ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުން، "ނޭޝަނަލް އެކްސްޗޭންޖް ލިމިޓެޑް"ގެ ނަމުގައި ސަރުކާރުގެ އައު ކުންފުންޏެއް ރައީސުލްޖުމްހޫރިއްޔާ މުޙައްމަދު މުޢިއްޒު މިއަދު އުފައްދަވައިފިއެވެ.
މި ކުންފުނި އުފައްދަވާފައިވަނީ ރައީސުލްޖުމްހޫރިއްޔާގެ ޤަރާރު ނަންބަރު 2026/16 ގެ ދަށުންނެވެ.
ރައީސް އޮފީހުން ބުނި ގޮތުގައި މިއީ ސަރުކާރުގެ މާލީ ބޭނުންތަކާއި އިސްލާމީ މާލީ ދާއިރާ ފުޅާވަމުންދާ ދަނޑިވަޅެއްގައި، ސަރުކާރުގެ އެހީތެރިކަމާއެކު ރާއްޖޭގައި ދެވަނަ ޙިއްސާގެ ބާޒާރެއް ނުވަތަ ސެކަންޑަރީ މާކެޓް ކުރިޔަށް ގެންދިޔުމުގެ މަގްސަދުގައި، 100 ޕަސެންޓު ސަރުކާރު ހިއްސާވާގޮތަށް އުފެއްދެވި ކުންފުންޏެކެވެ.
މި ކުންފުނި އުފެއްދެވުމުގެ މައިގަނޑު މަގްސަދުތަކުގެ ތެރޭގައި، ދިވެހި ސަރުކާރުގެ ފަރާތުން ރާއްޖޭގެ ކެޕިޓަލް މާކެޓް އިތުރަށް ތަރައްޤީކޮށް ކުރިއެރުވުމާއި، މާކެޓުގެ އިތުބާރާއި ދެފުށް ފެންނަ މިންވަރު އިތުރުކުރުން ހިމެނެއެވެ.
އަދި ޒަމާނީ ސެކިއުރިޓީޒް އެކްސްޗޭންޖްތަކާއި ޓްރޭޑިން ފެސިލިޓީތައް ގާއިމުކޮށް ހިންގުމާއެކު، ދައުލަތުގެ ސެކިއުރިޓީޒްއާއި އިސްލާމީ ޝަރީއާގެ ހަމަތަކަށް ފެތޭ ސުކޫކާއި އެހެނިހެން މާލީ ވަސީލަތްތައް ނެރުމާއި، ލިސްޓުކުރުމާއި، އަދި މުއާމަލާތުކުރުމުގެ ފުރުސަތު ފަހިކޮށްދިނުން ހިމެނެއެވެ.
މީގެ އިތުރުން، ސެންޓްރަލް ސެކިއުރިޓީޒް ޑިޕޮސިޓަރީގެ ޚިދުމަތާއި، ކްލިއަރިން އަދި ސެޓްލްމަންޓުގެ ޒަމާނީ ޕޯސްޓްޓްރޭޑް ޚިދުމަތްތައް ފޯރުކޮށްދިނުމަކީ ވެސް މި ކުންފުނީގެ މުހިންމު މަގްސަދެއްކަމަށް ސަރުކާރުން ބުނެއެވެ.
އަދި ރާއްޖެއާއި ރާއްޖެއިން ބޭރުގެ މާލީ އިދާރާތަކާއި މުއައްސަސާތަކާ ގުޅިގެން މަސައްކަތްކޮށް، ދިވެހިރާއްޖޭގައި ހަރުދަނާ އަދި ދެމެހެއްޓެނިވި މާލީ ބާޒާރެއް ބިނާކުރުމަށް މި ކުންފުނިން އިސް ދައުރެއް އަދާކުރާނެ ކަމަށް ރައީސުލްޖުމްހޫރިއްޔާގެ އޮފީހުން ބުނެއެވެ.