ދުނިޔެއާ އެއް ހަމައެއްގައި ޚިދުމަތްތައް ބައްޓަން ކުރުމަށް ދިރާގުން އިސްކަންދޭނެ ކަމަށް އެ ކުންފުނީގެ އާ ސީއީއޯ އަދި މެނޭޖިން ޑިރެކްޓަރު ވަލްޑެމާ ފެރާޑާޒް މިއަދު ވިދާޅުވެއްޖެއެވެ.
މިއަދު އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުން ދިރާގުގެ ސީއީއޯ ވަލްޑެމާ ވިދާޅުވީ، ދުނިޔެއަށް އަންނަ ބަދަލުތަކާއެކު ޓެކްނޮލޮޖީ ވެސް ކުރިއަރަމުން އަންނަ ކަމަށެވެ.
މިގޮތުން، ނުރަނގަޅު ބަދަލުތަކާއި ރަނގަޅު ބަދަލުތައް އަންނަކަން ފާހަގަކުރައްވައި ސީއީއޯ ސިފަކުރެއްވި ގޮތުގައި، ޓެކްނޮލިޖީއަކީ ލިބިފައިވާ ވަރަށް ރަނގަޅު ފުރުސަތެކެވެ.
"އަޅުގަނޑުމެން އިންވެސްޓުތައް ކޮށްގެން މި މަސައްކަތް ކުރަނީ، ދުނިޔެއާ އެއް ހަމައެއްގައި ޚިދުމަތްތައް ބައްޓަން ކުރެވޭތޯ" ސީއީއޯ ވިދާޅުވިއެވެ.
ދިރާގުގެ އާ ސީއީއޯ މިއަދުގެ ނޫސްވެރިންގެ ބައްދަލުވުމުގައި ވާހަކަދައްކަވަނީ --- ސަން ފޮޓޯ/ މުހައްމަދު ޝާތިއު އަބްދުﷲ މީގެއިތުރުން، 38 އަހަރު މުވާސަލާތީ ޚިދުމަތުގައި ދިރާގު ދެމިއޮތީ އެ ކުންފުނީގެ އަގުހުރި ކަސްޓަމަރުންގެ ސަބަބުންކަން ފާހަގަކުރައްވައި، ސީއީއޯ ވަނީ ޝުކުރު އަދާކުރައްވާފައެވެ.
ދެކުނު އެފުރިކާއަށް ނިސްބަތްވެޑައިގަންވާ ވަލްޑެމާއަކީ، ޑިޖިޓަލް ސާވިސްއާއި ޓެލްކޮމިއުނިކޭޝަންސްގެ ދާއިރާގައި 38 އަހަރަށް ވުރެ ގިނަ ދުވަހުގެ ތަޖުރިބާ ހާސިލުކުރައްވާފައިވާ ބޭފުޅެކެވެ. އިންވެސްޓަރުންނާއި، ރެގިލޭޓަރުންނާއެކު، އެފްރިކާއާއި ޔޫރަޕު އަދި އޭޝިއާގައި ވަލްޑެމާ ވަނީ މަސައްކަތް ކުރައްވާފައެވެ.
ދިރާގުގެ ސީއިއޯ ކަމުގެ މަގާމަށް އޭނާ އައްޔަނުކުރެއްވީ، މިދިޔަ ޖުލައި 31ގައެވެ. އެއީ އެ މަގާމުގައި ކުރިން 11 އަހަރު ޚިދުމަތްކުރެއްވި އިސްމާއިލް ރަޝީދު ރިޓަޔާކުރެއްވުމުންނެވެ.
މި މަގާމަކީ އެ ކުންފުނީގެ މައި ހިއްސާދާރު ބިޔޮން އިން، ދިރާގު ބޯޑުގެ ކޮމިޓީގެ ބެލުމުގެ ދަށުން އައްޔަންކުރާ މަގާމެކެވެ.