލް މަހުގެ 19ގައި ނެރުނު "ރަހުނު ވިއްކާލުމުގެ ހުއްދަ" އާ މެދު ހިތްހަމަނުޖެހިގެން، ދޮޅިޔަދޫ އިންވެސްޓްމަންޓްސް ޕްރައިވެޓް ލިމިޓެޑާއި، އެ ކުންފުނީގެ ލޯނަށް ގެރެންޓީ ދީފައިވާ އަޙްމަދު ޙަމްޒާއާއި، މުޙައްމަދު ލަޠީފާއި، ޢަބްދުﷲ ޢަލީއާއި، ޢަލީ ޝިޔާމް އަދި އިބްރާހީމް ޖިހާދުގެ ފަރާތުން ހައިކޯޓަށް ހުށަހެޅި އިސްތިއުނާފެކެވެ.
މި މައްސަލައަކީ 2006 ވަނަ އަހަރާއި 2008 ވަނަ އަހަރު ދޮޅިޔަދޫ އިންވެސްޓްމަންޓުން އެސްބީއައިއިން ނަގާފައިވާ ޓާމް ލޯނުތަކަކަށް ފައިސާ ނުދެއްކުމުގެ ސަބަބުން، ލޯނަށް ދައްކަންޖެހޭ ފައިސާ ހޯދުމަށާއި ރަހުނުކޮށްފައިވާ ދޮޅިޔަދޫ ރިސޯޓު ވިއްކާލުމުގެ ހުއްދައަށް އެދި އެސްބީއައިއިން ސިވިލް ކޯޓުގައި ދައުވާކުރުމުން، 2015 ވަނަ އަހަރު ބޭންކާ އެއްކޮޅަށް ހުކުމްކޮށްފައިވާ މައްސަލައެކެވެ.
ހުކުމާ އެއްގޮތަށް ފައިސާ ދައްކަމުން ނުދާތީ، ހުކުމް ތަންފީޒުކުރުމުގެ މަރުހަލާގައި ރަހުނު ވިއްކާލުމަށްޓަކައި ދެ ފަރާތުން އެއްބަސްވެގެން ތިން އަގެއްގައި އިޢުލާނުކޮށްގެން ވެސް ރިސޯޓު ވިއްކާލެވިފައެއް ނުވެއެވެ. އެހެންކަމުން، ހަތަރުވަނަ ފަހަރަށް ނުވަ މިލިއަން އެމެރިކާ ޑޮލަރަށް ރަހުނު ވިއްކާލުމުގެ ހުއްދަ ސިވިލް ކޯޓުން އެސްބީއައިއަށް ދިނެވެ.
ދޮޅިޔަދޫ އިންވެސްޓްމަންޓްސްގެ ފަރާތުން ސިވިލް ކޯޓުގެ މި ނިންމުން ހައިކޯޓުގައި އިސްތިއުނާފުކުރީ، ރަހުނު ވިއްކާލުމުގެ މުއްދަތު އިތުރުކޮށްދީފައިވަނީ މަދަނީ އިޖުރާއަތުގެ ގަވާއިދުގެ 164 ވަނަ މާއްދާއާ ޚިލާފަށް ކަމަށާއި، ބޭންކުން ރަހުނު ވިއްކާލުމަށް އިޝްތިހާރުކުރުމުގައި ފަރުވާކުޑަކޮށްފައިވާ ކަމަށް ބުނެއެވެ.
މި މައްސަލައިގައި އެސްބީއައިގެ ފަރާތުން އިޖުރާއީ އިއުތިރާޒެއް ހުށަހަޅައި ބުނެފައިވަނީ އިސްތިއުނާފުކުރާ ފަރާތުން ހުށަހެޅި ނުކުތާތަކަކީ އިސްތިއުނާފީ އޮޅިގަނޑު ގިރާކުރާ ނުކުތާތަކެއް ނޫން ކަމަށެވެ. އަދި މި އިސްތިއުނާފަކީ ތަންފީޒީ މަރުހަލާ ލަސްކޮށް، ފައިސާ ދެއްކުން ފަސްކުރުމުގެ ނިޔަތުގައި މަދަނީ އިޖުރާއަތުގެ ގާނޫނުގެ 421 ވަނަ މާއްދާގައި ބަޔާންކުރާ ޝަރީއަތުގެ ނިޒާމު ނަހަމަ ގޮތުގައި ބޭނުންކުރުމުގެ ގޮތުން ހުށަހަޅާފައިވާ އިސްތިއުނާފެއް ކަމަށް ވެސް ބުނެފައިވެއެވެ.
މި މައްސަލަ ބެލި ހައިކޯޓުގެ ފަނޑިޔާރުންގެ މަޖިލީހުގެ އަޣްލަބިއްޔަތުން ނިންމެވީ އެސްބީއައިއިން ހުށަހެޅި އިޖުރާއީ އިއުތިރާޒު ބަލައިގަތުމަށެވެ. ފަނޑިޔާރުންގެ ރައުޔުގައި ފާހަގަކުރައްވާފައިވާ ގޮތުގައި، ކުރިންވެސް ތިން ފަހަރެއްގެ މަތިން އެއް އިޖުރާއަތަކުން އިޢުލާނުކޮށްގެން ރަހުނު ވިއްކާލަން މަސައްކަތްކުރިއިރު އެއްވެސް ޝަކުވާއެއް ހުށަހަޅާފައި ނުވެއެވެ. އަދި މިހާރު ކުޑަ އަގެއްގައި ވިއްކާލަން ހުއްދަ ދިނުމުން، އިޝްތިހާރުކުރުމުގައި ފަރުވާކުޑަކުރީ ކަމަށް ބުނެ ހުށަހެޅި ޝަކުވާއަކީ ހެޔޮ ނިޔަތުގައި ހުށަހެޅި ޝަކުވާއެއް ކަމަށް ބެލެވެން ނެތް ކަމަށާއި، މިއީ ވަގުތު ބޭކާރުކޮށް އިޖުރާއަތުގެ ބޭނުން ނަހަމަ ގޮތުގައި ހިފުމުގެ އަމަލެއް ކަމަށް ގަބޫލުކުރެވޭ ކަމަށެވެ.
އެހެންކަމުން، މަދަނީ އިޖުރާއަތުގެ ގާނޫނު ގެ 421 ވަނަ މާއްދާގެ (ރ) އަށް ހަވާލާދީ، ދޮޅިޔަދޫ އިންވެސްޓްމަންޓްސްގެ ފަރާތުން ހުށަހެޅި އިސްތިއުނާފު މައްސަލަ ބާތިލުކުރުމަށް ފަނޑިޔާރުންގެ މަޖިލީހުގެ އަޣްލަބިއްޔަތުން ވަނީ ނިންމާފައެވެ.
މި މައްސަލައިގެ ރިޔާސަތު ބެލެހެއްޓެވީ ފަނޑިޔާރު ޙުސައިން މަޒީދެވެ. މަޖިލީހުގައި ދެން ހިމެނިވަޑައިގެންނެވީ ފަނޑިޔާރު އިސްމާޢީލް ޝަފީޢު އާއި ފަނޑިޔާރު ޢަބްދުއްރައޫފު އިބްރާހީމެވެ.